Истеъдодли ёшларни қўллаб-қувватлаш “Улуғбек” жамғармаси томонидан 2026 йилнинг 8 апрель куни Тошкент шаҳридаги Турин политехника университети ректори Тўйчиев Олимжон Алижонович раҳбарлигида “Ўзбекистонда ёшлар орасида муҳандислик соҳасини ривожлантириш истиқболлари” мавзусидаги анжуман ҳамда Олимжон Тўйчиев муаллифлигида тайёрланган “Ёш муҳандис” китоби тақдимоти ўтказилди.
Маъруза Давлатимиз раҳбарининг “Ҳозирги замонда ким ўзини муҳандис деб билса, у энг ҳурматли инсон бўлиши керак. Чунки тараққиётни муҳандисларсиз тасаввур қилиб бўлмайди. Бизга замонавий билимга эга, ҳар қандай мураккаб технологияни бошқара оладиган ҳақиқий муҳандислар керак.” деган сўзлари билан бошланди.
Бугуннинг муҳандислари илм-фан ва ишлаб чиқариш драйверига айланиши кераклиги ҳақидаги, муҳандислар энг илғор технологиялар яратувчилари эканлиги, улар инновация, ижодкорлик ва ўзгариш орқали аҳоли хавфсизлиги, соғлиги, фаровонлигини таъминлаши, муҳандислар — янги технологияларни яратиш, тасаввур қилиш ва амалга ошириш билан шуғулланадиган мутахассислар эканлигини мисоллар билан тушунтириб берилди.
Олимжон Алижонович бугунги кунда дунё иқтисодиётининг барча тармоқлари рақамли тизимга ўтаётганлиги, бу эса рақамли трансформация ахборот технологиялари ва юқори технологияли ишлаб чиқариш корхоналаридаги муаммоларни ҳал қилишга қодир қўшимча мутахассисларни талаб қилиши, мамлакатимизда барча соҳалардаги кенг кўламли ислоҳотлар изчиллиги юқори малакали кадрлар тайёрлаш билан бевосита боғлиқлигини, Давлатимиз раҳбари «Инно» инновацион ўқув-ишлаб чиқариш технопаркида муҳандислик соҳаларида кадрлар тайёрлаш ва олий таълим муассасалари фаолиятини янада такомиллаштиришга бағишлаб ўтказилган йиғилишда ҳам муҳандислик соҳалари учун мутахассислар тайёрлайдиган олий таълим муассасалари фаолиятини ривожлантириш учун келгусида амалга ошириш лозим бўлган қатор вазифалар белгилаб берилганлигини таъкидлади.
Маърузачи Президентимиз ташаббуси билан муҳандислик йўналишлари бўйича “энг яхши ғоя”, “энг яхши лойиҳа” ва “энг яхши ихтиро” республика танлови ўтказилиши белгилаб берилганлиги, унда ўқитувчилар, талабалар ва амалиётчи муҳандислар иштирок этиши мумкин бўлиши, биринчи ўринга электромобиль берилиши, шунингдек, ғоя, лойиҳа ва ихтиро муаллифи бўлган энг зўр 10 нафар иштирокчи Германия, Япония, Хитой, Россия, Италия, Туркия, Жанубий Корея, Сингапур каби давлатларга стажировкага юборилиши бўйича маълумотлар бериб ўтди.
2026 йил 1 апрель куни Муҳаммад ал-Хоразмий номидаги Тошкент ахборот технологиялари университетида “Муҳандислик ойлиги – 2026”нинг тантанали очилиш маросими бўлиб ўтганлиги, Олий таълим, фан ва инновациялар вазири бошчилиги томонидан анъанавий ташкил этиб келинаётган ушбу анжуман мамлакатимизда муҳандислик соҳасини ривожлантириш, ёшларни замонавий технологияларга кенг жалб этиш ҳамда инновацион фикрлашни рағбатлантиришга қаратилганлиги, тадбирнинг мақсад ва вазифалари тўғрисида маълумотлар бериб ўтди. Тадбир доирасида: Муҳандислик ишланмалари кўргазмаси; “Олийгоҳ кубоги” финал босқичи; Дрон рейсинг ва робототехника мусобақалари; Ғолибларни тақдирлаш маросими бўлиб ўтганлиги, эътиборли жиҳати, 2026 йил апрель ойи “Муҳандислик ойлиги” деб эълон қилиниб, республика бўйлаб 30 дан ортиқ олий таълим ташкилотларида юзлаб тадбирлар ўтказилиши режалаштирилганлиги таъкидланди.
Қуйидаги замонавий йўналишлар, яъни робототехника, сунъий интеллект, киберхавфсизлик, дрон технологиялари, яшил энергетика, авиация моделлаштириш йўналишлари қамраб олинганлиги, ойлик давомида хакатонлар, стартап тақдимотлари, маҳорат дарслари ҳамда халқаро экспертлар иштирокидаги лекциялар ташкил этилиб, ёшларнинг назарий билимлари амалиёт билан уйғунлаштирилиши маълум қилинди.
“Муҳандислик ойлиги”нинг якуний босқичи сифатида 28–30 апрель кунлари “Келажак муҳандислари” халқаро фестивали ўтказилиши режалаштирилганлиги, унда ёшлар халқаро майдонда ўз инновацион ғояларни намойиш этиш имконига эга бўлиши тўғрисида тадбир иштирокчиларига маълумотлар бериб ўтилди.
