Dadamni sog'indim
Kim qo'yar yurakka malhamni?
Kim berar kerakli daldamni?
Sog'indim eng buyuk odamni,
Dadamni sog'indim, dadamni..
Ming shukr, qatorda kamim yo'q,
Birovdan qarzim yo'q, g'amim yo'q.
Ko'ngil mehrobimda shamim yo'q,
Dadamni sog'indim, dadamni.
Ilk bora qo'limdan tutgan zot,
Dardini bildirmay yutgan zot,
Yaxshi kunlarimni kutgan zot,
Dadamni sog'indim, dadamni.
Ulfatlar maqtashar oshing yeb,
Qaytishda g'iybatga berar zeb.
Kim aytar mendan zo'r bo'lgin deb?
Dadamni sog'indim, dadamni.
Do'stlar bor, zo'r bo'lsang, qo'llaydi,
Beg'araz himmati bo'lmaydi,
Dadaning minnati bo'lmaydi,
Dadamni sog'indim, dadamni.
Ma'raka, to'ylarda ko'zlarim
Izlaydi dadamning do'stlarin,
Eslatsa deymanda so'zlarin,
Dadamni sog'indim, dadamni.
O'ksiyman gohi yosh boladay,
O'g'limdan berkinib goh, atay.
O'zimni men qanday yupatay?
Dadamni sog'indim, dadamni.
Oftobim charaqlaydi boshimda,
Hulkar jilvasi ko'zyoshimda.
Bugun, "doda" bo'lgan yoshimda,
Dadamni sog'indim, dadamni.
Xiyonat qilmadim va'damga,
Uchmadim aldoqchi olamga,
Jannatda qul bo'lay dadamga,
Dadamni sog'indim, dadamni.
Muallif: Iqbol Mirzo
O'zbekiston xalq shoiri
Manba:
https://t.me/Iqbol_Mirzo_ijodi
👉👈
