Alvido, ey mohi rahmat, shahri gufron, alvido!
Aylading azmi safar, bo‘lduk parishon, alvido!
Afv qil nuqsonimiz, ey yaxshi mehmon, alvido!
Boisi savmu salotu xatmi Qur’on, alvido!
Alvido, ey rahmati Haq, mohi tobon, alvido!
Bir necha kun xoni ehsoningga hojatmand eduk,
Ham salotu xatmi Qur’oning bilan xursand eduk,
Band edi iblislar, mehring-la shakkarxand eduk,
San ato ma’nidakim, bizlar sanga farzand eduk,
Tifl yanglig‘ aylading bizlarni giryon, alvido!
Hurmatingdin kechavu kunduz duo erdi qabul,
Hamdi Alloh, bizga bo‘ldung xosi merosi Rasul,
Kelganingga shod etib, ketganingga qilding malul,
Gar ato azmi safar qilsa, qolur yig‘lab o‘g‘ul,
Tez kel, bizlarni qilgin shodu xandon, alvido!
Shomdin ilgari amr aylar malaklarga G‘afur:
“Bir qarang bandamga, taom oldida, obi tahur,
Biym etib Mendan, yemaykim, intizori shom erur,
Ham taomu obin ustiga to‘kunglar pok nur,
Afv qildim qancha qilgan ersa isyon”, alvido!
Bir ajab mahsan – hama mahlar aro qurbing azim,
Kim sani e’zoz qilsa, Hashrda bexavfu biym,
Hurmatingdin jannat ichra bo‘ldi hurlar ko‘hkim,
Sohibi iftor erur Mahsharda ozodi jahim,
Qaysi moh san kabi sohib xayru ehson, alvido?!
Hurmatingdin g‘arqi nur erdi bu jismu jonimiz,
Ravshan erdi xatmi Qur’oning bilan iymonimiz,
Xasta erduk, sandin erdi necha kun darmonimiz,
Alvido, ey rahmati Haq, ko‘p erur nuqsonimiz,
Jurmi isyonimni qil – Haq so‘rsa – pinhon, alvido!
Lag‘v qilib erdim, ketib qilsang mani oshufta hol,
Garchi badman, yaxshi arz et so‘rsa gar Vojib Taol,
Umrga yo‘q e’timodim to keluncha yangi sol,
Xizmating erdi manga ayni rizoyi Zuljalol,
Ey mahi farxundayi nuri shabiston, alvido!
Kim saning boriñgda behad erdi ehsonu savob,
Endi xush ket, to keluncha bo‘ldi ahvolim xarob,
Kim sani e’zoz etar, jannat egasi – behisob,
Xatm qildim arzimi, vallohu a’lam bis-savob,
Mashrabbingdin rozi bo‘l, ey yaxshi mehmon, alvido!
©️Boborahim Mashrab
———
✅Litsenziya: №0008
😀Biz ijtimoiy tarmoqlarda
