Ташқи савдо: февраль
Февраль ойида экспорт ҳажми 1,9 млрд долларни, импорт эса 4,2 млрд долларни ташкил https://stat.uz/img/news/press-reliz-uzb_p25554.pdf. Бунда, экспорт олдинги йилнинг мос ойига нисбатан 43,7 фоизга қисқарган бўлса, импортнинг 30,3 фоизга ўсган.
Экспортнинг қисқариши олтин экспорти билан изоҳланади. Хусусан, 2025 йилнинг февралида мамлакатимиз 1,8 млрд долларлик олтин экспорт қилган бўлса, жорий йилда олтин экспорти амалга оширилмаган. Олтин экспорти амалга оширилмаганлигини изоҳлаш бироз мушкул чунки февралда олтиннинг ўртача нархи январга нисбатан 5,6 фоизга юқори шаклланиб, 5 минг долларни ташкил этган. Балки ноаниқликлар фонида олтин нархининг янада юқори ўсиши бўйича кутилмалар бундай қарорга сабаб бўлгандир (лекин март ойида олтин нархида пасайиш кузатилди).
Февраль ойида умумий экспорт қисқарган бўлишига қарамасдан, олтинсиз экспортнинг 19,9 фоизга ўсиши кузатилди. Хизматларсиз экспорт эса 56,7 фоизга қисқарган. Ўз навбатида олтин, хизматлар, ҳамда энергия товарларисиз экспорт нисбатан соғлом 30,7 фоизга ўсган.
Давлатлар кесимида, Афғонистон (45,9 фоиз), Франция (48,6 фоиз), Россия (26,3 фоиз), Тожикистон (23,5 фоиз) каби ҳамкорларга экспорт юқори суръатларда ўсишда давом этмоқда. Шунингдек, февралда БАА га ойлик экспортнинг юқори тикланиши қайд этилган (60,6 фоиз). Ой давомида Хитой (-5,5 фоиз), Қозоғистон (-30,3 фоиз), Туркия (-21,3 фоиз ), Қирғизистон (-42,9 фоиз) ҳамда Покистонга (-76,6 фоиз) экспортнинг юқори қисқариши қайд этилган. Бунда Хитойга экспорт сўнгги беш ойда биринчи марта қисқарган бўлса, Туркияга экспорт кетма-кет тўрт ойдан буён, Покистонга эса кетма-кет 5 ойдан буён қисқармоқда.
Экспортдан фарқли ўлароқ импорт асосий ҳамкорлар кесимида нисбатан юқори суръатларда ўсмоқда. Ой давомида Хитойдан импорт 57 фоизга ўсган. Таъкидлаш керакки, июнь ойидан буён Хитойдан ойлик импорт ҳеч қайси ойда 50 фоиздан пастроқ ўсмаган. Шунингдек, Ой давомида импорт Россиядан (25 фоизга), Қозоғистондан (48 фоизга) ўсган. АҚШдан эса ойлик импорт 42 фоизга қисқарган.
