* Рамазон туҳфаси
ИМОМ БУХОРИЙНИНГ ЗИЁРАТИДА
Нурга тўлғун ётар ҳазрат Бухорий
Тангри насиб этган иморатида.
Димоқларга етар ҳикмат ифори
Имом Бухорийнинг зиёратида.
Эй дўст! Ихлос ила иссиқ нафас қил,
Танни пок, дилни соф, овозни паст қил.
Оллоҳ ризосини юракдан қасд қил
Имом Бухорийнинг зиёратида.
Кўп эзгу ишларга инсон чоғланур,
Гуноҳ, хатолардан кўнгил доғланур,
Ҳақнинг Расулига хаёл боғланур
Имом Бухорийнинг зиёратида.
Илмидан бир насиб тегдими бизга?
Ё амал қилдикми бирор ҳадисга?
Кўнгил тўлиб-тошар анвойи ҳисга
Имом Бухорийнинг зиёратида.
Рози қилолдикми ота-онани?
Йўқладикми бирор ғарибхонани?
Босмоққа ҳад борми бу остонани —
Имом Бухорийнинг зиёратида?
Дўст-ёр, қўни-қўшни, қавму қариндош,
Мушкул ишларида бўлдикми йўлдош?
Қалбинг саволларга берурми бардош
Имом Бухорийнинг зиёратида?
Ғийбатдан тиндими бирор кун тиллар?
Омонатни омон элтдими қўллар?
Туташар умрлар, асрлар, йиллар
Имом Бухорийнинг зиёратида.
Ғазаб иморати тагидан қулар,
Дилда тавҳид нури товланиб турар,
Ҳар ким не истаса — Оллоҳдан сўрар
Имом Бухорийнинг зиёратида.
Ўлимни ёд этиб титрайди виждон,
Наҳот шундай сиймо ётибди бежон?
Дунё ва охират турар ёнма-ён
Имом Бухорийнинг зиёратида.
Ҳазрат Навоий ҳам ғами дин қилди,
Қирқ ҳадис назм этиб, Арбаъин қилди,
Ҳирот ичра қалбин сарзамин қилди,
Имом Бухорийнинг зиёратида.
Ватан ифтихори, Ислом шонидир,
Пайғамбар издоши, олам жонидир,
Юрак илму ҳикмат сиёҳдонидир
Имом Бухорийнинг зиёратида.
Ким азиз зотларнинг руҳин шод этар,
Мақбара, илмгоҳ, юрт бунёд этар,
Халқ ҳам дуоларда уни ёд этар —
Имом Бухорийнинг зиёратида!
Мирзо КЕНЖАБЕК
