Яхшилик қолар
Синовли дунёнинг синовидамиз,
Гоҳ жавоб, гоҳ сўроқ саволидамиз.
Кимга орзу, кимнинг малолидамиз,
Биздан қолса фақат яхшилик қолар.
Дилни тўлдирмайлик шубҳа, гумонга,
Йўл очиб бермайлик, худди шайтонга.
Қодир қилсин Эгам доим эҳсонга,
Биздан қолса фақат яхшилик қолар.
Буғдой нон бўлмаса, буғдой сўзимиз,
Табассум ҳам садқа-кулсин кўзимиз.
Ижобий намуна бўлиб ўзимиз,
Биздан қолса фақат яхшилик қолар.
Эзгулик уруғин сочамиз тинмай,
Аламлар, гинаю-қудратни билмай.
Ҳеч кимга ҳеч қачон ёмонлик қилмай,
Биздан қолса фақат яхшилик қолар.
Бир оғиз ширин сўз далда кимгадир,
Қизғонамиз уни, билмам негадир.
Дунёда меҳрдан ортиғи надир,
Биздан қолса фақат яхшилик қолар.
Саломимиз ҳатто душманга етсин,
Меҳримиз қалбини хижолат этсин.
Юракда тошлари эриблар кетсин,
Биздан қолса фақат яхшилик қолар.
Мискинлар кўнглига етказмайлик дарз,
Йиқилганни суяб қўймоқлик ҳам фарз.
Яшайлик, ҳаётдан олиб яхши дарс.
Биздан қолса фақат яхшилик қолар.
Инсонга мутассил эътибор керак,
Одам бўлар бошқа одамга тиргак
Охират кунига борайлик сергак,
Биздан қолса фақат яхшилик қолар
Ўткинчи умримиз, ўткинчи ҳаёт,
Ўткинчи... Бахт.. Шодлик..
Куй-лапар баёт.
Яхшиларнинг номи яшар барҳаёт.
Биздан қолса фақат яхшилик қолар.
Дилобар Урaлова
#шеър
Улашинг, Кузатинг ва Яқинларингизни таклиф қилинг 🔜 Фойдали канал ➖⬇️
┄┄┅┅✿🍃❀🌺❀🍃✿┅┅┄
https://t.me/Uddaburon_ayollar
┄┄┅┅✿🍃❀🌺❀🍃✿┅┅┄
