🏡 Аԥсуа исасдкылара
Ари аҳәамҭа Сергеи Зыхәба ианиҵеит иашьа Нои иажәақәа рыла, дара раб Дырмит Гочуа ихҳәааланы
"1923 шықәсазы акәу, 1924 шықәсазы акәу, ааԥны мшык азы Дырмит Гочуа исасцәаны иҭаазаап Нестор Лакобеи, Иосиф Сталини, Лев Троцкии. Аԥшәма, ҳәарас иаҭахузеи, иҭааз асасцәа дуқәа ишрықәнагаз иныҟәигеит, игәылацәа ааицирхыраан, ацә ҟьантаз ззырҳәо ишьит, афатә, ажәтә акагымкәа идырхиеит.
Аԥшәмацәа ачеиџьыка дырхионаҵы, Нестор Лакоба днараԥхьагылан, асасцәа иманы инахарамкәа илеиуаз акәарахь ицеит, ҵәгәырла аԥсыӡ ркырц. Аха, аԥсыӡкра азин ыҟамзаарын, уа аҭыԥантәи хылаԥшҩык дамазаарын. Уи ахылаԥшҩы аԥсыӡ ҳкуеит ҳәа рыҵәгәырқәа кны аӡы ахықә ихықәтәалаз хҩык ахацәа аниба (изусҭқәаз иалидыраауаз), дааи даарзыҵҟьан, – "Шәабатәиқәоу, абыржәыҵәҟьа шәықәҵны шәца акәымзар, Нестор ихаҭа иҿы сцаны сышәзашшуеит!" – иҳәазаап. Уи ахылаԥшҩы ииҳәази, ихымҩаԥгашьеи арҭ асасцәа акыр иарлыхҿыхзаап, иарччазаап.
Уантәи ихынҳәны ианааи, Сталин инициативала, Дырмит иашҭа агәҭаны иҭагылаз аҵла ду ашьапаҿы ацәҟьара кыдҵаны иақәзыршәо ҳәа, иара Сталин итапанчала ахысра иалагазаап. Аԥхьа Сталин дхысын, иақәымшәеит, нас Троцки дхысын, иақәымшәеит, Лакоба данхысгьы иақәымшәеит.
– Уажәшьҭа аԥшәма дхысааит, – иҳәазаап Сталин.
Дырмит атапанча анидыркы, аҵықьҳәа иааҭирҟьаз ахы ацәҟьара икыдыз агәҭаҵәҟьа иақәшәазаап. Арҭ еицлабны ихысуаз ирыхәаԥшқәозгьы, даргьы рнапқәа еинырҟьеит.
Убри аамҭазы Сталин днеин Дырмит днаидгылан, инапы ааникылан, "Абри аиааира злоугаз атапанча ҳамҭас иусҭоит, уара иумаз иахьарнахыс!" – иҳәеит.
– Мап, дад, ус иҟалом, сара сысас иҳәаҭҳа ихыхра азин сымам, аԥсуаа ҳҿы иаԥым, – иҳәан, Дырмит имуит, атапанча имгеит.
Ари ажәабжь иаҳәо аҵара-мцра атәы сызҳәом, аха акыр иҟазшьарбагоуп аԥсуаа ртрадициатә ҟазшьа бзиақәа раарԥшразы. Иҟазшьарбагоуп аԥшәма Дырмит Гочуа Сталин иҟынтә атапанча ҳамҭас ианиоу, "…Сара сысас иҳәаҭҳа ихыхра азин сымам, аԥсуаа ҳҿы ус иаԥым", – ахьиҳәаз".
🧡
