⭐️🎉 "Case Talk" rubrikasi
👩⚖️ Yuridik klinikaning faol volontyorlaridan biri Isayeva Gulibonu
1️⃣Ushbu ish ustida ishlash jarayonida qanday asosiy qiyinchiliklarga duch keldingiz?
Mazkur ishda asosiy qiyinchilik — mavjud shartnomaviy va mehnat munosabatlari saqlanib turgan bir paytda, tashkilot tomonidan bino maqomining o‘zgartirilishi (turar joy noturar binoga o’zgartilishi) asos qilib olinib, fuqaroni xizmat uyidan chiqarish talabining qonuniy yoki qonuniy emasligini baholash bo‘ldi.
Fuqaro xizmat uyida uzoq yillardan beri shartnoma asosida yashab kelgan va yuridik shaxs qayta tashkil etiliganidan so’ng mehnat shartnomasi bekor qilinmagan. Shunga qaramasdan, bino noturar obyektga o‘zgartirilgani vaj qilib ko‘rsatilgan va qisqa muddat ichida bo‘shatish talabi qo‘yilgan.
Jarayonda asosiy e’tibor yuridik shaxs qayta tashkil etilganda majburiyatlarning saqlanishi (huquqiy vorislik), xizmat uyining mehnat munosabatlari bilan bog‘liqligi hamda amaldagi mehnat shartnomasi sharoitida fuqaroni boshqa uy bilan ta’minlamasdan chiqarish mumkinligi masalalariga qaratildi.
Asosiy qiyinchilik sud jarayonlarida bevosita qatnasha olmasligim bo‘ldi, shu sabab fuqaroga o‘z huquqlarini asoslab berishi uchun zarur huquqiy asoslar keltirilgan matn tayyorlab berdim.
2️⃣Ushbu ishda o‘zingiz uchun qanday foydali narsalarni o‘rgandingiz?
Xizmat uyidan foydalanish huquqi mehnat shartnomasi bilan bevosita bog‘liq bo‘lib, shartnoma bekor qilinmaguncha xizmat uyidan foydalanish huquqi saqlanishini amaliy jihatdan mustahkamlab oldim. Ammo, izlanishlarim davomida uy-joy qonunchiligiga ko‘ra, ayrim toifadagi fuqarolarni xizmat uyidan chiqarishda ularni boshqa turar joy bilan ta’minlash majburiy ekanini angladim. Yuridik shaxs qayta tashkil etilganda uning majburiyatlari saqlanib qolishi va bu holat avval tuzilgan shartnomalarga ham tatbiq etilishini amaliyot davomida guvohi bo’ldim.
Eng asosiysi, fuqaroning ijtimoiy ahvolidan kelib chiqib uning qarshi da’vo berishga imkoni yo’qligini tushundik. Shu sababli, e’tiroznoma yozishga qaror qildik. Tushundimki, e’tiroznoma ham qarshi da’vodek kuchga ega va foydali jihati e’tiroznoma uchun davlat boji to’lanmaydi. Sudda e’tiroznoma, albatta, inobatga olindi.
3️⃣Ish muvaffaqiyatli yakunlangani haqida bilganingizda nimalarni his qildingiz?
Sud jarayoni taxminan 1 oydan ko‘proq vaqt davom etdi. Shu vaqt ichida fuqaroga bir nechta iltimosnoma va boshqa turdagi hujjatlarni tayyorlab berdim. Sud uch marta qoldirildi, sababi da’vogarda (fuqaro javobgar edi) yetarli dalillar va asoslar yo‘q edi. Fuqaro bilan doimiy aloqada bo‘ldim va har bir sud jarayonidan so‘ng yuridik klinikada ko‘rishib, maslahatlashib turdik. Tushundimki, ish bizning foydamizga hal bo‘layotgan edi. Afsuski, to‘rtinchi sud majlisida ish da’vogarning foydasiga hal qilindi. Biz bu holni adolatsiz deb baholadik va apellyatsiya muddati o‘tib ketgani bois kassatsiya shikoyati berishga qaror qildik. Hozirda sud jarayonlari davom etmoqda, afsuski, sud da’vogarning asoslari yetarli bo‘lmagani sababli sud majlisini keyinga qoldirdi.
4️⃣Endigina volontyor bo‘lishni rejalashtirayotgan talabalarga qanday maslahat bergan bo‘lardingiz?
Har bir ishda “albatta yutamiz” degan fikrga yopishib olmaslik kerak. Barcha ehtimoliy variantlarni oldindan ko‘rib, qarshi tomonga ham tayyor turish muhim. Shu bilan birga, natija ham muhim — unga erishish uchun hujjatlar bilan puxta ishlash va har bir imkoniyatdan to‘g‘ri foydalanish kerak. Mening fikrimcha, muammoning yechimi faqat bitta huquq sohasidan topilmasligi mumkin. Yaxshi huquqshunos-volontyor muammoga bir nechta yondashuv orqali qaraydi, yangi yechimni topishga harakat qiladi va o‘zi mustaqil xulosa chiqarishga odatlanadi. Shu sababli ustozlardan tayyor javob kutmasdan, faqat qaysi qonunchilik hujjatlarini o‘rganishni so‘rash va xulosani o‘zimiz chiqarishga o‘rganish kerak.
📥 Murojaat uchun:
https://t.me/TDYU_Yuridik_klinika_bot
📞Call-markazi: +998555130112
🫥🫥🫥🫥🫥🫥🫥🫥🫥🫥🫥
🖥 Bizni ijtimoiy tarmoqlarda kuzating:
💬 🌐
https://www.instagram.com/invites/contact/?i=j42ji6d0wvlz&utm_content=hc2xh8b 🌐
https://youtube.com/@Yuridikklinika?si=DVgAnGXDOi4kpvp6 🌐 https://www.tiktok.com/@tdyu_yuridik_klinikasi?_t=8fD4Plz5aEC&_r=1 🌐
https://www.facebook.com/tsullegalclinic?mibextid=ZbWKwL
