Assalomu alaykum, qadrli yurtdoshlar!
Aziz buxoroliklar!
Sizlarni qadimiy va hamisha navqiron bayram – Navro‘zi olam bilan chin yurakdan samimiy muborakbod etaman.
Bu yilgi Navro‘z muqaddas Ramazon hayiti kunlarida, uning tabarruk fazilatlariga uyg‘un holda o‘tayotgani bayramga alohida ruh, o‘zgacha fayz va quvonch bag‘ishlamoqda.
Bahor tantanalari hurmatli Prezidentimiz tomonlaridan ilgari surilgan “Navro‘zni ulug‘lash — insonni ulug‘lashdir!” degan ezgu g‘oya ostida keng nishonlanmoqda.
Mana shu quvonchli kunlarda yurtimizdagi har bir go‘sha, har bir maskan bamisoli ulkan va muhtasham bir sayilgohga aylangan.
Yoshi, millati va e’tiqodidan qat’i nazar barcha yurtdoshlarimiz sayil-tomoshalar o‘tkazib, Navro‘zni shodu xurramlik bilan kutib olmoqda.
Qolaversa, yaqinda hurmatli Prezidentimiz tashabbuslari bilan dunyoda analogi bo‘lmagan Xalqaro Islom sivilizatsiya markazining xalqimizga tuhfa etilganligi Navro‘z va ma’naviyat, Navro‘z va qadriyatlarni ulug‘lash tushunchasi naqadar mushtarak ekanligining yana bir namunasi, desak mubolag‘a bo‘lmaydi.
Qadrli yurtdoshlar!
Navro‘zning betakror sehru jozibasi, eng avvalo, 516 ta mahallamizda o‘tkazilayotgan xalq sayillarida, bayram tantanalarida o‘z ifodasini topmoqda.
Ko‘p ming yillik an’analar va zamonaviy qadriyatlarimizni o‘zida mujassam etgan mahalla tizimining hayotimizdagi o‘rni va ta’siri tobora ortib bormoqda.
Ayniqsa, “Mahallani rivojlantirish va jamiyatni yuksaltirish yili”da turli muammo va masalalar mahallaning o‘zida hal etilayotganligi sohaga oid islohotlarning naqadar xalqchilligi va natijadorligini amalda ko‘rsatib turibdi.
Zero, yoshlar tarbiyasi, osoyishtalikni ta’minlash, kambag‘allikni qisqartirish, aholini tadbirkorlikka jalb etish, ijtimoiy himoya va xotin-qizlar faolligini kuchaytirish, ekologiya va obodlik kabi bir-biridan muhim vazifalar “mahalla yettiligi” tizimi orqali samarali yechim topmoqda.
Fursatdan foydalanib, viloyatimizdagi barcha mahalla faollarini 22-martda nishonlanadigan “Mahalla tizimi xodimlari kuni” bilan tabriklaymiz.
Qadri baland qadrdonlarim!
Ushbu dilbar lahzalarda siz, azizlarni Navro‘z bayrami bilan yana bir bor qutlayman.
Navro‘z yurtimizga, har bir oila, har bir xonadonga ezgulik, baxtu saodat, to‘kinlik va farovonlik olib kirsin.
Hayotimiz quvonchli kunlar, to‘yu tomoshalarga to‘liq bo‘lsin.
Yurtimiz tinch, xalqimiz omon bo‘lsin!
Navro‘zi olam barchamizga muborak bo‘lsin!
😎
