Улуус баһылыгын солбуйааччы Мария Кронникова ыыппыт планеркатыгар Улуу Кыайыы 81 сылыгар анаммыт киэҥ бырагыраамалаах декада бары тэрээһиннэрэ хайдах ыытыллыбытын туһунан түмүктээһиннээх иһитиннэрии оҥордо. Ол курдук, Кыайыы параада, Кыайыы Кыһыл былааҕын күөрэччи анньыы, «Албан ааттара өлбөөдүйбэт”, фотомарафон, “Победный Май” быыстапка, Кыайыы оһуохайа, «Самовар” тифлоспектакль, “Кыайыы кынаттаах ырыалар” улахан кэнсиэр, “Кэриэстэбил чүмэчитэ”, нэһилиэктэртэн 81 паара кыттыылаах Кыайыы вальса, онтон да атын кэрэхсэбиллээх тэрээһиннэр дьон астынарын курдук үрдүк тэрээһиннээхтик аастылар. Режиссер Василий Николаев “Самовар” диэн тифлоспекталклыгар сылдьыбыт дьон олус биһирээбиттэрин, маны аны нэһилиэктэринэн сылдьан көрдөрүөххэ сөбүн туһунан этилиннэ.
Планеркаҕа Николай Ильич хатыламмат дьоруойдуу быһыылары оҥорбут, өссө да киэҥник биллэ илик Улуу сэрии уһулуччулаах кыттыылаахтарын үйэтитиигэ болҕомтону уурарга, ону сэргэ «Өлбөт үйэлээх полкаҕа” сэлэлээн хаамыыны инникитин фроннарынан арааран, ол фронт штандартын аннынан хаамарга интэриэһинэй этиини киллэрдэ.
Бу үүммүт нэдиэлэҕэ улуус дьахталларын отчуоттуур, быыбардыыр кэмпириэнсийэлэрэ, улуус ыһыаҕар, Мугудайга буолуохтаах Олоҥхо ыһыаҕар бэлэмнэнии боппуруостарыгар сүбэ мунньахтар, методическай көмөнү оҥорор семинар-практикум, ыччат Киинигэр ыччат политикатыгар үлэҕэ уопуту атастаһыы буолуохтара. Бу нэдиэлэттэн ыла улуус киинигэр сарсыардааҥы зарядкалар хас да түөлбэнэн (ТОС) ыытыллан саҕаланыахтара. Оттон ГТО туттарыытыгар нэһилиэнньэ маассабай кыттыыта эрэйиллэр.
Сарсыҥҥыттан бары нэһилиэктэри хабар Мария Кронникова салалталаах “демографическай десант” саҕаланар. Сыала – демография көрдөрүүтүн таһымыттан тутулуктаах нэһилиэк, оскуола салгыы баар буолуутугар туһаайан, нэһилиэктэргэ оҕо ахсаана элбиирин/аҕыйыырын көрүү, эдэр ыаллары олохсутууга, оҕо ахсаанын элбэтиигэ, нэһилиэнньэ доруобуйатын туругун тупсарыыга үлэни күүһүрдүү.
Полиция сводкатынан, 37 сайабылыанньа киирбититтэн уопсайа 12 эчэйии бэлиэтэммититтэн 6-та оҕо эчэйиитэ, кредит ылан баран төннөрбөтөх дьоҥҥо 16 сайабылыанньа, ону таһынан уоруу, арыгылааһын уо.д.а. түбэлтэлэринэн үлэ ыытыллар.
ГАИ хайысхатынан 318 массыына бэрэбиэркэлэммититтэн суолга айан сокуонун кэһиигэ 76 протокол толоруллан үлэ барар. Планеркаҕа федеральнай суолга ыарахан ыйааһыннаах массыыналарга хонтуруолу күүһүрдэргэ, миэрэлэри ылыыга болҕомто туһаайыллан, аныгыскы планеркаҕа бу боппуруоска чопчу иһитиннэрии оҥоһуллуох буолла. Оҕолор матассыыкылынан сылдьыыларын болҕомтоҕо ыларга, бары нэһилиэктэргэ үлэни күүһүрдэргэ сорудахтанна.
https://max.ru/id1430007786_gos
