Júr, maldıń aldına shıǵayıq, Shayda
(Balalıqtı eslew)
1-bólim
Júr, maldıń aldına shıǵayıq, Shayda,
Oynaqı kórk berip salaǵa, sayǵa,
Bir jup jeyran kibi duz qoynın jaylap,
Júr, maldıń aldına shıǵayıq, Shayda.
– Apa, úkemdi alıp qal, soqpaqlar burıw,
Jantaqta júre almay jılaydı qurı,
Ne bir duwbaqlar bar asaw oǵırı,
Júr, maldıń aldına shıǵayıq, Shayda.
Qansha hókkileri qalıńdı paylap,
Kiyatqandı kózi masaladay jaynap,
Birewdiń daqılın ketpesin jaypap,
Júr, maldıń aldına shıǵayıq, Shayda.
Shopan biyshara da salıp „gál, háy"in
Bálki jolımızǵa qarar hárdayım.
Apamlar shay ishsin deseń arqayın,
Júr, maldıń aldına shıǵayıq, Shayda.
Aqbastıń aq, sarı, qızıl gúlleri,
Jazǵı jaziyranıń toqsan túrleri,
Bizlerge qosılıp qayta gúllesin,
Júr, maldıń aldına shıǵayıq, Shayda.
Dúzde qaramıq kóp, sulıw dım qara,
Seniń kóziń kibi túri shım qara.
Awılǵa tayalıp qalǵandı pada,
Júr, maldıń aldına shıǵayıq, Shayda.
Torǵaylar shır-pırı shıqsa saǵınıp,
Gójekler aldımnan qashsa aǵılıp,
Bizler onnan sayın ottay qaǵınıp,
Júr, maldıń aldına shıǵayıq, Shayda.
Dúzdiń bárin biylep, bárin úyirip,
Jáne bir qarayıq oǵan súyinip,
Kún de bata almay tur, bizlerdi qıyıp,
Júr, maldıń aldına shıǵayıq, Shayda.
Kúnniń qızılına lalaptay janǵan,
Qızǵısh kórkiń menen juwırdıń tamnan,
Seni jasaǵan ba yamasa sonnan?
Júr, maldıń aldına shıǵayıq, Shayda.
2-bólim
Dep, biz ústi menen „Aqbaslı oy"dıń,
Xabarshısı kibi bir besik toydıń,
Ushıp kiyatırıp, dawıslap qoydım:
Júr, maldıń aldına shıǵayıq, Shayda.
Qanam qarsı ayrılıp láylektey qańǵıp, Kúndegiń pesinniń bolıwın ańlıp,
Júrgenim bos ketti esip bir shańǵıt,
"Júr, maldıń aldına shıǵayıq, Shayda."
Dep mennen eresek, bala emes, birew,
Seniń awılıńa bolǵanda kúyew.
Birinshi óksiwim, eń sońǵı tilek:
Júr, maldıń aldına shıǵayıq, Shayda.
3-bólim
Oho. Onnan beri ótti qansha waq,
Kóp bulttı uzattı jalǵız kún shuwaq,
Bir eles yadımnan shıqpaydı biraq,
Júr, maldıń aldına shıǵayıq, Shayda.
O, Bayımbet awıl, jazıq dalalıq,
Jiberse, qaytadan bizdi bala qılıp
Shayda, sen qaydasań, qayda balalıq?
Júr, maldıń aldına shıǵayıq, Shayda.
Teńelbay Sársenbaev
«Debdiw» toplamınan (1977)
Kanalǵa aǵza bolıwdı umıtpań:👇
