Балалығым.
Бәри де еле есимде,
Шомылғанымыз "Есим"ге.
Намазлыгерде қайтар-ек,
Барып алып песинде.
Кеттик "Хәуип"ке барайық,
Бир бирден сүңгип алайық,
"Қырқалақ" ойнап қалайық,
Дейип жүрген балалығым.
Саратанда күн турса қайнап,
Гә шомылып,гә "Қалақ" ойнап,
Қайтарсын сүтилмек шайнап,
Үйге бетлеген балалығым.
Алтын тапқандай қууанып,
Қумнан көрсек жууаны,
Поррықтың да жууанын,
Шайнап өткен балалығым.
Бөлисип жарты нанды,
Қыздырып "Қашарман"ды,
"Ақ сүйек"пенен атырып таңды,
Қызық неткен балалығым.
Әуеле ойнап "Әуелемен",
Кейин "Ләңги" тебелеген,
Хештеңени елемеген,
Келмеске кеткен балалығым.
Аяққа "Ғуллығулық" жағып,
Маңлайымнан терлер ағып,
Жығылсам шаңымды қағып,
Жарысып өткен балалығым.
Борпаң жолда жууырып,
Жер танабын қууырып.
Кеште қырман сууырып,
Қол-қабыс болған балалығым.
Желкелдеп "Маңлай шашым",
Қууғанда турра қашып,
Услансам ишим ашып,
"Қууыспақ" ойнаған балалығым.
Киятырған бурыннан,
Ойын еди "Қурынбақ",
Тасада турып қырынлап,
Жасырынған балалығым.
Жақсыны бойға сиңирген,
"Шүллик" ойнап иңирде.
От берип "Түйесиңир"ге,
Күйдирип өткен балалвғым.
Түнеп "Қауын шертек"те,
"Жалғызақ дамба" жер бетте.
Шерди тарқатып ертекке,
Сырын шерткен балалығым.
Малға берип паңғалақ,
Кешкеше ойнап "Қаңғалақ".
Гә сүрнигип,гә қаңғалап,
Үйге жеткен балалығым.
"Төрт асық" болып жолдасым,
"Сақа"ға қуйып қорғасын.
"Әлши,тәййи,шик,бүк, омпа"сын,
Билип өткен балалығым.
"Спица","Мысмылтық" жасай,
Ойнап "Тақ-тақ" саймасай.
Музда қыздырып "Асай-масай",
Шана тепкен балалығым.
Қолдан соғып "Рогатки",
Подшипниктен "Самокат"ты.
Соннан көрип рәхәәтти
Теуип өткен балалығым.
Сым менен боп көп хәлек,
Жасау ушын дөңгелек,.
Дөңгелегим өңкелеп,
Зыр жууырған балалығым.
Тал шыбықты "Ат" қылып,
Кеуиллерди шад қылып.
Болмай хеш те жат қылық,
Тәртипли өткен балалығым.
Жолда жулып пәшекти,
Урыққа арқанлап ешекти,
Саяда ойнап "Көшпек"ти,
Көшип өткен балалығым.
Қумбыл болып хәптелеп,
Соғыу ушын "Пәтпелек".
"Пәтпелек"ти хәккелеп,
Ушырып өткен балалығым.
Той болса "үйден безип",
Қызық боларын сезип.
Шыбыққа бауырсақ дизип,
Жеп өткен балалығым.
Қызлар менен теуип "Теппек",
"Бекташ"ты да қатырып-ек.
Кейнинен "Маңлай шертпек"
Ойнап өткен балалығым.
Ойнар едик ертеректе,
"Ақ терекпе,көк терекпе".
"Бизден сизге ким керек?"- деп,
Сорап өткен балалығым.
Үйде "Қатыбыламық",
Дүзде терип қарамық.
Жан-жағына қаранып,
Собық жеген балалығым.
Бийсенбай Баимбетов.
Нөкис қаласы.
Қашарман топ
***
Мийрас, ата-бабадан,
Түс алмақта - жаңадан,
Он бир, он бир баладан,
Тең екиге бөлинип,
Кел ойнайық қашарман.
Дәстеклерди сазлаймыз,
Тәртипти хеш бузбаймыз,
Наўрыз тойын тойлаймыз,
Қоллап турсын аламан,
Кел ойнайық қашарман.
Көрсет епшил хәрекет,
“Хәрекетте- берекет”,
Мазмуны, жақын “крикет”.
Дейди оннан кеп шыққан,
Кел ойнайық қашарман.
Төрт мың жылдан армаған,
Тарийхың бар жаңлаған,
Бир тамаша сайыс бол,
Шаңыңда қалсын “бейсбол”,
Кел ойнайық қашарман.
“Даў”лар алып тынбастан,
Өткир болып алмастан,
Қарсыласты, шалмастан,
Хеш ғыррамлық қылмастан,
Кел ойнайық қашарман.
Миллий -ойын арқалы,
Сана-сезим артады,
Ден-саўлығым арқаўы,
Жигерлилер-байқаўы,
Орын алың- қатардан,
Кел ойнайық қашарман.
Акшолпан Аманияз
