# Биз кимга ҳавас қиляпмиз?
Бундан 7 йил илгари Президентимиз халқаро майдонда жуда катта қадам қўйди, яъни Сурияда адашиб юрган ўзбек аёлларини болалари билан Ўзбекистонга қайтарди. Уларни нафақат авф этди, балки ижтимоий ҳаётга мослашувига имкониятлар яратди. Бу халқпарварликнинг бир кўриниши эди.
Аммо, келганлар бошқалар ҳавас қилгулик инсонлар эмас эди. Яъни, уларнинг кўпчилиги ватандан кечиб, баъзилари алданиб, жиҳодчиларга аралашиб қолган, қийинчиликлар кўрган, инсон онгига сиғмайдиган нарсаларни нафақат ўзлари, болалари ҳам кўрган эди. Уларнинг қисмати бошқаларга ибрат бўлиши, улар танлаган йўлни танламаслиги керакмасмиди?
Аммо, баъзи беўй кишилар уларнинг кийимларига таассуб сола бошладилар. Жиҳод майдонида аёллар ўзларини асраш учун қоп-қора кийиниб, болалариниям рўдапо кийимларга ўраб юришга, яшириниб юришга мажбур эди. Чунки, урушда ўлим, қон кўравериб қутуриб кетган одамсифат қотилларга аёлми, болами, барибир бўлган.
Аммо, Ўзбекистондек тинч жамиятда, дунёвий давлатда ким аёлларни хафа қила олади? ўзларига ишонган, жамиятда ўз ўрнига эга бўлган турли касб соҳибаларини ким камсита олади?
Афсус ва надоматлар бўлсинки, суриядан келган адашган аёлларнинг либоси бугун Ўзбекистонда “мода”. Қаёққа қарама, арабсимон кийинган аёллар, қизлар, баъзилар ҳатто кичкина ёшдаги қизчаларигаям рўмолни танғитиб қўйибди. Отаси ва бобосида бўлмаган соқолни қўйиб, ўзини эркак деб ўйлаб, бошқаларга қўпол муомалада бўлаётган рижжоллар кўпайгандан кўпайиб бормоқда. Ижтимоий тармоқлардаям рижжоллар дунёвий постларга “рўмолга осилма, соқолга осилма” каби ҳақоратларни ёғдиришади. Мусулмон давлатларда емирилиш айнан динни ниқоб қилиш билан боғлиқ. Аслида, ҳеч бир рижжол ёки қора рўдапога ўранган “солиҳа” замонавий ускуналарсиз – гаджетларсиз юра олмайди. Аксари замонавий машиналар ҳайдаб юрибди. Аммо, соқолсиз эркаклар, замонавий кийинган аёл-қизларга нисбатан уларнинг тоқатсизлиги ортиб бормоқда.
Юртдошларимиз, эркаклар ва аёллар, Сурияда урушдан жабр кўрганларни қайтараётганда, тинч ва дунёвий жамиятимизга путур етказиш мақсад қилинмаган, балки адашганларга тўғри йўлга қайтишга яна бир имконият берилган. Қанчадан-қанча қўшни давлатлар фуқаролари тинч ва фаровон, дунёвий давлат бўлган Ўзбекистонга фуқаро бўлиш орзусида. Кейинги уч йил ичида миллионга яқин одам кўчиб келган юртимизга.
Ўзингизга келинг, ота-боболарингиз қон кечиб юртни босқинчилардан асраб қолган, Ўзбекистонни мустақил кўриш учун жуда катта жасорат кўрсатилган. Жоҳилиятни истовчиларни ортга қайтариб юбориш қийин эмас. Ўйлаб кўринг! Шариат ниқобидаги сиёсий радикализмга йўл йўқ!
Каналга аъзо бўлинг ✅
