Uch yil o‘tgach: xususiylashtirilgan Ipoteka bank nima bo‘ldi
2023-yil o‘rtalarida OTP Group Ipoteka-bank’ni nazorat paketini sotib olgan edi.
O‘shandan buyon qariyb uch yil o‘tdi — bu haqiqiy o‘zgarishlarni ko‘rish uchun yetarli muddat.
OTP bankni haqiqatan ham o‘zgartirdi, faqat buni bosqichma-bosqich amalga oshirdi.
⏺ Birinchi bosqich: tozalash.
OTP’ga nafaqat mamlakatdagi eng yirik banklardan biri, balki ancha katta hajmdagi muammoli kreditlar ham qoldi.
Shu sababli bank birinchi navbatda kreditlar bo‘yicha yuzaga kelishi mumkin bo‘lgan yo‘qotishlarga qarshi zaxiralarini oshirdi.
Buning oqibatida xarajatlar keskin ko‘paydi va ular bilan birga bankning zarari ham ortdi.
Ya’ni bu shunchaki “omadsiz yil” emas, balki “tozalash” edi: bank eski xatarlarni oldindan tan olib, ularni balansdan chiqardi.
⏺ Ikkinchi bosqich: transformatsiya.
Risklar masalasi hal bo‘lgach, bankni qayta qurish vaqti keldi.
Aytish kerakki, ish keng ko‘lamli bo‘ldi: yangi rahbar, yangi IT-infratuzilma, yangi “core banking system”, yangi protsessing…
Bularning barchasi xarajatli, ammo samarali bo’ldi — bank nafaqat eski mijozlarni saqlab qolishga, balki yangilarini jalb qilishga ham muvaffaq bo‘ldi.
Mana xususiylashtirishdan so‘ng yangi skoring, avtomatlashtirish va ma’lumotlar tizimlarning joriy qilish natijasi.
⏺ Uchinchi bosqich: o‘sishning boshlanishi.
Shu kunlarda OTP 2025-yil https://www.otpgroup.info/news/otp-group-full-year-2025-results va tozalash hamda qayta qurish ishlari o‘z samarasini bera boshlagani ayon bo‘ldi.
Masalan, chakana kreditlashda yana o‘sish kuzatildi: iste’mol kreditlari hajmi 19 foizga, ipoteka — 18 foizga, ishlayotgan kredit portfelining umumiy hajmi esa 10 foizga oshdi.
Ipoteka yo‘nalishi ham jonlandi: bir yilda ajratilgan yangi kreditlar hajmi qariyb 40 foizga o‘sdi, bankning O‘zbekiston ipoteka bozoridagi ulushi esa 22,6 foizga yetdi.
Qolaversa, o‘sish faqat kreditlarga tegishli emas. Omonatlar 4 foizga, umumiy kapital — 12 foizga, sof komission daromadlar esa 42 foizga ko‘paydi.
Bular bizning bozorimiz uchun yaxshi ko‘rsatkichlar, lekin eng muhimi bu emas.
Eng muhimi, Ipoteka-bank nafaqat raqamlarda, balki mohiyatan ham o‘zgarmoqda.
U yirik davlat loyihalari va kompaniyalariga tobora kamroq bog‘liq bo‘lib, bozor tamoyillariga asoslangan, texnologik va yanada insonga yaqin bankka aylanib bormoqda.
Bunga eng yaqqol misol — mijozlar sodiqligi indeksi (NPS) atigi bir yilda 28 foizdan 66,8 foizgacha ko‘tarilgani. Uch karra, Karl! Qo‘shimchalarga hojat yo‘q.
#banklar
