🍃🍃ОПА-УКА ДИЛ ИЗХОР🍃
ОПА:
Ҳаёт боғим яшнатгувчи япроғим сен,
Ёшлик даврим эслатгувчи ҳур чоғим сен,
Гар йиқилсам суянгувчи алп тоғим сен,
Саодатим, савлатимсан жоним укам,
Худо берган давлатимсан жоним укам.
УКА:
Онамдайин нур таралар юзингиздан,
Кўнглим доим таскин топар сўзингиздан,
Аллоҳ сира айирмасин ўзингиздан,
Саодатим, савлатимсиз жоним опам,
Худо берган давлатимсиз жоним опам.
ОПА:
Ютуғингдан бошим доим кўкка етар,
Кулгуларинг ярим кўнглимни шод этар,
Қарашларинг гоҳ дадамга ўхшаб кетар,
Саодатим, савлатимсан жоним укам,
Худо берган давлатимсан жоним укам.
УКА:
Юрагингиз кўмилмасин армонларга,
Гул умрингиз айланмасин пайҳонларга,
Рўмолингиз тўлиб юрсин райҳонларга,
Саодатим, савлатимсиз жоним опам,
Худо берган давлатимсиз жоним опам.
ОПА:
Отамиздан қолган улуғ ёдгоримсан,
Жонимга жон, танга эса мадоримсан,
Ота уйим яшнатгувчи баҳоримсан,
Саодатим, савлатимсан жоним укам,
Худо берган давлатимсан жоним укам.
УКА:
Қалб йиғласа, ёшин сиздай артолмайман,
Жуфтимга ҳам юрак дардим айтолмайман,
Бўлмасангиз ғам уйидан қайтолмайман,
Саодатим, савлатимсиз жоним опам,
Худо берган давлатимсиз жоним опам.
ОПА:
То ҳаётман қўлим тушмас дуолардан,
Тангрим сени асраб юрсин балолардан,
Жонинг афзал менга билсанг дунёлардан,
Саодатим, савлатимсан жоним укам,
Худо берган давлатимсан жоним укам.
УКА:
Сиз учун ҳам қурбон бўлсин танда жоним,
Яхшиямки сизни туққан онажоним,
Бахтимизга омон бўлинг опажоним,
Саодатим, савлатимсиз жоним опам,
Худо берган давлатимсиз жоним опам.
Қадрдонларга улашинг
Қадрли бўлган инсонлар учун ❤️❤️
https://t.me/+pr_RRJLIk3E3YmNi
https://t.me/+pr_RRJLIk3E3YmNi
