❗️❗️❗️ • TDYU binosining “boshqa qo‘llarga o‘tishi” haqidagi ma’lumotlar haqiqatga to‘g‘ri kelmaydi
👉 So‘nggi kunlarda ba’zi saytlar va ijtimoiy tarmoqlardagi ayrim kanallarda “Yuridik universitet tarixiy binosidan ayriladi”, “TDYU binosi boshqa shaxslarga beriladi” degan mazmundagi asossiz, manipulyativ va haqiqatga zid xabarlar tarqatilmoqda. Ushbu fikrlar mutlaqo yolg‘on bo‘lib, jamoatchilikni chalg‘itishga qaratilgan ma’lumotlardir.
❗️ Toshkent davlat yuridik universiteti binosi hech qanday shaxs yoki tashkilotga berilmaydi. Mazkur bino mamlakatimiz yuridik ta’limining rivojlanish tarixida alohida o‘rin tutadigan, ko‘p yillik ilm-fan maktabini shakllantirgan muhim maskandir.
📁 O‘zbekiston Respublikasi Prezidentining 2025-yil 26-noyabrdagi “O‘zbekiston Respublikasida yuridik ta’lim va ilm-fanni yanada isloh qilish chora-tadbirlari to‘g‘risida”gi Farmonida universitetning amaldagi binosida yuridik fanlar, milliy huquq tizimi va huquqiy madaniyatni targ‘ib etadigan TDYU huzuridagi O‘zbekiston huquqi tarixi muzeyi, O‘zbekiston nizolarni hal etish markazi, TDYU Raqamli huquq markazi, Raqamli sud ekspertiza markazi tashkil etilishi belgilangan. Mazkur tuzilmalar milliy huquqni asrash, uni yangi avlodga yetkazish va xalqaro maydonda tanitishning uzviy davomidir. Toshkent davlat yuridik universiteti binosi hech kimga “berilmaydi”, aksincha, yuridik ilm, meros va huquqiy qadriyatlar markaziga aylantiriladi.
✅ Farmonga ko‘ra, Yangi Toshkent hududida Toshkent davlat yuridik universitetining zamonaviy kampusini qurish rejalashtirilmoqda va buning uchun katta hudud ajratilmoqda. TDYUning yangi kampusi universitetning o‘quv binolari, auditoriyalari, kutubxonalar, laboratoriyalar, maishiy xizmatlar, talabalar turar joylari, ijtimoiy va sport inshootlari hamda dam olish joylarini bitta hududda jamlash imkonini beradi. Ya’ni malakali ta’lim berish va ta’lim olish bilin bog‘liq barcha shart-sharoitlar bir joyda to‘planadi. Bu esa, o‘z-o‘zidan talabalarning vaqtini va kuchini tejab, o‘quv samaradorligining oshishiga xizmat qiladi.
🗺 Dunyo tajribasiga nazar soladigan bo‘lsak, ko‘plab yuqori reytingdagi universitetlarning kampuslari katta yer maydoniga ega ekani va va shahardan tashqarida joylashganini ko‘rishimiz mumkin. Stenford universiteti, Singapur milliy universiteti, Bilefeld universiteti, Boxum universiteti shular jumlasidandir. Zamonaviy va jahon standartlari asosidagi kampus va infratuzilmaning kengayishi dunyodagi eng nufuzli universitetlar bilan bilan qo‘shma fakultetlar va qo‘shma ta’lim dasturlarini ochish, talabalar va professorlar uchun keng hudud, tinch va ekologik muhit yaratish imkonini beradi.
🏛 Bir so‘z bilan aytganda, “Yuridik universitet tarixiy binosidan ayrilyapti”, “universitet binosiz qolyapti”, “universitet binosi yovuz dushmanlar qo‘liga o‘tyapti” va hokazo ko‘rinishdagi ma’lumotlar yolg‘on va asossiz ma’lumotlardir. Toshkent davlat yuridik universitetining hozirgi infratuzilmasini rivojlantirish, qo‘shimcha markazlar tashkil etish va yangi kampus qurish — yuridik ta’limning sifatini oshirishga qaratilgan navbatdagi islohotdir.
⁉️ O‘zbekiston Respublikasi qonun hujjatlariga asosan haqiqatga to‘g‘ri kelmaydigan axborot tarqatish javobgarlikka sabab bo‘lishini eslatib o‘tamiz.
⚫ 🔴 🔵 🟣 ⚪
https://t.me/tsulofficial #munosabat
