🔵Buxoro shahrida zamonaviy tibbiyot maskanlari barpo etilmoqda
Buxoro shahrida aholiga sifatli va zamonaviy tibbiy xizmat ko‘rsatishni yanada yaxshilash, tibbiyot muassasalarining moddiy-texnik bazasini mustahkamlash hamda tibbiy xizmatlarni aholiga yaqinlashtirish maqsadida keng ko‘lamli qurilish-bunyodkorlik ishlari amalga oshirilmoqda.
Joriy yil 15-may kuni O‘zbekiston Respublikasi Prezidenti Administratsiyasi rahbari Saida Mirziyoyevaning
https://t.me/SShMirziyoyeva belgilangan dasturga kiritilgan loyihalar asosida shahardagi qator oilaviy poliklinikalar uchun zamonaviy, barcha zarur sharoitlarga ega yangi binolar barpo etilmoqda.
Yil yakuniga qadar shahar aholisi zamonaviy tibbiyot muassasalarida ko‘rsatiladigan sifatli va qulay tibbiy xizmatlardan foydalanishi kutilmoqda.
Xususan, “To‘qimachi” MFY hududida 9-sonli oilaviy poliklinika uchun yangi bino qurilmoqda. Mazkur muassasa 46 ming nafarga yaqin aholiga tibbiy xizmat ko‘rsatadi.
Hozirda poliklinika 1972-yilda qurilgan, tibbiy standartlarga to‘liq javob bermaydigan moslashtirilgan binoda — kam ta’minlangan fuqarolar uchun mo‘ljallangan yotoqxona binosida faoliyat yuritib kelmoqda.
Yangi loyiha doirasida 5 qavatli, umumiy maydoni 2 760 kvadrat metr bo‘lgan zamonaviy tibbiyot maskani barpo etilmoqda. Qurilish ishlariga 22 mlrd so‘m, zamonaviy tibbiy jihozlar bilan ta’minlash uchun 2 mlrd so‘m mablag‘ ajratilgan.
Shu bilan birga, amaldagi yotoqxona binosi ham to‘liq ta’mirlanib, unda yashayotgan fuqarolar uchun munosib va qulay sharoitlar yaratiladi.
“Shirbudin” MFY hududida 6-sonli oilaviy poliklinika uchun ham yangi bino barpo etilmoqda. 35 ming nafardan ortiq aholiga xizmat ko‘rsatuvchi mazkur muassasa uchun yangi ob’yekt qurilishiga 22 mlrd so‘m, tibbiy jihozlar bilan ta’minlashga esa 2 mlrd so‘m mablag‘ yo‘naltirilgan.
Ayni paytda qurilish maydonida kotlovan qazish ishlari yakunlanib, poydevor qo‘yishga tayyorgarlik ko‘rilmoqda.
Shuningdek, “Amir Temur” MFY hududida 3-sonli oilaviy poliklinikaning yangi binosi barpo etilmoqda. 1967-yilda qurilgan mavjud bino o‘rniga 4 qavatli, umumiy maydoni 2 760 kvadrat metr bo‘lgan zamonaviy tibbiyot muassasasi quriladi.
Obyekt qurilishiga 17 mlrd so‘m, tibbiy jihozlar bilan ta’minlashga 2 mlrd so‘m mablag‘ ajratilgan. Hozirda eski binoda demontaj ishlari olib borilib, yangi qurilish uchun hudud tayyorlanmoqda.
Yangi poliklinikalarda oilaviy shifokorlar va tor soha mutaxassislari qabul xonalari, telemedisina imkoniyatlari, markaziy sterilizatsiya bo‘limlari hamda bemorlar uchun zarur barcha qulayliklar yaratiladi.
Eng muhimi, mazkur loyihalarning amalga oshirilishi natijasida aholiga birlamchi tibbiy-sanitariya yordamini ko‘rsatish imkoniyatlari kengayadi. Fuqarolarning tibbiy xizmatdan foydalanish uchun uzoq masofaga borishiga ehtiyoj kamayadi, zarur mutaxassislar qabuli va zamonaviy tibbiy xizmatlar aholi yashash hududlariga yanada yaqinlashadi.
Bunyodkorlik ishlari nafaqat yangi tibbiyot binolarini barpo etish, balki shahar tibbiyot tizimini zamonaviy talablar asosida yangilash, tibbiy xizmat sifatini oshirish va aholi uchun qulay tibbiy muhit yaratishga qaratilgan.
🌎 https://gov.uz/oz/buxoroshahar 📱 📱
https://www.facebook.com/profile.php?id=100090400832933📱 https://www.youtube.com/@buxoroshaharhokimligi3717📱 https://www.instagram.com/buxoro_shahar_hokimligi/
