🏦 Markaziy bank 2025-yil IV choragi uchun “Ko‘chmas mulk bozori tahlili”ni e’lon qildi. Tahlil natijalariga ko‘ra:
🔘Bozordagi yuqori faollik: 2025-yil yakuniga ko‘ra jami tranzaksiyalar soni 319,5 mingtaga yetib, yillik o‘sish 15,8 foizni tashkil etdi.
🔘Hududlar kesimidagi o‘sish dinamikasi: Shartnomalar sonining yuqori o‘sishi respublikaning qator hududlarida kuzatildi. Xususan, Buxoro viloyatida bitimlar soni 25,6 foizga, Sirdaryo viloyatida 23,1 foizga, Samarqand viloyatida esa 19,2 foizga oshdi. Toshkent shahri, Toshkent viloyati va Farg‘ona viloyatida esa o‘sish nisbatan mo‘tadil sur’atlarda shakllandi. Ushbu tendensiya Toshkentdan boshqa viloyatlarda infratuzilmaning yaxshilanishi va aholi daromadlarining oshishi natijasida uy-joy bozori rivojlanayotganiga ishora qilmoqda.
🔘Ipoteka va aholi daromadlari hisobiga qo‘llab-quvvatlanayotgan o‘sish: 2025-yil davomida ajratilgan ipoteka kreditlari hajmi 21,2 trln so‘mni tashkil etib, o‘tgan yilga nisbatan 29 foizga oshdi. 2025-yil yakuniga ko‘ra aholi real daromadlari 9,2 foizga o‘sdi va bu uy-joyga bo‘lgan talabni qo‘llab-quvvatladi.
🔘Qurilish va taklifning yuqori faolligi: 2025-yil yakuniga ko‘ra foydalanishga topshirilgan uy-joylarning umumiy maydoni 15,9 mln kvadrat metrga yetib, o‘tgan yilga nisbatan 7,2 foizga oshdi. Qurilish hajmining kengayishi uy-joy taklifining ortib borayotganini ko‘rsatadi.
🔘Narxlar dinamikasi: Milliy valyutada uy-joy narxlari mo‘tadil shakllandi, AQSh dollari hisobida esa o‘sish nisbatan yuqoriroq bo‘ldi. 2025-yil yakuniga ko‘ra birlamchi bozorda ko‘p qavatli uy-joy narxlari so‘mda 1,3 foizga arzonlashgan bo‘lsa, dollarda 5,7 foizga qimmatladi; ikkilamchi bozorda esa so‘mda 0,7 foizga va dollarda 7,9 foizga oshdi.
🔘Ijara bozori: IV chorak yakunlariga ko‘ra ijara bozorida mo‘tadil o‘sish tendensiyalari saqlandi. Respublika bo‘yicha ijara narxlari yil yakunida so‘mda o‘zgarmagan bo‘lsa, dollarda 8,3 foizga qimmatlashdi. Bunda Toshkent shahrida ijara narxlari III chorakdan buyon ijobiy dinamikada saqlanib qolmoqda.
🔜Ko‘chmas mulk bozori tahlili (2025 yil IV chorak)ning to‘liq matni bilan tanishish uchun https://cbu.uz/upload/iblock/adb/wmdy1ncvst2hrbzl05n0gxnktosgahvm/Ko_chmas-mulk-bozori-tahlili-_-LOTIN_merged.pdf
🔜Ko‘chmas mulk bozori tahlili (2025 yil IV chorak)ning qisqacha xulosasi bilan tanishish uchun https://cbu.uz/upload/medialibrary/027/paavuw8t4tlzemxfdlquc9amxlcnpzvu/Ko_chmas-mulk-bozor_uzb.pdf
