Nápsiqaw pıshıq
Pıshıq úyde jalǵız ózi
Qaldı ottıń basında.
Hámme ketti jumısına,
Hesh adam joq qasında.
Búytip úyde otırǵansha,
Qashan olar keler dep.
Bir shuqım nan ıdısına,
Qashan salıp berer dep.
Ózi tawıp jewdiń jolın,
Qayta-qayta oyladı.
Terezeden sırtqa shıǵıp,
Ketiwge bel bayladı.
Ańılıp ǵana otır edi,
Terezede shımshıqtı.
Japıraqlardıń arasınan,
Súykimli bir ses shıqtı.
Ańlańqırap qarasa,
Otır eken qarlıǵash,
Qızıǵıp ketti sol waqta,
Júrgenlikten qarnı ash.
Boyın jańa atqanı,
Jerge tústi ıńq etip,
Tas óliwge kelip edi,
Murnınan qan ketip.
Úy aldında júrgen eken.
Ǵazdıń eki palapanı,
Jegisi keldi, semiz eken,
Toydırǵanday hár satanı.
Birin jańa uslaǵanda,
Ekinshisi shırlap turdı.
Anası onı kórip qoyıp,
Quyrıǵınan bılǵap urdı.
Barsa baǵdıń ishine,
Gúller jaynap tur eken.
Ushıp-qonıp hár gúlge,
Úlken bir shıbın júr eken.
Jaqın barsa qolaylasıp,
Kóz alarttı ol shıbın.
Pal hárresi eken ol,
Zar qaqsattı tumsıǵın.
Barıp edi suw boyına,
Balıq-shabaq bolar dep.
Awshılardan qalǵan-qutqan,
Ushırasıp qalar dep.
Otır eken bir qurbaqa,
Ańılıp turdı dáme etip.
Umtılǵanı... suwǵa tústi,
Kórinbesten shomp etip.
Bir nárseni kórip qaldı,
Domalaǵan qańbaqtay.
Qıymıldaydı, hayran qaldı,
Awzı-murnı dım joqtay.
Uslaǵanı shım ettirdi,
Qolına kirip tikeni,
Qaydan bilsin, oyında joq,
Iynedey tiken ekeni.
Úy aldına kelgeninde,
Turǵan eken suw shelek.
Tırmalasıp júrgeninde,
Ishine tústi órmelep.
Shelekte hesh nárse joq,
Shıǵa almay kóp tunshıqtı.
Mıyawlaydı, ses-sebir joq,
Shelekti zorǵa bir jıqtı.
Iyt qoraǵa tap boldı,
Qashıp júrip alaqlap.
Tutıp ala jazladı,
Iyt te onı jalaqlap.
Qayda barsa usınday,
Bola berdi is keri,
Juwırıp kelip sekirdi,
Terezeden ishkeri.
Shıqtı stol ustine,
Úyde heshkim joq edi,
Ol stoldıń ústinde.
Awqatlar dım kóp edi.
Sarqumdaǵı kóp sútke,
Awzın jańa basqanı,
Sıńǵır etti bir nárse,
Sonnan tura qashqanı.
Jerge tústi sol waqta,
Skatertke asılıp.
Ústine sút quyıldı,
Bolmaydı heshbir jasırıp.
Tamaq izlep kóp júrdi,
Nápsisi ushın bul pıshıq.
Ústin zorǵa tazarttı,
Jaqsılıq etip bir kúshik.
© Máten Seyitniyazov
«Nápsiqaw pıshıq hám basqalar» toplamınan (1959)
Kanal:
https://t.me/Maten_Seyitniyazov_topari
