❓Elektron tovarlarni onlayn xarid qilganda yangi 5% boj joriy qilindimi?
✅Qisqa javob: yo’q, bu ijtimoiy tarmoqlarda noto’g’ri talqin qilinmoqda. Aksincha, aholiga yengillik uchun yangi tizim joriy etilmoqda.
📝 Batafsil javob:
13-apreldagi PQ-136-son Prezident https://lex.uz/pdffile/8131421 ko’ra, 2026-yil 1-iyuldan 2028-yil 1-iyulga qadar huquqiy eksperiment tariqasida rezidentlar va norezidentlar tomonidan jismoniy shaxslarning shaxsiy ehtiyojlari uchun mo‘ljallangan tovarlarni maxsus elektron savdo platformalari orqali chakana sotish uchun ularni vaqtincha saqlashga mo‘ljallangan yangi turdagi erkin ombor — bond ombori faoliyati yo‘lga qo‘yiladi. Unga ko’ra:
➖ bond ombori erkin ombor faoliyatini litsenziyalash tartibi asosida tashkil etiladi;
➖ bond omboridan tovarlarni sotish maxsus elektron savdo platformasi orqali amalga oshiriladi;
➖ bond omboriga tovarlar erkin ombor bojxona rejimiga muvofiq joylashtiriladi hamda ushbu tovarlarni jismoniy shaxslarning shaxsiy ehtiyoji uchun chakana sotishga ruxsat beriladi;
➖ respublika hududidan bond omboriga maxsus elektron savdo platformalari orqali chakana sotish uchun mo‘ljallangan tovarlarni joylashtirishga ruxsat etilmaydi, bundan respublika hududidan tashqariga olib chiqish uchun mo‘ljallangan tovarlar mustasno.
❓Bu nima degani?
Endilikda tadbirkorlar xohlasa, xorijdan aholiga sotish uchun import qilinadigan tovarlarni katta maxsus omborda saqlashadi va bond ombori degan maqom uchun litsenziya olishadi. Lekin asosiy sharti — bu tovarlarni faqat elektron platformalar (marketpleys) orqaligina sotish mumkin bo’ladi. Masalan, bozorga olib chiqib sotishga ruxsat berilmaydi.
Bu omborning foydasi shundaki, aholi ushbu ombordagi maxsus platformalarda mahsulot sotib olganda hozirgi qimmat boj va to’lovlar o’rniga, kamroq boj to’laydigan bo’ladi.
Masalan, bond omborlaridan tovarlarni maxsus elektron savdo platformalari orqali xarid qilganda:
1️⃣ 5 ta pozitsiyadagi tovarlar, jumladan, smartfon, noutbuk, planshet, kolonka, mikser, sharbat chiqargich, soch quritish uskunasi, elektr choynak, multipishirgichlar, dazmol va boshqa tovarlar uchun 5 foiz miqdorida yagona bojxona to‘lovi to‘lanadi;
2️⃣ 30 ta pozitsiyadagi tovarlar, jumladan, kiyim-kechaklar, poyabzal, soatlar, xotira qurilmalari, quvvatlagich, fonar, quloqchin, monitor va proyektorlar, videoo‘yin apparatlari kabi tovarlar uchun esa qo‘shilgan qiymat solig‘i va 3 foiz miqdorida bojxona boji to‘lanadi.
ℹ️ Ma’lumot uchun: hozir bir oyda 200 AQSh dollaridan oshgan shaxsiy ehtiyoj uchun onlayn buyurtma orqali olib kelinadigan tovarlarga 30% boj solinadi.
✅XULOSA:
Hozir kimdir Amazon orqali onlayn ravishda 1 ming dollarga telefon xarid qilsa, 200 dollariga boj to’lamaydi, qolgan 800 dollari uchun 30% boj, ya’ni 240 dollar boj to’laydi.
Maxsus tashkil etiladigan bond omborlari orqali 1 ming dollarlik telefon xarid qilsa, umumiy summadan 5% boj, ya’ni 50 dollar boj to’laydi.
👉
https://t.me/xushnudbek 👈
