Missiya: Ruhun Oyanışı
Dərəcə və ayılanlar Retroqradı artıq illərdir izləyir. Onlar vaxtaşırı şəhərə enir, oyananları bu qaranlıq labirintdən çıxarmaq üçün kölgələr arasında hərəkət edirlər. Qaranlıq küçələrdə hər bir aydınlanan Leyli uğrunda görünməz savaş gedir. Amma Dərəcə təkcə bunun üçün gəlmir. Bu səfərlərin altında gizlənən daha dərin, daha qədim bir məqsəd var.
Yadındadırmı — Mərcan ağacı, Baba, Ruh?
Heç nə təsadüfi deyil.
Retroqradla mübarizədə qaçaqlar dəfələrlə izahı olmayan bir qüvvə ilə üz-üzə qalıblar. Bu, sadə bir güc deyildi. Bu, tilsim idi. İnsanları qəflət yuxusuna salan, iradəni bağlayan, ruhu uyuşduran bir tilsim. Güllə ona təsir etmirdi, maçete onu kəsmirdi. Fiziki savaş faydasız idi. Çünki bu döyüş artıq küçələrdə yox, ruhların içində gedirdi. Əl-qol ilə deyil, təfəkkürlə. Görünənlə yox, görünməzlə.
Gözə görünməz müharibəyə qarşı yalnız onun qədər güclü bir silah işləyə bilərdi.
Bu silah — ruhsal silah idi.
Və yol yenə ora aparırdı.
Həmin o Qaraja.
Dediyimiz kimi, Dərəcə illər boyu Retroqradın qarajlarından birinin altında — unudulmuş, atılmış bir bunkerdə məxfi laboratoriya gizlədib. Bu laboratoriya zamanla dolub-daşmışdı: biliklərlə, sınaqlarla, genetik kodlarla. Məqsəd tək idi — xalqı özünə, öz kimliyinə qaytaracaq gücü yenidən oyatmaq. Canavarçanın saysız-hesabsız canavarlarına qalib gələ biləcək gücü.
Qədim dastanlarda adı çəkilən Ruh.
Bir vaxtlar Babilin tilsimini qıran.
Bir vaxtlar Mərcan ağacından sızan o qan.
Artıq hər şey hazır idi. Lazım olan bütün materiallar toplanmışdı. Dərəcə cihazları işə salır. Retroqrad sakinlərinin genlərini özündə birləşdirən qan dolu silindr elektrik və radio dalğalarının təsiri altına salınır. Paralel dünyanın enerjisi prosesə qoşulur. Zaman, məkan və yaddaş bir nöqtədə toqquşur.
Və budur — qədim döyüşçünün ruhu sözdən əmələ keçir.
İndi Xeyirlə Şərin mübarizəsində güclər bərabərləşir. Amma bu kifayət deyil. Qədim Ruh təkcə keçmişlə yaşaya bilməz. Ona Retroqradın bütün yenilikləri yüklənməlidir: müasir döyüş texnikaları, müasir silahlar, informasiya axını. Bu dəfə təkcə söz yetməyəcək.
Ruh ruhsal döyüşdə istifadə edilə biləcək hər bir sənəti mənimsəməlidir — texnologiyanı, musiqini, ritmi, deyilişi. O, köhnə ilə yeninin sintezidir.
Ruh Retroqradın küçələrində sərbəst dolaşmalıdır.
Onlardan biri kimi.
Qədimliyi hiss olunmamalıdır.
Çünki əsl güc gizli olandır.
https://www.youtube.com/watch?v=Q3c26CmqCfc
