Darixa ÚBBINIYAZOVA
APASÍNA ARNALǴAN KÓRPESHE
Gúlayım qolı gúl qız. Klasında hámme onı sheber qız dep ataydı. Ol qolı bos waqıtlarında toqıma toqıydı, quraq quraydı, hár qıylı shiyrinliklerdi, taǵamlardı tayarlawdı unatadı. Bos waqtın bosqa jibergisi kelmeydi. Barlıq sabaqlarınan da ayrıqsha bahalarǵa oqıydı. Klasındaǵı eń úlgili oqıwshı.
Kempir apası da onı awzınan túsirmey maqtaǵanı-maqtaǵan. «Meniń sheber qızim, aqıl-dana qızım!..» «Jaqsı sóz-jan azıǵı» degen-ǵoy, Gúlayım da apasınıń shiyrin sózlerinen ilhamlanıp jumıs islewden, óner úyreniwden hasla jalıqpaydı. Al, onıń úkesi Gúlayda bolsa júdá erke. Kishkene bolǵannan keyin onı kempir apası da, ata-anası da erkeletip, onsha jumsay bermeydi.
Bir kúni ol ájapasına: -Maǵan shıraylı etip kórpeshe tigip beriń-sá,-dep qıyıldı. Ájapası úkesiniń aytqanın eki etpey, túslenip bolıp, tigiw mashinasına otırdı. Gúlayda ájapasınıń janında tapjılmastan telmirip qarap otır. Gúlayım kórpeshege paxta salar waqıtta úkesi oǵan; -Paxtasın qalıń etip sal, jup-jumsaq bolsın,-dedi. Keshke deyin kishkene sulıw quraq kórpeshe tayar boldı. Gúlaydanıń quwanıshınıń shegi joq. Ájapasına qayta-qayta raxmet ayttı. -Ózimniń sheber ájapamnan aynanayın,-dep onıń betinen shorp ettirip súydi. Kórpesheni orap, apasınıń oramalına túye basladı.
-Haw, onı orap qoyıp ne qılasań? Tósep otırmaysań ba?-dedi ájapası.
-Tiss,-dedi hesh kim bilmesin degendey áste ǵana.
Aradan 3-4 kún ótken soń, azanda Gúlayda kempir apasın 8-mart-Hayal-qızlar bayramı menen qutlıqladı.
-Mınaw, sawǵa sizge,-dedi túyinshikti berip atırıp.
-Haw, haw óyyppey shıraǵım-ay, óziń kip-kishkene bolsań da, úlken sawǵa tayarlapsań-ǵoy! Aqılıńnan aynanayın, shúkirimm!!!
Gúlaydanıń ózi túyinshikti ashtı.
-Apa, apa, qáne «hop» dep bir túrgeliń, mına jumsaq kórpeshede otırıń,-dedi.
-Ha-aw, Gúlayda úndemey júrip «bále» ekenseń-ǵo. Maǵan «Ózime kórpeshe tigip ber» dep ediń-ǵo...
-He, ne bolıptı sonda?! Demek, kórpeshe meniki, onı kimge beriwdi ózim bilemen! Ájapa ekinshi márte óz úkeńe jaman sóz aytpa?! Men «bále» emespen, apa, apa, aytsa... Men, men aqıllı qızban-ya?
-Álbette, ekewińizde aqıllısız, ekewińizde jaqsı, mehribansız. Aqıllı qızlarımnan aynanayın,-dep aqlıqların bawırına bastı.
Каналымызға қосылың👇
https://t.me/jetkinshek1932
