Бугун, 25 апрель куни Бош прокурор Ниғматилла Йўлдошев раислигида республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш бўйича Республика идоралараро мувофиқлаштириш Кенгашининг навбатдаги кенгайтирилган йиғилиши ўтказилди.
Видеоселектор тарзида ўтказилган мазкур йиғилишда Ўзбекистон Республикаси Президенти Администрацияси, Парламент ва Ҳукумат аъзолари, ҳуқуқни муҳофаза қилувчи идоралар, бошқа вазирлик ва идораларнинг раҳбарлари, Республика идоралараро мувофиқлаштириш штабининг аъзолари, вилоят, туман–шаҳар ҳокимлари, прокурорлар, ички ишлар идоралари раҳбарлари, ҳудудий ишчи гуруҳ аъзолари, шунингдек бошқа идоралар вакиллари иштирок этдилар.
Йиғилишда Ўзбекистон Республикаси Президентининг 05.01.2026 йилдаги 1 ва 2-сонли қарорлари ва мамлакатда жиноятчилик ва ҳуқуқбузарликларни олдини олишга доир вазифалар ижроси танқидий муҳокама қилинди.
Йиғилишда Бош прокурор сўзга чиқиб, Давлат раҳбарининг ташаббуслари билан мамлакатда тинчлик ва осойишталикни таъминлаш чоралари мутлақо янгича ёндашувлар ва самарали механизмлар асосида ҳудудларда криминоген вазиятни барқарорлаштириш борасида амалга оширилган ишларга тўхталиб ўтди.
Таъкидланишича, 2025 йил ва жорий йилнинг ўтган даврда маҳаллаларда 20 мингдан зиёд “намунавий хавфсиз кўча” ва 50 мингга яқин “хавфсиз йўлак”лар ташкил этилди, аҳоли гавжум жойларга минглаб видеокузатув, юзни ва авторақамларни таниб олувчи камералар ўрнатилган. 300 мингга яқин объектлар техник қўриқловга олинган, бир неча ўн минглаб ташвиш тугмалари, замонавий домофон комплекслари ўрнатилган, ҳуқуқбузарлик содир этиш ва ундан жабрланиш эҳтимоли бўлган фуқароларнинг маиший-ижтимоий муаммолари ҳал этилган.
Шу билан бирга Бош прокурор мутасаддилар томонидан қарорлар ижросини таъминлашда йўл қўйилаётган хато ва камчиликларни ҳар бир ҳудуд ва соҳа кесимида аниқ рақамлар ва мисоллар билан таъкидлаб ўтди.
Тадбирда республика идоралараро мувофиқлаштириш штаби аъзолари, масъул идоралар раҳбарлари ва ҳокимларнинг камчиликлари юзасидан тушунтириш ва изоҳлари эшитилди, масъулиятсизликка йўл қўйган мутасаддиларга нисбатан тегишли чоралар кўрилди.
Йиғилишда, Бош вазир ўринбосари З.Маҳкамова, Ички ишлар вазири А.Ташпулатов, “Нуронийлар” жамғармаси раиси С.Турдиев, Сенаторлар ва бошқа тегишли вазирлик ва идоралар иштирокчилари сўзга чиқиб, ўз фикр ва мулоҳазаларини билдиришди.
Йиғилиш натижаси бўйича тегишли қарор қабул қилиниб, ижрога қаратилди.
🌐 Бош прокуратуранинг ижтимоий тармоқлардаги саҳифаларига аъзо бўлинг!
https://www.prokuratura.uz/#/
https://t.me/uzbprokuratura |
https://www.instagram.com/boshprokuratura |
https://www.youtube.com/@uzbprokuratura |
https://www.facebook.com/profile.php?id=100092602076596
