Сырдык ахтылҕан, тыыннаах үбүлүөй уонна ытык киһи кэриэһэ: кырдьаҕас Бараахап оскуолатын 1994 сыллааҕы выпускниктарын ураты бэлэҕэ
Исиидэр Бараахап аатынан оскуола 1974 сыллааҕы выпускниктара оскуоланы бүтэрбиттэрэ үбүлүөйдээх 30 сылыгар, 2004 сыллаахха убаастыыр учууталларын үөрдээри ураты истиҥ бэлэҕи оҥорбуттара.
Оскуолатааҕы оҕо саастарын ахтан-санаан, ытыктыыр учууталларын уонна кини ырыа буолбут хоһооннорун үйэтитэн, кэрэхсэбиллээх бэлэҕи – ырыанньыгы бары түмсэ охсон таһаарбыттара.
Петр Поликарпович барахсан ырыа буолбут хоһоонноро – дьон сүрэҕин сылаас иэйиинэн толорор, өйдөнүмтүө, үйэлээх айымньылар. Билигин ытык ыаллар ийэлэрэ, аҕалара, эбэлэрэ, эһэлэрэ буолан олорор оччотооҕу оҕолор маннык сонун ньыманан бэйэлэрин сырдык кэскиллэрин, ыраас ыраларын кэнэҕэски көлүөнэҕэ хаалларбыттара билигин кэрэ кэпсээн, уос номоҕо буола сылдьар.
Бу дьоро күн биһиги улууспут биир ытык-мааны олохтооҕун, өр сылларга айымньылаахтык үлэлээбит, эдэр ыччаты үөрэххэ-сырдыкка, айар кукка уһуйбут Одорусов П.П. сырдык кэриэһин истиҥник ахтабыт. Бүгүн кини баара буоллар, 95 сааһын туолуо этэ. Легендарнай учуутал Петр Одорусов аата оскуолабыт уонна улууспут историятыгар үйэ-саас тухары суруллан хаалбыт, кини айымньылаах үлэтэ, ыччаты үөрэхтээһиҥҥэ уонна улууспут культуратыгар киллэрбит сүҥкэн кылаата хаһан да умнуллуо суоҕа.
"30 сыллаах үбүлүөйбүтүгэр үөрэммит кылааспытыгар, тапталлаах оскуолабытыгар мустаммыт, бэчээттэппит ырыанньыкпытын сүрэхтээбиппит. Ыҥырыыбытын ылынан, убаастыыр учууталларбыт Одорусов Петр Поликарпович, Жиркова Ксения Илларионовна, Баланова Мария Васильевна ыалдьыттаан, үөрэн-көтөн, үөрэппит оҕолоругар кэс тылларын этэн, сүбэлээн-амалаан барбыттара. 30 сыллааҕыта оскуоланы бүтэрбит оҕолоро бары талбыт идэлэригэр үөрэнэн, араас идэни баһылаан, олохторун оҥостон, ыал ийэлэрэ, аҕалара, эһээлэрэ, эбээлэрэ буолан олороллоруттан чахчы да астынан, үөрэн барбыттара.
Петр Поликарпович кинигэтэ тахсыбытыттан үөрэн-долгуйан, махтанан туран, бу ырыанньыгы 1994 сыллаахха Исидор Барахов аатынан оскуоланы бүтэрбит 10 "б" кылаас оҕолоругар аныыбын диэбитэ.
2025 сыллаахха оскуоланы бүтэрбиппит 50 сыллаах үбүлүөйүн бэлиэтээбиппит. Онно А,Б,В,Г кылаас оҕолоро араас сиртэн кэлэн, тапталлаах дойдубутугар Үөһээ Бүлүүгэ мустан, анал программанан, музейдарынан, оскуолаларынан сылдьыбыппыт. Дойдуларыттан тэйбит, 50 сылы быһа кэлбэтэх оҕолор кэлэн, улууспут сайдыбытыттан улаханнык сөҕөн-махтайан, үөрэн барбыттара", - диэн санаатын үллэһиннэ Петр Одорусов үөрэнээччитэ, улахан, ытыктанар ыал ийэтэ, эбэтэ, хос эбэтэ, үп эйгэтигэр өр кэмҥэ үлэлээбит, Саха Республикатын Үбүн министерствотын үпкэ үлэтин туйгуна, Үөһээ Бүлүү нэһилиэгин бочуоттаах олохтооҕо, үлэ бэтэрээнэ, өр сылларга урбаан эйгэтигэр, улууһун сайдыытыгар кылаатын киллэрсибит Люция Спиридонова.
Исидор Бараахап оскуолатын выпускниктара бу ырыанньыгы таһааран, бэйэлэрин икки ардыларыгар быстыбат ситими уонна төрөөбүт дойдуларыгар, оскуолаларыгар дириҥ тапталларын, бэриниилэрин чахчы дьыаланан көрдөрбүттэрэ. Кинилэр үлэлэрэ кэнэҕэс көлүөнэҕэ холобур буолуоҕа, сахалыы ырыабыт сүмэтигэр уһуйуоҕа.
Улууспутугар Үөрэхтээһин саҕаламмыта 150 сылынан истиҥник эҕэрдэлээн туран, эргэ Бараахап оскуолатын выпускниктарыгар, кинилэр дьиэ кэргэттэригэр бары кэрэни, үтүөнү, чэгиэн доруобуйаны уонна ситиһиилэри баҕарабыт!
Киэн туттар, сүгүрүйэр биир дойдулаахпыт, РСФСР үөрэҕириитин туйгуна, методист учуутал, СӨ үтүөлээх учуутала, СӨ Президенин иһинэн «Барҕарыы» национальнай фонда лауреата, СӨ «Гражданскай килбиэн» анал бэлиэ хаһаайына, СӨ үөрэҕириитин систиэмэтин бочуоттаах ветерана, СӨ «Учуутал албан аата» анал бэлиэ туһааннааҕа, норуоттар икки ардыларынааҕы уонна СӨ суруйааччыларын Сойуустарын чилиэнэ, Үөһээ Бүлүү улууһун уонна Үөдүгэй нэһилиэктэрин Бочуоттаах олохтооҕо, 119 ырыа ааптара, ол иһигэр «Тыыннаахтар умнубат сыллара» аар-саарга аатырбыт ырыа ааптара Петр Поликарпович Одорусов аата үйэлэргэ умнуллубатын, кини сырдык мөссүөнэ өрүү биһиги сүрэхпитигэр тыыннаах!
#УлууКыайыы81сыла
#ПетрОдорусов95сааһа
#Махталлаахкөлүөнэ
#Үөрэхтээһин150сыла
Галина Васильева
http://T.me/admvervil
