ТОЛҒАНЫС
Ышқымды писент етпеуге,
Урынсам зарын тартаман,
Қорқаман сени еслеуге,
Умытыуға да қорқаман.
Aстан-кестен қыялым,
Қабымда сенсиз ортаман.
Қорқаман түссе дийдарың,
Түспесе деп те қорқаман.
Қорқаман созған қолыңды,
Узағырақ қыспаға.
Қорқаман, шайқап толымды,
Қолымнан қолың шықса да.
Жутардай теңиз айдыны,
Өзимди шетке тартаман,
Қорқаман жүрсең қайғылы,
Шалқып жүрсең де қорқаман.
Қорқаман, узақ түнлерде,
Жападан жалғыз отырсаң,
Қыймайман әлле кимлерге,
Дым алыс хәм дым жақынсаң.
Қорқаман сырым билер деп,
Билмеспе, деп те қорқаман.
Қорқаман: ерге тийер деп,
Тиймеспе, деп те қорқаман.
Қорқаман, солай әдетим,
Атыңды сениң айтпаға,
Өмирде көп ғой ғәлетим,
Қорқаман дизден қайтпаға.
Бахтыма үмит артаман,
Шығармыз, бәлки, бир шыңға,
Сен ушын, жаным, қорқаман,
Қорқаман өзим ушын да!
Расул Гамзатов
