Faustke arnaw
Ilimniń kánarın iyelep ábden,
Faustpan aspadım sonda da hádden,
Qol qanat,járdemshim,shágirtim Vagner,
Úmitim elede kóbirek sennen.
Lek baxıt giltin qaǵazda kórme,
Toqtama hesh waqıt,táǵdirge kónbe,
Tragediyasınday grek xalqınıń,
Jańlayber sahnada mudamı tórde,
Sıyqırǵa berilip dúzemedim bóz,
Ruhlardıń tilsimi misalı suq kóz,
Men dúzgen kelisim ózime ayan,
Janımdı aladı eki qatar sóz.
Aq kewil Margarita meni keshirseń,
Biygúná emespen eger túsinseń,
Dartińniń eń baslı sebepkeri men,
Endi kesh boladı múmkin ókinseń.
Shaytannıń kúshinen grek gózzalın,
Tirilttim Elenaǵa qaytarıp janın,
Evropian ulım uzaq jasamay,
Kóre almay ketti óz idealın.
Meni hár adımda izledi ájel,
Men júz jas jasadım bolmadım kesel,
"Qanlı shartnama" nı buzbayın deseń,
Men seni kútemen, kel Mefistofel.
28. III.2026
Dawranbek Seytmuratov
Kanal:
