✾ دار المصنفین | دینی کتب وتحاریر ✾

✾ دار المصنفین | دینی کتب وتحاریر ✾

Public

مشاهده کانال

نمی‌توانید بپیوندید؟ @musannifeen

۰

۸.۷k عضو

به‌روزرسانی شده: May 15, 2026 at 3:41 PM

✾ دار المصنفین | دینی کتب وتحاریر ✾

✾✾✾✾✾✾ دار المصنفین ✾✾✾✾✾✾ علمائے اہل سنت وجماعت کے معتبر کتب کا ذخیرہ ہے. یہاں ہر قسم کی دینی کتب، مثلا تراجم، تفاسیر، شروحات آپ حاصل کر سکتے ہیں. ✾ رابطہ کے لیے: ✾✾✾✾✾✾✾✾✾✾✾ @Musannifeen_bot : رابطہ بوٹ

Join @musannifeen for exclusive musannifeen_bot content and discussions in 23

رتبه‌بندی

رتبه‌بندی جهانی

#456

+2

رتبه‌بندی زبان

#45

+1

رتبه‌بندی دسته‌بندی

#23

-1

رشد مشترکان (5 روز گذشته)

مجموع: 8.7K

رشد 24 ساعت: -20 0%

Loading...

رتبه‌بندی

ورود لازم است

Loading...

Loading recommended channels...

آخرین پست‌ها

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡ متفرق سوالات وجوابات ⚡

(سوال) معلوم یہ کرنا ہے کہ اگر کسی آدمی پر نفسانی یا شہوانی خیالات آ جائیں اور اس کے لنک میں تناؤ آ جائے تو تناؤ کی حالت میں چپ چپہ پانی یا جس کو لیس دار پانی کہتے ہیں تو اس لیس دار پانی کے نکلنے سے وضو ٹوٹے گا یا غسل فرض ہوگا؟
(جواب) شہوانی خیالات یا تناؤ کے وقت جو چپچپا یا لیس دار پانی خارج ہوتا ہے اسے مذی کہتے ہیں، اس کے نکلنے سے وضو ٹوٹ جاتا ہے لیکن غسل فرض نہیں ہوتا، البتہ اگر منی (گاڑھا سفید مادہ جو عموما شہوت کے ساتھ اچھل کر نکلتا ہے اور اس کے بعد شہوت میں کمی آتی ہے) خارج ہو تو اس صورت میں جب شہوت کے ساتھ نکلے تو غسل فرض ہو جاتا ہے۔ مذی کے بارے میں حدیث میں ہے کہ حضرت علی رضی الله عنه فرماتے ہیں کہ مجھے مذی کی کثرت ہوتی تھی تو میں نے نبی کریم ﷺ سے دریافت کروایا تو آپ ﷺ نے فرمایا کہ اس میں وضو ہے (یعنی غسل نہیں) (صحیح البخاری، م: ١٣٢) والله تعالى أعلم.

(سوال) بچے کا نام "اریاج" رکھنا کیسا ہے؟
(جواب) "اریاج" (أرياج) عربی میں کوئی معروف اچھا معنی رکھنے والا نام نہیں ہے لہذا یہ نام نہ رکھا جائے۔ اریاج یونانی طب میں ایک مرکب دوا کو کہتے ہیں جو معدہ صاف کرنے، اخلاط خارج کرنے اور علاجِ امراضِ بطن میں استعمال ہوتی ہے۔ والله تعالى أعلم.

(سوال) لونگی نیچے کے جانب سے تھوڑا بہت فولڈ رہتی ہے اور کرتا کا کالر بھی فولڈ رہتا ہے، اور کبھی ٹوپی بھی فولڈ ہو جاتی ہے، نیز کالر کا اوپر والا بٹن بھی کبھی کھلا رہ جاتا ہے، تو کیا ان صورتوں میں نماز میں کوئی کراہت یا قباحت لازم آتی ہے؟
(جواب) دوران نماز جسم پر موجود پہنے جانے والے کپڑوں کا خلاف معتاد طور پر مڑا ہوا ہونے میں ضرور کراہت وقباحت ہے جیسے آستین یا پائینچے یا لنگی کا چڑھا ہونا لیکن عموم بلوی کے سبب یہ کراہت تحریمی نہیں ہے جبکہ اس حد تک نہ ہو کہ اس سے توہین نماز سمجھا جا سکے اور اس صورت میں حکم اعادہ بھی نہ ہوگا۔ اسی طرح کرتا کا کالر فولڈ ہونا، ٹوپی کا معمولی سا مڑ جانا یا اوپر والا بٹن کھلا ہونا اگر عام عادت کے مطابق ہو تو اس میں بھی حرج شدید نہیں ہے۔ والله تعالى أعلم.

(سوال) اگر کوئی شخص نمازِ عید میں اس وقت شامل ہو کہ امام پہلی رکعت کی ایک، دو یا تین زائد تکبیریں کہہ چکا ہو، یا رکوع میں جا چکا ہو، تو وہ اپنی چھوٹی ہوئی تکبیریں کس طرح ادا کرے، اور اس کی نماز کا کیا حکم ہوگا؟
(جواب) اگر مقتدی پہلی رکعت میں قیام کی حالت میں امام کے ساتھ شامل ہو اور امام زائد تکبیریں کہہ چکا ہو تو یہ شخص تکبیرِ تحریمہ کے بعد فوراً اپنی رہ جانے والی زائد تکبیریں کہے، اگرچہ امام نے قراءت شروع کر دی ہو، پھر خاموش ہو کر امام کی قراءت سنے۔ اور اگر وہ اس وقت شامل ہو جب امام رکوع میں جا چکا ہو تو اگر اسے غالب گمان ہو کہ قیام میں تکبیریں کہہ کر رکوع میں امام کو پا لے گا تو پہلے قیام میں تکبیریں کہے پھر رکوع کرے، ورنہ سیدھا رکوع میں جا کر بغیر ہاتھ اٹھائے تکبیریں کہے، اور اگر امام رکوع سے اٹھ جائے تو باقی تکبیریں ساقط ہو جائیں گی تاکہ متابعت فوت نہ ہو۔ اور اگر امام کو رکوع سے اٹھنے کے بعد پایا تو اس رکعت کی تکبیریں ادا نہیں کرے گا بلکہ بعد میں اس رکعت کی قضا تکبیروں سمیت کرے گا۔ والله تعالى أعلم.

(سوال) حضرت صاحب شرعی عذر یا بغیر شرعی عذر کے امام کو مسجد سے معزول کرنا کیسا؟
(جواب) اگر امام صحیح العقیدہ، صحیح القراءت، اور شرعی اعتبار سے امامت کا اہل ہو تو اسے بلا وجۂ شرعی معزول کرنا ناجائز اور گناہ ہے، کیونکہ اس میں اہلِ دین کی اہانت اور مسجد کے نظم کو خراب کرنا ہے، نبی کریم ﷺ نے فرمایا: لَيْسَ مِنْ أُمَّتِي مَنْ لَمْ يُجِلَّ كَبِيرَنَا، وَيَرْحَمْ صَغِيرَنَا، وَيَعْرِفْ لِعَالِمِنَا.  یعنی وہ شخص میری امت میں سے نہیں جو ہمارے بڑوں کی تعظیم نہ کرے، ہمارے چھوٹوں پر رحم نہ کرے، اور ہمارے عالم کا حق نہ پہچانے۔ (مسند أحمد، م: ٢٢٧٥٥) البتہ اگر امام میں کوئی شرعی خرابی ہو جیسے بدعقیدگی، فاسقِ معلن ہونا، یا قراءت میں ایسی غلطی جو نماز کو فاسد کر دے یا اس میں کوئی بات ہو جو تخفیف جماعت کا سبب ہو یا لوگ اس سے متنفر ہوں، تو ایسے امام کو معزول کرنا جائز بلکہ بعض صورتوں میں ضروری ہے، اور یہ کام بھی اہلِ اختیار وذمہ دارانِ مسجد باہمی مشورہ اور حکمت کے ساتھ کریں تاکہ فتنہ وفساد پیدا نہ ہو۔ والله تعالى أعلم.

⚡⚡⚡⚡

كتبه: ندیم ابن علیم المصبور العینی

https://t.me/masboor

اشاعت علم کی نیت سے شیر کریں۔ 🌺

699

0

0

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡ متفرق سوالات وجوابات ⚡

(سوال) کیا فرماتے ہیں علماء کرام اس مسئلہ کے بارے میں کہ جس شخص پر زکاۃ فرض نہ ہو ساڑھے باون تولہ چاندی کے نصاب کے اعتبار سے، کیا وہ شرعی فقیر شمار ہوگا اور کیا اسے زکاۃ دی جا سکتی ہے، اگرچہ اس کے پاس مال غیر نامی ہی کیوں نہ ہو؟
(جواب اگر کسی کے پاس حاجتِ اصلیہ سے زائد کوئی بھی مال (خواہ نامی ہو یا غیر نامی) کا نصاب موجود ہو تو اسے زکاۃ دینا جائز نہیں، یہاں تک کہ اگر اس کے پاس ایسا مکان ہو جس میں وہ خود نہ رہتا ہو اور وہ چاندی کے نصاب کے برابر ہو تو بھی وہ مستحقِ زکاۃ نہیں رہے گا، کیونکہ اعتبار اس نصاب کا ہے جو ضروریاتِ اصلیہ سے زائد ہو اور اس کا سونا، چاندی، مال تجارت یا نقد روپیہ ہونا ہی ضروری نہیں ہے، اور یہی نصاب صدقۂ فطر اور قربانی میں بھی معتبر ہے۔ جوہرہ (١٣١/١) میں ہے: (قوله ولا يجوز دفع الزكاة إلى من يملك نصابا من أي مال كان) سواء كان النصاب ناميا أو غير نام حتى لو كان له بيت لا يسكنه يساوي مائتي درهم لا يجوز صرف الزكاة إليه وهذا النصاب المعتبر في وجوب الفطرة والأضحية. والله تعالى أعلم.

(سوال) حضرت یہ دریافت کرنا ہے کہ اگر کوئی شخص رات کو حالتِ جنابت میں سو گیا اور فجر کے بعد بیدار ہوا تو کیا اس کا روزہ صحیح ہوگا؟ نیز اگر کسی شخص کے روزے بیماری کی وجہ سے چھوٹ جائیں تو ان کا حکم کیا ہے، کیا کفارہ لازم ہوگا یا صرف قضا؟
(جواب) اگر کوئی شخص حالتِ جنابت میں سو گیا اور فجر کے بعد بیدار ہوا تو اس کا روزہ بالکل صحیح ہے، کیونکہ جنابت روزے کے صحیح ہونے کے منافی نہیں، چنانچہ نبی کریم ﷺ کے متعلق ام المؤمنین عائشہ رضی الله عنها اور ام سلمہ رضی الله عنها فرماتی ہیں کہ حضور اکرم ﷺ فجر کو اس حال میں پاتے کہ آپ جنبی ہوتے پھر غسل فرماتے اور روزہ رکھتے تھے۔ (صحیح البخاری، م: ١٩٢٦) البتہ غسل میں اتنی تاخیر کرنا کہ نماز قضا ہو جائے گناہ ہے، اس سے بچنا لازم ہے۔ اور اگر کسی کے روزے بیماری کی وجہ سے چھوٹ جائیں تو اس پر کفارہ لازم نہیں بلکہ صرف قضا لازم ہے، جیسا کہ الله تعالیٰ کا ارشاد ہے: فمن كان منكم مريضا أو على سفر فعدة من أيام أخر. یعنی جو بیمار ہو یا سفر میں ہو تو دوسرے دنوں میں گنتی پوری کرے۔ (القرآن الکریم، ١٨٤/٢) والله تعالى أعلم.

(سوال) "خیار امتی من دعا الی الله وحبب عبادہ الیه” کیا یہ الفاظ حدیث ہیں؟
(جواب) ہاں، اسے امام ابن نجار نے اپنی تاریخ میں ابوہریرہ رضى الله عنه روایت کیا ہے جیسا کہ جامع الصغیر میں ہے۔ اور امام ابو نعیم نے حلیہ (١٤٣/٧) میں ابو جعفر جعابی کی سند سے روایت کیا ہے اور ان کے بارے میں کلام کیا گیا ہے، اور اس کی سند میں بعض راوی مجہول الحال ہیں۔ امام ابو نعیم کی روایت میں لفظ "امتی" کی جگہ "الصديقين" ہے۔ اسی طرح امام دیلمی کے الفاظ ہیں۔ (الفردوس، م: ٢٨٧٣) والله تعالى أعلم.

⚡⚡⚡⚡

كتبه: ندیم ابن علیم المصبور العینی

https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡ متفرق سوالات وجوابات ⚡

(سوال) کیا فرماتے ہیں علمائے کرام اس مسئلہ میں کہ ایک شخص غریب مزدور ہے، اس کے پاس ایک چھوٹی سی دکان ہے مگر کاروبار کے لیے سرمایہ نہیں، دکان کرائے پر دی ہوئی ہے جس کا کرایہ ١٢٠٠ روپے ماہانہ ہے، اور گھر میں فریج اور کپڑے دھونے والی مشین بھی ہے، تو کیا ایسے شخص کو زکوٰۃ لینا جائز ہے اور اسے زکوٰۃ دی جا سکتی ہے؟
(جواب) اگر مذکورہ شخص کے پاس نصاب (یعنی ساڑھے باون تولہ چاندی یا اس کی مالیت کے برابر مال) موجود نہیں ہے اور اس کی ملکیت میں ایسی زائد چیزیں بھی نہیں جو ضرورتِ اصلیہ سے بڑھ کر ہوں اور چاندی کے نصاب کی مقدار کو پہنچتی ہوں، تو وہ شرعاً مستحقِ زکوٰۃ شمار ہوگا، لہٰذا اسے زکوٰۃ دینا جائز ہے، کیونکہ معمولی آمدنی (جیسے ١٢٠٠ روپے ماہانہ کرایہ) جو اس کی بنیادی ضروریات کے لیے کافی نہ ہو، اسے غنی نہیں بناتی، اسی طرح فریج اور واشنگ مشین حاجتِ اصلیہ میں داخل ہیں اور ان کی موجودگی زکوٰۃ کے استحقاق کے خلاف نہیں، البتہ اگر اس کے پاس دیگر اموال (نقدی، سونا، چاندی یا زائد سامان) ملا کر نصاب مکمل ہو جائے یا کرایہ کا اتنا روپیہ جمع کر لیا ہو جو ساڑھے باون تولہ چاندی کی قیمت کے برابر ہو تو پھر وہ زکوٰۃ کا مستحق نہیں رہے گا۔ والله تعالى أعلم۔

(سوال) کیا عید کے دن گلے مل سکتے ہیں؟
(جواب) عید کے دن خوشی اور مسرت کے اظہار کے طور پر آپس میں گلے ملنا جائز اور مباح ہے، اس بارے میں شارع سے کوئی ممانعت نہیں آئی۔ والله تعالى أعلم.

(سوال) ایک گھر والوں پر ایک دکاندار کا قرضہ ہے جس سے وہ سودا سلف لیتے تھے، مگر اب وہ تنگی کی وجہ سے قرض ادا نہیں کر سکتے۔ اگر کوئی شخص دکاندار کو یہ قرض ادا کرے اور اسے زکوۃ میں شمار کرے تو کیا اس صورت میں زکوۃ ادا ہو جائے گی؟ نیز کیا اس گھر والوں کو بتانا ضروری ہے کہ یہ زکوۃ کی رقم سے ادا کیا جا رہا ہے؟ جبکہ پہلے ان کو یہ کہا گیا تھا کہ تم رمضان تک سامان لیتے رہو، میں ادائیگی کر دوں گا، اب نیت یہ ہے کہ اسی کو زکوۃ میں شمار کر لیا جائے۔
(جواب) نہیں، فقیر کی طرف سے زکوۃ کے طور پر اس کا قرض ادا کرنے کی صورت میں اسے یہ بتانا ضروری نہیں کہ یہ زکوۃ کی رقم ہے، البتہ یہ بتانا ضروری ہے کہ اس کا قرض ادا کیا جا رہا ہے تاکہ اس کی اجازت حاصل ہو جائے، کیونکہ اجازت کی صورت میں ادا کرنے والا اس کا وکیل بن جاتا ہے اور وکیل کا قبضہ بھی زکوۃ کی ادائیگی میں معتبر ہوتا ہے۔ والله تعالى أعلم۔

(سوال) قبرستان میں ہاتھ اٹھا کر دعا کرنا جائز ہے؟ اور وہاں کیا پڑھنا چاہیے؟
(جواب) جائز ہے۔ قراءت قرآن کے بعد آپ ایصال ثواب اور خیر میت سے متعلق جو دعا چاہیں اپنی مادری زبان میں پڑھ سکتے ہیں۔ والله تعالى أعلم.

⚡⚡⚡⚡

كتبه: ندیم ابن علیم المصبور العینی


https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡ متفرق سوالات وجوابات ⚡

(سوال) مفتی صاحب محترم ایک سوال یہ ہے کہ امام اگر خارجِ صلوٰۃ کسی شخص کا لقمہ قبول کرلیں تو نماز فاسد ہو جاتی ہے، لیکن اگر ایک مقتدی نماز میں امام کے ساتھ شریک ہو اور درمیانِ نماز اس کا وضو ٹوٹ جائے، پھر وضو ٹوٹنے کے بعد وہ امام کو لقمہ دے اور امام اس لقمہ کو قبول بھی کرلے تو اس نماز کا کیا حکم ہے؟
(جواب) اس کی نماز باطل ہوجائے گی۔ والله تعالى أعلم.

(سوال) ایک شخص نے افغانستان کے ساتھ روزہ رکھا تھا تو وہ عید افغانستان کے ساتھ کرے یا پاکستان کے ساتھ؟
(جواب) جس ملک میں آدمی موجود ہو وہیں کی رؤیت اور شرعی اعلان کے مطابق روزہ رکھے اور عید کرے، اگرچہ اس نے روزہ کسی دوسرے ملک کے حساب سے شروع کیا ہو؛ لہذا اگر وہ شخص اس وقت پاکستان میں ہے تو اسے پاکستان کے اعلان کے مطابق عید کرنی ہوگی، اور اگر افغانستان میں ہے تو افغانستان کے مطابق۔ والله تعالى أعلم.

(سوال) کیا محمد عیسیٰ نام رکھ سکتے ہیں؟
(جواب) محمد عیسیٰ نام رکھنا بالکل جائز بلکہ اچھا اور بابرکت ہے۔ والله تعالى أعلم.

(سوال) کیا فرماتے ہیں علمائے دین اور مفتیان عظام مسئلہ ذیل کے بارے میں کہ رمضان میں ختمِ قرآن پر حافظ صاحب کو پھول کا ہار پہنانا یا پیسوں کا ہار پہنانا یا حافظ صاحب کا تراویح کے لیے پیسہ مقرر کرنا کیسا ہے؟ براہِ مہربانی مدلل و مفصل جواب ارسال کریں۔
(جواب) پیسوں کا ہار پہنانا مناسب نہیں ہے، ہاں، پھولوں کا ہار پہنانا جائز ہے۔ والله تعالى أعلم.

(سوال) مفتیانِ عظام وعلماءِ کرام! ایک مسئلہ معلوم کرنا ہے: ایک شخص اپنی صاحبِ نصاب بیوی کی طرف سے زکوٰة ادا کرتا ہے اور اس شخص کی والدہ خود زکوٰة کی مستحق ہے۔ اس آدمی نے اپنے بھائی کو تین ہزار روپے ویسے ہی خرچ کے لیے دینے چاہے، لیکن چھوٹے بھائی نے لینے سے منع کر دیا، تو بڑے بھائی نے فوراً بیوی کی طرف سے تین ہزار زکوٰة کی نیت کرتے ہوئے کہا کہ یہ پیسے والدہ کو دے دینا۔ تو کیا اس طرح دینے سے بیوی کی طرف سے زکوٰة ادا ہو جائے گی یا نہیں؟ جبکہ بیوی کے علم میں پہلے سے ہے کہ میرے شوہر میری زکوٰة نکالتے رہتے ہیں۔ نیز کیا ہر مرتبہ زکوٰة نکالتے وقت بیوی کو الگ سے اطلاع کرنا ضروری ہے یا نہیں؟
(جواب) اگر بیوی نے اپنے شوہر کو اپنی زکوة ادا کرنے کی اجازت دے رکھی ہے، خواہ صراحتاً یا عرفاً (یعنی عام طور پر وہ اس پر راضی ہے اور شوہر اس کی طرف سے زکوٰة ادا کرتا رہتا ہے)، تو شوہر کا اس کی طرف سے زکوٰة ادا کرنا درست ہے، اور ایسی صورت میں بھائی کو یہ کہہ کر دینا کہ یہ رقم والدہ کو پہنچا دے، اگر واقعی وہ رقم والدہ تک پہنچ گئی اور والدہ شرعاً مستحقِ زکوٰة ہیں تو بیوی کی زکوٰة ادا ہو جائے گی؛ کیونکہ زکوة کی ادائیگی میں اصل اعتبار تملیک (یعنی مستحق کو مالک بنانا) کا ہے، اور وہ یہاں حاصل ہوگیا البتہ اگر بیوی کی طرف سے کوئی اجازت نہ ہو تو شوہر کی طرف سے زکوٰة ادا کرنا کافی نہیں ہوگا، اس صورت میں بیوی کی زکوٰة ادا نہیں ہوگی۔ نیز ہر مرتبہ الگ سے اجازت لینا ضروری نہیں، اگر ایک عمومی اجازت پہلے سے موجود ہو تو وہ کافی ہے۔ والله تعالى أعلم۔۔

(سوال) ایک شخص کو کسی کمپنی نے بینک اکاؤنٹ کھولنے کی آئی ڈی دی ہے، اب وہ کمپنی اس شخص کو ایک کھاتا کھولنے پر ٢٥ روپیہ کمیشن دیتی ہے، پھر وہ شخص جس کو آئی ڈی ملی ہے وہ کسٹمر سے بھی ١٠٠ یا ٢٠٠ روپیہ لیتا ہے (اور کمپنی کی طرف سے اس طرح کی کوئی شرط بھی نہیں ہے کہ آپ صرف یہی کمیشن لے سکتے ہیں، اس کے علاوہ کسٹمر سے کوئی چارج نہیں لے سکتے) تو کیا اس شخص کا اس طرح آئی ڈی لے کر کھاتا کھولنا صحیح ہے؟ نیز اگر کسٹمر سے اوپر کا چارج نہ لے تو اس صورت میں مسئلے کا کیا حکم ہے؟
(جواب) اگر یہ شخص حقیقت میں ایک جائز خدمت انجام دے رہا ہے، جیسے فارم بھرنا، دستاویزات کی رہنمائی، آن لائن پراسیسنگ وغیرہ، اور وہ کسٹمر کو واضح طور پر بتا دے کہ وہ اپنی خدمت کے عوض اتنی اتنی فیس لے رہا ہے، تو اس صورت میں باہمی رضامندی کے ساتھ اضافی رقم لینا جائز ہے۔ تاہم اگر وہ یہ ظاہر کرے کہ یہ فیس کمپنی یا بینک کی لازمی فیس ہے یا حقیقت چھپا کر رقم لے، تو یہ دھوکہ ہوگا اور ناجائز ہے۔ اور اگر وہ کسٹمر سے کوئی اضافی رقم نہ لے بلکہ صرف کمپنی کا کمیشن لے تو یہ جائز ہے۔ والله تعالى أعلم۔

⚡⚡⚡⚡

كتبه: ندیم ابن علیم المصبور العینی


https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡ حقوق العباد ⚡

(سوال) قرآن مجید میں ایسی کوئی آیت ہے جس میں فرمایا گیا ہو کہ الله تعالیٰ حقوق العباد معاف نہیں کرتا؟
(جواب) قرآن مجید صراحت کے ساتھ اس کا بیان موجود نہیں ہے البتہ احادیثِ مبارکہ سے یہ بات ثابت ہے کہ حقوق العباد کا معاملہ بندوں کے درمیان ہے اور جب تک صاحبِ حق خود معاف نہ کرے یا اس کا حق ادا نہ کیا جائے، معاملہ باقی رہتا ہے؛ چنانچہ قیامت کے دن حقوق کی ادائیگی نیکیوں اور گناہوں کے تبادلہ کے ذریعے ہوگی، حضرت ابو ہریرہ رضی الله عنه سے روایت ہے کہ رسول الله ﷺ نے فرمایا: کیا تم جانتے ہو مفلس کون ہے؟ صحابہ کرام رضی الله عنہم نے عرض کیا: ہمارے نزدیک مفلس وہ ہے جس کے پاس نہ درہم ہو نہ کوئی سامان۔ تو آپ ﷺ نے فرمایا: “میری امت میں مفلس وہ ہے جو قیامت کے دن نماز، روزہ اور زکوٰۃ لے کر آئے گا، مگر اس نے کسی کو گالی دی ہوگی، کسی پر تہمت لگائی ہوگی، کسی کا مال کھایا ہوگا، کسی کا خون بہایا ہوگا اور کسی کو مارا ہوگا، تو اس کی نیکیاں ان لوگوں کو دے دی جائیں گی، پھر اگر اس کی نیکیاں ختم ہو جائیں گی اس سے پہلے کہ ان کے حقوق پورے ہوں تو ان کے گناہ لے کر اس پر ڈال دیے جائیں گے، پھر اسے جہنم میں ڈال دیا جائے گا۔ (صحیح مسلم، م: ٢٥٨١) اور فرمایا: فرمایا: من كانت له مظلمة لأخيه من عرضه أو شيء فليتحلله منه اليوم قبل أن لا يكون دينار ولا درهم، إن كان له عمل صالح أخذ منه بقدر مظلمته، وإن لم تكن له حسنات أخذ من سيئات صاحبه فحمل عليه. (صحیح البخاری، م: ٢٤٤٩) جس شخص کے ذمے اپنے بھائی کا کوئی حق ہو، چاہے اس کی عزت سے متعلق ہو یا کسی اور چیز سے، اسے چاہیے کہ آج ہی اس سے معاف کرا لے، اس سے پہلے کہ وہ دن آئے جس میں نہ دینار ہوگا نہ درہم؛ اگر اس کے پاس نیکیاں ہوں گی تو اس کی زیادتی کے بقدر اس سے لے لی جائیں گی، اور اگر اس کے پاس نیکیاں نہ ہوں گی تو صاحبِ حق کے گناہ لے کر اس پر ڈال دیے جائیں گے۔ اور فرمایا: الدواوين عند الله عز وجل ثلاثة: ديوان لا يعبأ الله به شيئا، وديوان لا يترك الله منه شيئا، وديوان لا يغفره الله، فأما الديوان الذي لا يغفره الله: فالشرك بالله، قال الله عز وجل ﴿إنه من يشرك بالله، فقد حرم الله عليه الجنة﴾ وأما الديوان الذي لا يعبأ الله به شيئا: فظلم العبد نفسه فيما بينه وبين ربه من صوم يوم تركه، أو صلاة تركها، فإن الله عز وجل يغفر ذلك ويتجاوز إن شاء، وأما الديوان الذي لا يترك الله منه شيئا: فظلم العباد بعضهم بعضا، القصاص لا محالة. یعنی الله عزوجل کے نزدیک اعمال کے تین دفتر ہیں: ایک وہ دفتر ہے جس کی الله تعالیٰ کچھ بھی پرواہ نہیں فرماتا، ایک وہ دفتر ہے جس میں سے الله تعالیٰ کچھ بھی نہیں چھوڑے گا، اور ایک وہ دفتر ہے جسے الله تعالیٰ ہرگز معاف نہیں فرمائے گا۔ پس وہ دفتر جسے الله تعالیٰ معاف نہیں فرمائے گا وہ شرک ہے، یعنی الله کے ساتھ کسی کو شریک ٹھہرانا؛ الله تعالیٰ نے فرمایا: ﴿بے شک جو الله کے ساتھ شریک ٹھہراتا ہے، الله نے اس پر جنت حرام کر دی ہے﴾۔ اور وہ دفتر جس کی الله تعالیٰ کچھ پرواہ نہیں فرماتا وہ بندے کا اپنے اور اپنے رب کے درمیان ظلم کرنا ہے، جیسے کوئی روزہ چھوڑ دینا یا کوئی نماز ترک کر دینا، تو بے شک الله تعالیٰ چاہے تو اسے معاف فرما دیتا ہے اور درگزر کرتا ہے۔ اور وہ دفتر جس میں سے الله تعالیٰ کچھ بھی نہیں چھوڑے گا وہ بندوں کا آپس میں ایک دوسرے پر ظلم کرنا ہے، اس میں لازماً بدلہ لیا جائے گا۔ (مسند أحمد، م: ٢٦٠٣١؛ المستدرك، م: ٨٧١٧) البتہ الله تعالی اپنے خاص فضل سے بعض بندوں کی طرف سے حقوق العباد اپنے ذمۂ کرم پر لے لیتا ہے جیسا کہ احادیث مبارکہ میں آیا ہے: (١) وہ حاجی جو اخلاص، حلال مال اور گناہوں سے بچتے ہوئے حج کرے، پھر فوراً وفات پا جائے اور حقوق ادا کرنے کی مہلت نہ پائے، (٢) شہیدِ بحر جو خالص الله کی رضا کے لیے جہاد کرتے ہوئے سمندر میں شہید ہو، (٣) شہیدِ صبر یعنی وہ مظلوم مسلمان جو بے بسی میں ناحق قتل کیا جائے، (٤) وہ مقروض جس نے جائز ضرورت کے لیے قرض لیا، ادا کرنے کی پوری کوشش کی مگر مجبوری سے ادا نہ کر سکا اور وفات پا گیا وغیرہ؛ ان صورتوں میں الله تعالیٰ اپنے فضل سے اصحابِ حقوق کو راضی فرما کر ان کے مطالبات ختم کرا دیتا ہے، لیکن اس کا مطلب یہ نہیں کہ حقوق العباد کی ادائیگی ساقط ہو گئی، بلکہ یہ الله تعالیٰ کا خاص فضل اور استثنائی معاملہ ہے۔ والله تعالى أعلم.

⚡⚡⚡⚡

كتبه: ندیم ابن علیم المصبور العینی

https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡ متفرق سوالات وجوابات ⚡

(سوال) کیا فرماتے ہیں علماء دین اس مسئلے میں کہ: يا أنس أكثر من الأصدقاء فإنكم شفعاء بعضكم في بعض. (الزیادات، ص ٧٥٢، ر: ٩٣٣) کیا یہ روایت موضوع ہے جبکہ اس میں کوئی متہم بالکذب بھی نہیں، جبکہ امام سیوطی رحمه نے اس کو موضوعات میں درج کر دیا؟
(جواب) زیادات میں امام دیلمی کی طرف منسوب کیا ہے اور اس حدیث کی سند میں ایک راوی محمد بن نضر ہے جس کے بارے میں فرمایا کہ وہ ثقہ نہیں ہے۔ لیکن عبد الخالق بن أسد نے اپنی معجم (ص: ١٦٩) میں ایک دوسری سند سے روایت کیا اور علامہ جوزی نے بھی کتاب المسلسلات میں اور خود امام سیوطی نے بغية الوعاة (٤٢٣/٢) میں اس حدیث کی ایک دوسرے طریق کا بھی ذکر کیا ہے جس میں ابو عبد الله الحسين بن علی بن يزيد رفاعی نے اس راوی کی متابعت بھی کی ہے لہذا یہ سند کے اعتبار سے موضوع نہیں ہے، البتہ بعض علتیں امام سیوطی پر ظاہر ہوئی ہوں گی جس کے سبب انہوں نے اسے موضوع فرمایا اور ان علتوں پر ہم آگاہ نہ ہوسکے۔ پھر حضرت انس رضى الله عنه سے ہی ایک دوسرے تابعی سے ان الفاظ میں مروی ہے: استكثروا من الإخوان، فإن لكل مؤمن شفاعة. جامع الصغیر میں اسے ابن النجار کی تاریخ کی طرف منسوب کیا اور اس پر ضعف کا رمز لگایا اور ذہبی نے إثبات الشفاعة (ص: ٥٥) میں جابر رضى الله عنه کی روایت سے ذکر کرکے اس کی سند کو جید بتایا۔ امام سیوطی نے انس رضى الله عنه سے ہی زیادات میں امام حاکم کی تاریخ سے اس حدیث کو ان الفاظ میں ذکر کیا: أكثروا مِن المعارف مِن المؤمنين، فإنّ لكل مؤمن شفاعة عند الله يوم القيامة. اور فرمایا اس میں أصرم بن حوشب کذاب ہے۔ والله تعالى أعلم.

(سوال) اگر جمعہ کے دن عید آ جائے تو عید کی نماز کا کیا حکم ہے؟
(جواب) جب عید کا دن جمعہ کے دن آ جائے تو عید کی نماز بدستور واجب رہتی ہے اور اسے ادا کرنا بھی ضروری ہے۔ والله تعالى أعلم.

(سوال) جو بہنیں بے اولاد ہیں وہ کون سا وظیفہ کریں؟
(جواب)اولاد کے لیے میاں بیوی دونوں اہتمام سے یہ دعا پڑھیں: رَبِّ هَبْ لِي مِنْ لَدُنْكَ ذُرِّيَّةً طَيِّبَةً إِنَّكَ سَمِيعُ الدُّعَاءِ (القرآن الکریم، ٣٨/٢)، اور کثرت سے استغفار کریں، نیز سورہ الانبیاء کی دعا “رَبِّ لَا تَذَرْنِي فَرْدًا وَأَنْتَ خَيْرُ الْوَارِثِينَ” (القرآن الکریم، ٨٩/٢١) پڑھنا بھی مجرب ہے؛ ان کے ساتھ ساتھ اولاد کے لیے طبی معائنہ وعلاج جیسے جائز اسباب اختیار کرنا بھی ضروری ہے، اور گناہوں سے بچتے ہوئے صدقہ و خیرات کا اہتمام رکھا جائے، ان شاء الله بہتری ہوگی۔ والله تعالى أعلم

(سوال) زید کسی مدرسے کا محصل ہے، اس کی بیوی کہتی ہے کہ میرے زیورات کی زکوٰۃ آپ اپنے روپے سے ادا کر دیجیے، چنانچہ زید نے وہ زکوٰۃ مدرسے میں دے دی، پھر مدرسے کے عالم/پرنسپل صاحب حیلۂ شرعی کے بعد زید محصل کو بطورِ خدمت یا اجرت ٥٠ فیصد تک دے دیتے ہیں، تو کیا از روئے شرع ایسا کرنا صحیح ہے؟ کیا زید کی بیوی کی زکوٰۃ ادا ہوگئی؟ واضح ہو کہ زید مستقل محصل نہیں بلکہ رمضان میں چندہ وغیرہ کرتا ہے۔
(جواب) ایسا کرنے کے باوجود بھی بیوی کی زکوۃ ادا ہوجائے گی بشرطیکہ حیلہ صحیح طور پر ہوا ہو یعنی اس مال کا مالک کسی فقیر کو کیا گیا ہو پھر اس نے قبضہ میں لینے کے بعد وہ رقم اپنی خوشی سے پرنسپل یا محصل کو دے دی ہو۔ اس میں چند باتوں کا لحاظ ضروری ہے: (١) بغیر دینی ضرورت کے حیلہ کرنا مکروہ ہے اور دینی کام کے لیے بھی حیلہ کیا جائے تو یہ رقم اس عین ضرورت میں صرف کی جائے گی جس سے ثواب کا قصد کیا جاتا ہے جیسے مسجد یا قبرستان بنوانا اور دیگر دینی مصالح (٢) اس رقم سے کوئی ذمہ پورا کرنا مکروہ ہے جیسے کسی فرد کو اگرچہ مذہبی ہو انعام یا زائد وظیفے کے طور دینا یا اس کا قرضہ اتارنا۔ (٣) اسی طرح کسی اضافی غیر ضروری کام میں لگانا بھی مکروہ ہے جیسے عرس، محافل حمد ونعت، وغیرہ۔ والله تعالى أعلم

⚡⚡⚡⚡

كتبه: ندیم ابن علیم المصبور العینی

https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡متفرق سوالات وجوابات ⚡

(سوال) کیا بدعقیدہ شخص کی نماز قبول نہ ہونے کے بارے میں کوئی حدیث موجود ہے؟
(جواب) اگر کسی شخص کا عقیدہ ایسا ہو جو اسلام کے بنیادی عقائد کے خلاف اور کفر تک پہنچانے والا ہو تو اس کی عبادات بالکل قبول نہیں ہوتیں، کیونکہ کافر کی کوئی عبادت قبول نہیں ہوتی۔ الله تعالیٰ ارشاد فرماتا ہے: وَمَن يَكْفُرْ بِالْإِيمَانِ فَقَدْ حَبِطَ عَمَلُهُ یعنی جو ایمان کا انکار کرے اس کے اعمال ضائع ہو جاتے ہیں (القرآن الکریم، ٥/٥)۔ اسی طرح فرمایا: وَقَدِمْنَا إِلَىٰ مَا عَمِلُوا مِنْ عَمَلٍ فَجَعَلْنَاهُ هَبَاءً مَّنثُورًا یعنی ہم ان کے اعمال کی طرف متوجہ ہوں گے تو انہیں اڑتی ہوئی دھول بنا دیں گے۔ (القرآن الکریم، ٢٣/٢٥)۔ البتہ اگر کوئی شخص مسلمان ہے لیکن اس کے بعض عقائد بدعت یا گمراہی پر مبنی ہیں مگر حدِ کفر تک نہیں پہنچتے تو اس کی نماز اصولاً ادا ہو جاتی ہے، تاہم اس کا گناہ اور بدعقیدگی اپنی جگہ باقی رہتی ہے۔ والله تعالى أعلم۔

(سوال) نوکری کے طور پر ایک امام صاحب کو مسجد میں نماز پڑھانے اور مدرسہ میں پڑھانے کے لیے رکھا گیا، لیکن اب وہ صرف نماز پڑھاتے ہیں اور مدرسہ میں نہیں پڑھاتے، حالانکہ بات یہ ہوئی تھی کہ وہ نماز بھی پڑھائیں گے اور مدرسہ میں بھی پڑھائیں گے، تو ایسی صورت میں ان کا تنخواہ لینا کیسا ہے؟
(جواب) اگر امام صاحب کو جس وقت مقرر کیا گیا تھا اس وقت یہ طے ہوا تھا کہ وہ مسجد میں امامت کے ساتھ مدرسہ میں بھی تدریس کریں گے اور اسی مجموعی کام کے بدلے تنخواہ مقرر ہوئی تھی، تو ایسی صورت میں صرف امامت کرنا اور مدرسہ میں نہ پڑھانا معاہدہ کی خلاف ورزی ہے، اس لیے پوری تنخواہ لینا درست نہیں ہوگا، بلکہ جتنا کام کیا ہے اسی کے مطابق اجرت کے مستحق ہوں گے، اور باقی ذمہ داری ادا نہ کرنے کی صورت میں پوری تنخواہ لینا شرعاً جائز نہیں، البتہ اگر مسجد کی انتظامیہ نے بعد میں مدرسہ کی تدریس کی شرط معاف کر دی ہو یا باہمی رضامندی سے یہ طے ہوگیا ہو کہ اب صرف امامت ہی کریں گے اور اسی خدمت کے عوض کل تنخواہ دی جائے گی تو پھر پوری تنخواہ لینا جائز ہوگا کیونکہ معاملات اجرت وملازمت میں اصل اعتبار باہمی شرط اور رضامندی کا ہوتا ہے۔ والله تعالى أعلم۔

(سوال) مسجد کے چندے سے تراویح پڑھانے والے حافظ یا امام کو اجرت دینا کیسا ہے؟
(جواب) مسجد کا چندہ عموماً مسجد کے عمومی اخراجات جیسے تعمیر، صفائی اور امام ومؤذن کے وظائف وغیرہ کے لیے ہوتا ہے، اس لیے مسجد کے چندے سے تراویح پڑھانے والے حافظ یا امام کو عرف کے مطابق تنخواہ دینا جائز ہے، البتہ اگر عرف سے ہٹ کر بہت زیادہ تنخواہ مقرر کی جائے تو مسجد کے مال سے اس قدر زائد دینا اور اس کا لینا جائز نہیں۔ والله تعالى أعلم۔

(سوال) کیا ساس اپنے داماد کو زکوٰۃ دے سکتی ہے؟
(جواب) ہاں، جبکہ داماد شرعاً مستحقِ زکوٰۃ ہو۔ والله تعالى أعلم

⚡⚡⚡⚡

كتبه: ندیم ابن علیم المصبور العینی


https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡ متفرق سوالات وجوابات ⚡

(سوال) کسی شخص نے چار رکعات صلاة التسبیح کی نیت سے نماز شروع کی، پھر تیسری رکعت چل رہی تھی کہ زوالِ عرفی کا وقت ہو گیا تو اس نے تیسری رکعت پر سلام پھیر دی۔ اب اس کو صلاة التسبیح ہی کی قضا کرنی ہوگی یا مطلق نفل کی؟ نیز کتنی رکعات کی قضا کرنی ہوگی، دو یا چار؟
(جواب) اگر دو پر بقدر تشہد قعدہ کیا تھا تو دو رکعت قضا پڑھے گا ورنہ چار اور صلاۃ التسبیح کی نیت ضروری نہیں ہے، مطلق نفل کی نیت کافی ہے۔ والله تعالى أعلم.

(سوال) ایک شخص نے ١٤ مارچ کو بعدِ نمازِ فجر تقریباً ٢٠٠٠ کلومیٹر کے سفر کا آغاز کیا اور اس کا ارادہ ہے کہ وہ ٢٩ مارچ کو مغرب سے پہلے اپنے گھر واپس پہنچ جائے گا۔ اس دوران ١٤ مارچ کے مغرب سے ٢٩ مارچ کی فجر تک ایک ہی جگہ قیام ہے۔ کیا اس حالت میں قصر کرنا ہوگا یا پوری نماز پڑھنی ہوگی؟ اور تراویح کا کیا حکم ہے؟
(جواب) صورتِ مسئولہ میں ١٤ مارچ کے مغرب سے ٢٩ مارچ کی فجر تک کا زمانہ پورے پندرہ دن نہیں بنتا بلکہ اس سے کم ہے، اس لیے وہاں قیام کرنے والا شخص شرعاً مسافر ہی شمار ہوگا، لہٰذا چار رکعت والی فرض نمازوں میں قصر کرے گا یعنی دو رکعت پڑھے گا۔ البتہ تراویح مسافر بھی پوری پڑھتا ہے، اس میں قصر نہیں ہوتا، لہٰذا رمضان میں تراویح کی بیس رکعت ادا کی جائیں گی۔ والله تعالى أعلم۔

(سوال) ایک کیب ڈرائیور کو بعض ایسے علاقوں میں جانا پڑتا ہے جہاں مسجد نہیں ہوتی اور کھلی جگہ میں نماز پڑھنے میں خوف یا اندیشہ ہوتا ہے، اس لیے وہ مجبوری میں گاڑی کے اندر بیٹھ کر نماز پڑھ لیتا ہے۔ کیا ایسا کرنا درست ہے؟
(جواب) فرض نماز کھڑے ہو کر پڑھنا ضروری ہے، گاڑی میں بیٹھ کر فرض نماز ادا نہیں ہوگی۔ البتہ اگر واقعی خوف یا ضرر کا اندیشہ ہو اور گاڑی سے اتر کر نماز پڑھنا ممکن نہ ہو تو ایسی مجبوری میں گاڑی کے اندر بقدرِ استطاعت نماز پڑھ لینا جائز ہے لیکن بعد میں کھڑے ہوکر ان نمازوں کا اعادہ کرنا ضروری ہوگا۔ والله تعالى أعلم.

(سوال) اگر کوئی شخص اپنا مال اپنی نابالغ اولاد کو دے دے تو کیا اس شخص پر زکوٰۃ ادا کرنا واجب ہے؟
(جواب) اگر کسی شخص نے اپنا مال اپنی نابالغ اولاد کو قبضہ میں دے کر ان کو اس کا مالک بنا دیا ہو تو اس مال کی زکوٰۃ اس شخص پر واجب نہیں رہتی، کیونکہ وہ اس کی ملکیت سے نکل چکا ہوتا ہے۔ البتہ اگر مال حقیقت میں اپنی ہی ملک پر رکھا ہو اور صرف بچوں کے استعمال کے لئے دیا گیا ہو، جیسے نابالغ لڑکیوں کے لئے زیور بنوا دیا مگر انہیں باقاعدہ مالک نہ کیا بلکہ اپنی ہی ملک میں رکھا اور صرف ان کے پہننے میں آتا ہے، اگرچہ نیت یہ ہو کہ شادی کے وقت جہیز میں دے دیں گے، تو اس صورت میں وہ زیور والدین ہی کی ملک شمار ہوگا؛ لہٰذا اگر وہ زیور ان کے دوسرے مال کے ساتھ مل کر نصاب کو پہنچ جائے تو اسی مالک پر اس کی زکوٰۃ واجب ہوگی۔ اور اگر وہ زیور حقیقتاً نابالغ لڑکیوں کی ملک کر دیا گیا ہو تو پھر اس کی زکوٰۃ کسی پر واجب نہیں، والدین پر اس لئے نہیں کہ وہ ان کی ملک نہیں رہا، اور لڑکیوں پر اس لئے نہیں کہ وہ نابالغ ہیں، چنانچہ جب وہ بالغ ہوں گی تب سے ان پر زکوٰۃ وغیرہ کے احکام جاری ہوں گے۔ (فتاوی رضویہ، ١٤٩/١٠) والله تعالى أعلم۔

(سوال) زید جو حافظِ قرآن ہے رمضان المبارک میں تراویح میں قرآن سناتا ہے، مگر وہ صحیح سالم اور تندرست ہونے کے باوجود بلا عذرِ شرعی علانیہ فرض روزہ چھوڑ دیتا ہے، حالانکہ روزہ فرض اور تراویح سنت ہے، تو ایسے حافظ کے پیچھے نمازِ تراویح ادا کرنا شرعاً کیسا ہے؟ اور جو تراویح اس کے پیچھے ادا کر لی گئی ہوں ان کا کیا حکم ہے؟
(جواب) رمضان المبارک کے روزے اسلام کے اہم فرائض میں سے ہیں اور بلا عذرِ شرعی جان بوجھ کر روزہ چھوڑ دینا سخت گناہ اور فسق ہے، الله تعالى کا ارشاد ہے: يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ (القرآن الکریم، ٢/١٨٣)، اور رسول الله ﷺ نے فرمایا: من أفطر يوما من رمضان من غير رخصة ولا مرض لم يقض عنه صوم الدهر كله وإن صامه یعنی جس نے بغیر عذر اور بیماری کے رمضان کا ایک روزہ چھوڑ دیا تو اگرچہ وہ ساری عمر روزے رکھے اس کا بدل نہیں ہوسکتا (سنن الترمذی، م: ٧٢٣)۔ لہٰذا جو شخص علانیہ فرض روزہ ترک کرے وہ فاسقِ معلن ہے، فاسق کو امام بنانا مکروہِ تحریمی اور اس کے پیچھے نماز واجب الاعادہ ہوتی ہے لیکن چونکہ تراویح کی قضا نہیں ہوتی، وقت کے بعد اس کا اعادہ بھی لازم نہ ہوگا۔ والله تعالى أعلم.

⚡⚡⚡⚡

كتبه: ندیم ابن علیم المصبور العینی


https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡متفرق سوالات وجوابات ⚡

(سوال) کیا فرماتے ہیں علماء دین اس بارے میں کہ زید کے پاس (١٢٢٤٠٠) تقریباً ایک لاکھ بائیس ہزار چار سو روپے نقد ہیں اور ایک تولہ سونا بھی ہے، کیا زید پر زکوٰۃ واجب ہے یا نہیں؟
(جواب) ایک قمری سال گزر چکا ہوتو اس کی زکوۃ واجب ہے کیونکہ ان کی مجموعی چاندی کے نصاب یا ٦٥٣ گرام ١٨٤ ملی گرام چاندی سے زیادہ ہے۔ ہا‌ں، اگر اس پر قرض بھی ہو جسے اس مجموعہ قیمت سے منہا کرنے کے بعد چاندی کے نصاب بھر باقی نہ بچے گا تو زکوۃ واجب نہیں ہے۔ والله تعالى أعلم.

(سوال) کیا فرماتے ہیں علماء دین اس مسئلے میں کہ کسی حدیث میں ایسا راوی منفرد ہو جس کو محدثین نے "لیس بثقة"،" لم یکن بثقة"، "مجمع علی ترکه" یا "لا یکتب حدیثه" کہا ہو تو کیا اس کی روایت موضوع شمار ہوگی؟
(جواب) نہیں، جرح کے ان کلمات سے روایت کا موضوع ہونا یقینی نہیں ہوتا۔ والله تعالى أعلم.

(السؤال) أرسل شخص مالا إلى شخص آخر عبر إيزي بايسا، ولكن هذا المال لم يصل إلى ذلك الشخص حتى الآن، فهل يعد فدية الصيام مؤداة في هذه الحالة أم لا؟
(الجواب) فدية الصيام لا تعد مؤداة إلا إذا ملكها الفقير وقبضها، لأن المقصود تمليك الفقير للمال، فإذا أرسل المال عبر "إيزي بايسا" ولم يصل بعد إلى الفقير ولم يدخل في حسابه بحيث يتمكن من قبضه والتصرف فيه فلا تعد الفدية مؤداة، فإذا وصل المال إلى حسابه وصار في قبضته حينئذ تعد الفدية مؤداة. والله تعالى أعلم۔

(سوال) کیا فرماتے ہیں مفتیان کرام مسئلہ ذیل کے بارے میں کہ تراویح میں بسم الله کا کیا حکم ہے، بسم الله سری آواز میں پڑھنا ہے یا جہری آواز میں؟ اگر جہری آواز میں پڑھنا ہو اور پورے تراویح میں کسی بھی سورت کے شروع میں جہری آواز میں بسم الله نہیں پڑھی تو اب کیا حکم ہوگا، آیا قرآن مکمل ہو جائے گا یا اب جو سورت تراویح میں پڑھی جائے اس میں پڑھ لینے سے بات بن جائے گی؟
(جواب) نمازِ تراویح سمیت تمام جہری نمازوں میں بسم الله الرحمٰن الرحیم آہستہ آواز سے پڑھنا سنت ہے۔ والله تعالى أعلم.

(سوال) ایک آدمی کے پاس تیرہ لاکھ روپے کی گاڑی ہے جس پر وہ مزدوری کرتا ہے اور اس گاڑی پر تین لاکھ روپے قرض بھی ہے، تو کیا اس شخص پر زکوۃ واجب ہے یا نہیں؟
(جواب) جو گاڑی تجارت کے علاوہ کسی کام جیسے اپنی ذاتی استعمال یا کمائی کے لیے خریدی گئی ہو اس پر زکوۃ واجب نہیں ہوتی۔ لہذا اگر اس شخص کے پاس اس کے علاوہ اتنی نقد رقم، سونا چاندی یا مال تجارت موجود نہیں جو قرض منہا کرنے کے بعد نصاب کو پہنچ جائے، تو اس پر زکوۃ واجب نہیں ہوگی۔ والله تعالى أعلم.

(سوال) ایک آدمی اگر کاغذ پر تین مرتبہ طلاق لکھ کر اس پر دستخط کر دے تو کیا اس سے طلاق واقع ہو جائے گی یا نہیں؟
(جواب) طلاق صرف زبان سے کہنا ہی معتبر نہیں بلکہ لکھ کر دینا بھی شرعاً طلاق شمار ہوتا ہے لہذا اگر شوہر نے اپنی بیوی کو طلاق دینے کی نیت سے کاغذ پر لکھوایا کہ میں اپنی اس بیوی کو طلاق دیتا ہوں پھر اس پر دستخط کر دیے، تو اس سے طلاق واقع ہو جاتی ہے۔ والله أعلم.

(سوال) کیا فرماتے ہیں علمائے کرام اس مسئلہ میں کہ آج کے جدید دور میں اگر کوئی شخص اپنی زکوٰۃ، فطرہ یا صدقہ موبائل کے ذریعے کسی مستحق کے اکاؤنٹ میں بھیج دے تو کیا اس طرح زکوٰۃ و فطرہ ادا ہو جائے گا اور کیا مستحق اس کا مالک بن جائے گا؟
(جواب) زکوٰۃ، صدقۂ فطر اور دیگر صدقات کی ادائیگی کے لیے اصل شرط یہ ہے کہ مال مستحقِ زکوٰۃ کو اس طرح دیا جائے کہ وہ اس کا مالک بن جائے (تملیک)، لہٰذا اگر کسی مستحق شخص کے بینک اکاؤنٹ یا موبائل والٹ میں رقم منتقل کر دی جائے اور وہ رقم اس کے اختیار میں آ جائے تو شرعاً زکوٰۃ، فطرہ یا صدقہ ادا ہو جائے گا اور وہ شخص اس کا مالک بھی بن جائے گا، کیونکہ مقصود تملیک ہے اور یہ مقصد اس صورت میں حاصل ہو جاتا ہے۔ البتہ یہ ضروری ہے کہ رقم واقعی مستحقِ زکوٰۃ کے اکاؤنٹ میں جائے، کسی ایسے ادارے یا شخص کے اکاؤنٹ میں نہ بھیجی جائے جو صرف واسطہ ہو مگر مستحق تک پہنچانے کی ضمانت نہ ہو، کیونکہ زکوٰۃ کی ادائیگی اس وقت مکمل ہوتی ہے جب مستحق کو اس کی ملکیت حاصل ہو جائے۔ والله تعالى أعلم۔

(سوال) کیا فرماتے ہیں علمائے کرام اس مسئلہ میں کہ آج کے جدید دور میں اگر کوئی شخص اپنی زکوۃ، فطرہ یا صدقہ موبائل کے ذریعے کسی مستحق کے اکاؤنٹ میں بھیج دے تو کیا اس طرح زکوۃ وفطرہ ادا ہو جائے گا اور کیا مستحق اس کا مالک بن جائے گا؟
(جواب) کسی مستحق شخص کے بینک اکاؤنٹ یا موبائل والٹ میں رقم منتقل کرنا جبکہ اسے وصول بھی ہوجائے، اسے اس کا مالک بنانا ہے اور اس طرح بھی زکوۃ ادا ہوجائے گی۔ اس میں مناسب کہ مستحق کو پہلے ہی اطلاع دے دی جائے اور بعد میں معلوم کر لیا جائے کہ اسے رقم وصول ہوئی ہے۔ والله تعالى أعلم.

⚡⚡⚡⚡

كتبه: ندیم ابن علیم المصبور العینی


https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱ خرداد ۱۴۰۵، ۲۰:۳۰

⚡ Miscellaneous Questions & Answers ⚡

(Question) A person started a four-rak‘ah Ṣalāt al-Tasbīḥ. During the third rak‘ah, the time of zawāl ‘urfī began, so he ended the prayer by making salām in the third rak‘ah. Now, must he make up Ṣalāt al-Tasbīḥ specifically, or would a general nafl suffice? Also, how many rak‘ahs must he make up—two or four?
(Answer) If he had already sat for the duration of tashahhud after two rak‘ahs, then he will make up two rak‘ahs; otherwise, he will make up four rak‘ahs. It is not necessary to intend Ṣalāt al-Tasbīḥ specifically; the intention of general nafl prayer will suffice. And Allah knows best.

⚡⚡

(Question) A person began a journey of about 2000 km after Fajr on 14 March, and he plans to return home before Maghrib on 29 March. During this period, he will stay in one place from Maghrib of 14 March until Fajr of 29 March. In this situation, should he perform qaṣr or complete prayers? And what is the ruling regarding Tarāwīḥ?
(Answer) In the described situation, the duration from Maghrib of 14 March to Fajr of 29 March does not amount to a full fifteen days, rather it is less than that. Therefore, the person will still be considered a traveller (musāfir) according to Sharī‘ah. Hence, he will perform qaṣr, meaning he will pray two rak‘ahs instead of four for the obligatory prayers that normally consist of four rak‘ahs. However, Tarāwīḥ is not shortened for a traveller; therefore, he should perform the full twenty rak‘ahs of Tarāwīḥ during Ramadan. And Allah knows best.

⚡⚡

(Question) A cab driver sometimes has to travel to areas where there is no mosque nearby, and because of local conditions he fears praying openly in public places. In such situations, to avoid missing the prayer, he performs the prayer sitting inside his car. Is this permissible?
(Answer) It is obligatory to perform farḍ prayers while standing, therefore performing a farḍ prayer while sitting in a car is not valid under normal circumstances. However, if there is a genuine fear of harm or danger and it is not possible to get out of the car to pray, then in such a state of necessity it will be permissible to pray inside the car according to one’s ability. Nevertheless, he must repeat those prayers later while standing. And Allah knows best.

⚡⚡⚡⚡

Written by: Nadeem ibn Aleem al-Masboor al-Aini

https://t.me/masboor

Please share with the intention of spreading knowledge. 🌺

✾ دار المصنفین | دینی کتب وتحاریر ✾

۱۸ اردیبهشت ۱۴۰۵، ۰۹:۴۶

⚡متفرق سوالات وجوابات ⚡

(سوال) اہل سنت کے فروعی اور اختلافی مسائل کو لے کر سوشل میڈیا پر سنیوں کے درمیان انتشار پھیلانا کیسا ہے؟
(جواب) فروعی اور اجتہادی مسائل میں اختلاف اہلِ علم کے درمیان قدیم زمانہ سے موجود ہے، لیکن ان مسائل کو بنیاد بنا کر عوام کے درمیان سوشل میڈیا پر جھگڑا، طعن و تشنیع اور انتشار پھیلانا حرام ہے۔ الله تعالیٰ کا ارشاد ہے: وَلَا تَنَازَعُوا فَتَفْشَلُوا وَتَذْهَبَ رِيحُكُمْ یعنی آپس میں جھگڑا نہ کرو ورنہ تم کمزور پڑ جاؤ گے اور تمہاری ہوا اکھڑ جائے گی (القرآن الکریم، ٨/٤٦)۔ اسی طرح نبی کریم ﷺ نے فرمایا: المسلم أخو المسلم لا يظلمه ولا يسلمه ولا يحقره یعنی مسلمان مسلمان کا بھائی ہے، نہ اس پر ظلم کرتا ہے، نہ اسے بے یار و مددگار چھوڑتا ہے اور نہ اسے حقیر سمجھتا ہے (صحیح مسلم، م: ٢٥٦٤)۔ ایک اور حدیث میں فرمایا: لا تباغضوا ولا تحاسدوا ولا تدابروا وكونوا عباد الله إخوانا یعنی آپس میں بغض نہ رکھو، حسد نہ کرو، ایک دوسرے سے منہ نہ موڑو اور الله کے بندو بھائی بھائی بن کر رہو۔ (صحیح البخاری، م: ٦٠٦٥)۔ نیز رسول الله ﷺ نے فرمایا کہ مسلمان کو گالی دینا فسق ہے اور اس سے لڑنا کفر کے قریب عمل ہے (صحیح البخاری، م: ٤٨)۔ لہٰذا فروعی اور اختلافی مسائل کو بنیاد بنا کر مسلمانوں میں جھگڑا اور انتشار پھیلانا ناجائز اور قابلِ مذمت ہے، مسلمانوں کو چاہیے کہ ایسے معاملات میں اعتدال اختیار کریں اور اہلِ علم کی طرف رجوع کریں۔ والله تعالى أعلم۔

(سوال) اگر کسی فقیرِ شرعی کو ایک آدمی کی طرف سے یا مختلف لوگوں کی طرف سے اتنا مال مل جائے جو بقدرِ نصاب ہو جائے تو کیا اس پر سال گزرنا ضروری ہے یا نہیں؟ کیونکہ وہ مالکِ نصاب تبھی شمار ہوگا جب سال پورا ہو جائے گا؟
(جواب) فقیرِ شرعی کو اگر کسی ایک شخص کی طرف سے یا متعدد لوگوں کی طرف سے اتنا مال مل جائے جو نصاب کے برابر یا اس سے زیادہ ہو تو وہ اسی وقت مالکِ نصاب شمار ہوگا، سال گزرنے کا انتظار ضروری نہیں ہے؛ کیونکہ مالکِ نصاب ہونے کے لئے سال گزرنا شرط نہیں بلکہ نصاب کا مالک ہونا کافی ہے، البتہ زکوۃ واجب ہونے کے لئے نصاب پر سال گزرنا شرط ہے۔ لہذا فقیر جو زکوۃ یا کسی اور طریقہ سے نصاب کے برابر مال پائے تو وہ فوراً غنی شمار ہوگا اور اس کے بعد اس کے لئے زکوۃ لینا جائز نہیں ہوگا، اگرچہ اس مال پر سال نہ گزرا ہو۔ والله تعالى أعلم۔

(سوال) کیا فرماتے ہیں علمائے دین اور مفتیان عظام اس مسئلہ کے بارے میں کہ زید نے تراویح میں قرآنِ مجید مکمل کیا لیکن آخر میں "أُولٰئِكَ هُمُ الْمُفْلِحُونَ" تک نہیں پڑھا، تو حامد اس پر اعتراض کرتا ہے کہ اسے پڑھنا چاہیے تھا، کیوں نہیں پڑھا؟ کیا ختمِ قرآن کے وقت اس آیت تک پڑھنا ضروری ہے؟ اس بارے میں شریعت کیا حکم دیتی ہے، تفصیل سے رہنمائی فرمائیں۔
(جواب) تراویح میں ختمِ قرآن کے وقت بعض علاقوں میں یہ معمول بن گیا ہے کہ سورۂ بقرہ کی ابتدائی آیات الم ۚ ذَٰلِكَ الْكِتَابُ لَا رَيْبَ فِيهِ سے لے کر أُولٰئِكَ هُمُ الْمُفْلِحُونَ تک دوبارہ پڑھ لی جاتی ہیں تاکہ ختم کے بعد دوبارہ تلاوت کے آغاز کی برکت حاصل ہو جائے، اسے وصلِ ختم کہتے ہیں۔ یہ عمل بعض اہلِ علم کے نزدیک مستحسن ہے، لیکن یہ شرعاً لازم یا ضروری نہیں ہے، لہٰذا اگر کسی نے تراویح میں قرآن ختم کر دیا اور یہ آیات دوبارہ نہ پڑھیں تو ختمِ قرآن درست ہے اور اس میں کوئی شرعی قباحت نہیں، اور اس پر اعتراض کرنا بالکل درست نہیں۔ والله تعالى أعلم.

(سوال) ضروری مسئلہ: اگر کسی شخص کا گھر مسجد کے قریب ہو تو کیا وہ شخص اعتکاف کی حالت میں گھر جا کر بیوی سے خدمات لے سکتا ہے، مثلاً سر میں مالش کروانا یا پیر دبوانا وغیرہ؟ دوسرا سوال یہ ہے کہ کیا اعتکاف کی حالت میں بیوی کو مسجد میں خدمت کے لئے بلا سکتا ہے؟
(جواب) معتکف کے لئے بلا ضرورتِ شرعی مسجد سے باہر جانا جائز نہیں، اگرچہ اس کا گھر مسجد کے بالکل قریب ہی کیوں نہ ہو، لہٰذا صرف اس غرض سے کہ بیوی سے سر کی مالش کرائے یا پیر دبوائے گھر جانا جائز نہیں، اور اگر ایسا کرے گا تو اعتکاف فاسد ہو جائے گا۔ البتہ اگر بیوی مسجد میں آ کر معتکف کی خدمت کرے، مثلاً سر کی مالش کر دے یا پیر دبا دے تو اس سے اعتکاف اگرچہ فاسد نہ ہوگا لیکن عورت کے لیے بلا ضرورت شدیدہ فتنہ کے اندیشہ سے باہر نکلنا اور مسجد جانا اور یہ سب کرنا مناسب نہیں ہے. والله تعالى أعلم۔

⚡⚡⚡⚡

كتبه: ندیم ابن علیم المصبور العینی

https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱۸ اردیبهشت ۱۴۰۵، ۰۹:۴۶

⚡متفرق سوالات وجوابات ⚡

(سوال) سوال یہ ہے کہ میں نے ایک دکان خریدی ہے، جب میں دکان خرید رہا تھا تو مجھے بیس لاکھ روپے کی ضرورت تھی، میری بیوی نے مجھ سے کہا کہ میرا زیور لے لو اور دکان خرید لو اور زیور کا گویا مجھے مالک بنا دیا کہ آپ جیسے چاہیں استعمال کر لیں، لیکن میں نے باہر سے ادھار لے کر دکان خرید لی، اب دریافت طلب امر یہ ہے کہ وہ زیورات میری ملکیت شمار ہوں گے یا میری اہلیہ کی؟ اور کیا ان کی زکوۃ مجھے دینی ہوگی یا میری اہلیہ کو؟
(جواب) اگر بیوی نے اپنے زیورات شوہر کو ہبہ کر دیے تھے اور شوہر نے اسے قبول بھی کر لیا تھا تو وہ زیورات شوہر کی ملکیت شمار ہوں گے، چاہے بعد میں ان کو استعمال کیا ہو یا نہ کیا ہو، ایسی صورت میں اگر وہ زیورات نصاب کے بقدر ہوں اور ان پر سال گزر جائے تو ان کی زکوۃ شوہر پر واجب ہوگی۔ البتہ اگر بیوی کا مقصد صرف یہ تھا کہ ضرورت پڑنے پر ان زیورات کو بیچ کر یا گروی رکھ کر پیسے لے لیے جائیں، اور حقیقت میں ملکیت منتقل کرنے کی نیت نہ تھی بلکہ زیورات بدستور بیوی ہی کی ملکیت میں تھے تو ان کی زکوۃ بیوی پر ہی واجب ہوگی۔ لہٰذا اصل حکم اس بات پر موقوف ہے کہ آیا واقعی ہبہ کر کے ملکیت منتقل کی گئی تھی یا صرف اجازت دی گئی تھی۔ والله تعالى أعلم۔

(سوال) کیا رات کے وقت کپڑے تبدیل کرکے سونا سنت ہے؟ نیز اگر کوئی شخص اس نیت سے سوئزرلینڈ میں مقیم ہو جائے کہ وہاں کی کرنسی کی قیمت زیادہ ہے، اس وجہ سے دوسرے ممالک میں سفر اور تبلیغ کے اخراجات آسانی سے برداشت ہو جائیں گے، تو کیا یہ عمل بدعت ہوگا؟ حالانکہ رسول الله ﷺ نے تبلیغ کے لیے کرنسی کی وجہ سے اپنا ملک تبدیل نہیں فرمایا۔
(جواب) رات کے وقت سونے سے پہلے کپڑے تبدیل کرنا سنت ثابت نہیں، البتہ صفائی اور طہارت کا اہتمام شریعت میں پسندیدہ ہے، اس لیے اگر کوئی شخص صفائی یا آرام کی خاطر کپڑے بدل کر سوئے تو یہ جائز اور اچھا عمل ہے۔ اسی طرح کسی شخص کا بہتر معاشی حالات یا کسی مصلحت کے پیش نظر کسی دوسرے ملک میں جا کر رہائش اختیار کرنا بھی شرعاً جائز ہے اگرچہ مقصد یہ ہو کہ وہاں کی مضبوط کرنسی کی وجہ سے دوسرے ممالک میں سفر اور دعوت وتبلیغ کے اخراجات آسانی سے برداشت کیے جا سکیں، رسول الله ﷺ یا صحابہ کرام رضى الله عنهم کا کسی خاص مصلحت کی بنا پر کوئی کام نہ کرنا یا منقول نہ ہونا اس کام کے بدعت ہونے کی دلیل نہیں ہے، بدعت تو وہ نیا عمل ہے جو خلاف شرع ہو یا اسے دین میں لازمی سمجھا جائے، جبکہ صورت مذکورہ میں یہ صرف ایک مباح تدبیر اور دنیوی وسیلہ ہے، اس لیے اسے بدعت نہیں کہا جائے گا۔ والله تعالى أعلم۔

⚡⚡⚡⚡

كتبه: ندیم ابن علیم المصبور العینی

https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱۸ اردیبهشت ۱۴۰۵، ۰۹:۴۶

⚡ متفرق سوالات وجوابات ⚡

(سوال) کیا فرماتے ہیں علمائے دین اور مفتیانِ عظام مسئلۂ ذیل کے بارے میں کہ سرکاری راشن میں سے صدقۂ فطر دینا کیسا ہے؟
(جواب) سرکاری راشن سے گیہوں وغیرہ اپنی ملکیت میں لے کر اس سے صدقہ فطر ادا کرنا جائز ہے اور اسے صاف کرکے بہتر طریقے سے دیا جائے۔ والله تعالى أعلم.

(سوال) عبد الله کا انتقال ہوا، وارثین میں بیوی زینب، تین بیٹے عبدالرحمن، عبدالرحیم اور عبدالرزاق (جو باپ عبد الله کے انتقال کے چار مہینے بعد پیدا ہوا) اور ایک فاطمہ جو زینب کے پہلے شوہر سے ہے۔ پھر بیوی زینب کا انتقال ہوا، وارثین میں عبد الرحمن، عبد الرحیم، عبد الرزاق اور زینب کی ایک بیٹی جو عبد الله کے علاوہ دوسرے شوہر سے تھی۔ پھر عبد الرحیم کا انتقال ہوا، وارثین میں بیوی سلمہ، ایک بیٹا خالد اور تین بیٹیاں خالدہ، عابدہ اور ساجدہ ہیں۔ کل ترکہ چار لاکھ روپے کی زمین ہے، اس کی تقسیم کس طرح ہوگی؟
(جواب) عبد الله کے انتقال کے وقت وارثین: بیوی زینب اور تین بیٹے (عبد الرحمن، عبد الرحیم، عبد الرزاق) ہیں، جبکہ فاطمہ چونکہ عبد الله کی حقیقی بیٹی نہیں بلکہ زینب کے پہلے شوہر کی بیٹی ہے، اس لیے وہ وارث نہیں ہوگی۔ بیوی کو اولاد کی موجودگی میں آٹھواں حصہ (١/٨) ملتا ہے لہذا عبد الله کے ترکہ کے کل چوبیس حصوں کیے جائیں گے جن میں سے بیوی کے تین اور ہر لڑکے کے سات سات حصے ہوں گے۔ پھر زینب کے انتقال کے بعد اس کا ترکہ ایک بیٹی اور تین بیٹوں کے درمیاں تقسیم ہوگا اس طرح کہ کل جائیدار کے سات حصے کیے جائیں گے جن میں لڑکی کو ایک اور ہر لڑکے کو دو دو حصے ملیں گے۔ پھر عبد الرحیم کے انتقال کے بعد اس کا ترکہ بیوی، تین بیٹیوں، اور ایک بیٹے کے درمیاں تقسیم ہوگا اس طرح کہ بیوی کو آٹھواں حصہ (١/٨) ملے گا اور باقی مال اولاد میں اس طرح تقسیم ہوگا کہ ہر بیٹی کو اس کی بھائی کے حصے کے نصف ملے گا یعنی کل چالیس حصے کیے جائیں گے جن میں سے پانچ بیوی کو، بیٹے کو چودہ اور ہر بیٹی کو سات حصے ملیں گے۔ اس اعتبار سے مراحل میں حساب کرلیں۔ والله تعالى أعلم.

(سوال) اگر کسی شخص پر زکوۃ واجب نہ ہو تو کیا وہ شخص صدقۂ فطر نکال سکتا ہے؟ وضاحت کے ساتھ بیان فرمائیں۔
(جواب) صدقۂ فطر واجب ہونے کے لیے زکوۃ کا واجب ہونا شرط نہیں ہے، بلکہ جس مسلمان کے پاس اپنی بنیادی ضروریات (مثلاً رہنے کا مکان، استعمال کے کپڑے، گھر کا سامان وغیرہ) سے زائد اتنا مال یا سامان موجود ہو جو نصاب کے برابر ہو تو اس پر صدقۂ فطر واجب ہوتا ہے، اگرچہ وہ مال نامی نہ ہو یعنی اس پر زکوۃ واجب نہ ہوتی ہو یا سال مکمل نہ ہونے یا کسی سبب سے ابھی واجب نہ ہوئی ہو۔ اگر کسی شخص پر صدقۂ فطر واجب نہ بھی ہو تو وہ نفلی طور پر صدقۂ فطر یا عام صدقہ ادا کرسکتا ہے اور اس میں ثواب ہے۔ والله تعالى أعلم.

(سوال) ایک عورت کے پاس پہلے سے اتنا زیور موجود تھا کہ اس پر زکوٰۃ واجب تھی، پھر اس نے کچھ نیا زیور مزید خرید لیا تو کیا اس نئے زیور کی بھی زکوٰۃ نکالنی پڑے گی؟
(جواب) ہاں، وہ نیا زیور بھی پہلے والے مال کے ساتھ شامل کیا جائے گا اور جب اس کے زکوٰۃ کے سال (حول) کی تاریخ آئے گی تو مجموعی زیور کی زکوٰۃ ادا کرنی ہوگیا، اس نئے زیور کے لیے الگ سے نیا سال گزرنا شرط نہیں ہے۔ والله تعالى أعلم.

(سوال) نماز اور قرآن پڑھتے ہوئے موبائل میں بیان لگا کر سن سکتے ہیں؟
(جواب) نماز کی حالت میں موبائل یا کسی اور ذریعے سے بیان سننا جائز نہیں ہے؛ اگر نماز میں خاموش ہوگیا اور پوری توجہ بیان سننے میں لگا دی تو اگر ایسا اتنی دیر تک کیا جتنی دیر میں ایک رکن ادا کرسکتا ہے یعنی تین دفعہ سبحان الله کہنے کی مقدار تو نماز فاسد ہوجائے گی۔ والله تعالى أعلم۔

(سوال) رمضان المبارک میں بعض مساجد میں فجر کی نماز بہت مختصر پڑھائی جاتی ہے، کیا ایسا کرنا خلافِ سنت ہے؟
(جواب) نہیں، خلاف سنت نہیں ہے۔ والله تعالى أعلم.

⚡⚡⚡⚡

كتبه: ندیم ابن علیم المصبور العینی


https://t.me/masboor

اشاعت علم کی نیت سے شیر کریں۔ 🌺

✾ دار المصنفین | دینی کتب وتحاریر ✾

۱۷ فروردین ۱۴۰۵، ۰۶:۰۴

⚡ پیچامہ یا پینٹ فولڈ کر نماز پڑھنا ⚡

(سوال) پینٹ یا پاجامہ موڑ کر کے نماز پڑھنا کیسا ہے؟ کیا نماز کے لیے پینٹ یا پاجامہ موڑ سکتے ہیں یا نہیں؟ اگر موڑ سکتے ہیں تو کس طرح؟ اور اگر نہیں موڑ سکتے تو نماز کا کیا حکم ہوگا؟ نیز اگر موڑ کر نماز پڑھی جائے تو اس کے متعلق احادیث میں جو وعیدیں آئی ہیں اُن کا کیا حکم ہے؟
(جواب) نماز میں کپڑے کو سمیٹنا یا موڑنا مکروہ ہے، خواہ وہ پاجامہ ہو یا پینٹ، کیونکہ نبی کریم ﷺ نے فرمایا: "أُمِرْتُ أَنْ أَسْجُدَ عَلَى سَبْعَةِ أَعْظُمٍ وَلَا أَكُفَّ شَعَرًا وَلَا ثَوْبًا" یعنی مجھے حکم دیا گیا ہے کہ سات اعضا پر سجدہ کروں اور بالوں اور کپڑوں کو نہ سمیٹوں۔ (صحیح البخاری، م: ٨١٦) اس حدیث کی بنا پر فقہائے کرام نے فرمایا ہے کہ نماز کے لیے جان بوجھ کر کپڑے کو موڑنا یا اوپر چڑھانا مکروہِ تحریمی ہے، کیونکہ یہ اس ممانعت میں داخل ہے۔ لیکن چونکہ ہمارے زمانہ میں اس میں عموم بلوی پایا جاتا ہے اور لوگ وضو کے بعد سمیٹے ہوئے پائینچے اتارنا بھول جاتے ہیں یا اس بارے میں احکام سے ناواقف ہوتے ہیں، اب کراہت اتنی شدید نہیں ہے اور اس شخص کی نماز کو واجب الاعادہ نہیں قرار دیا جائے گا جو کچھ پرت پائنچے چڑھائے نماز پڑھے۔ اور احادیث میں جو وعیدیں ٹخنوں سے نیچے کپڑا لٹکانے کے بارے میں آئی ہیں وہ دراصل تکبر اور فخر کی نیت سے ایسا کرنے والوں کے بارے میں ہیں، جیسا کہ زمانۂ جاہلیت میں بعض لوگ تکبر کے طور پر کپڑے گھسیٹ کر چلتے تھے، لہٰذا بغیر تکبر ایسا کرنا ان وعیدوں میں داخل نہیں، حضرت عبد الله بن عمر رضى الله عنهما سے روایت ہے کہ نبی کریم ﷺ نے فرمایا: "مَنْ جَرَّ ثَوْبَهُ خُيَلَاءَ لَمْ يَنْظُرِ اللَّهُ إِلَيْهِ يَوْمَ الْقِيَامَةِ" یعنی جو شخص تکبر کے ساتھ اپنا کپڑا گھسیٹتا ہوا چلے الله قیامت کے دن اس کی طرف نظرِ رحمت نہیں فرمائے گا۔ اس پر حضرت ابوبکر رضى الله عنه نے عرض کیا: "يَا رَسُولَ اللَّهِ إِنَّ أَحَدَ شِقَّيْ إِزَارِي يَسْتَرْخِي إِلَّا أَنْ أَتَعَاهَدَ ذَلِكَ مِنْهُ" یا رسول الله ﷺ! میرا تہبند کبھی کبھی ایک طرف سے نیچے ڈھلک جاتا ہے مگر میں اس کا خیال رکھتا ہوں۔ تو نبی کریم ﷺ نے فرمایا: "إِنَّكَ لَسْتَ مِمَّنْ يَفْعَلُهُ خُيَلَاءَ" یعنی تم ان لوگوں میں سے نہیں جو تکبر کی وجہ سے ایسا کرتے ہیں۔ (صحیح البخاری، م: ٥٧٨٤) والله تعالى أعلم۔

⚡⚡⚡⚡

كتبه: ندیم ابن علیم المصبور العینی

https://t.me/masboor

اشاعت علم کی نیت سے شیر کریں۔ 🌺

Showing 14 of 14 posts

No more posts