በእንተ ቅዱሳን ኅሩያን (ከገድላት አንደበት-ke gedilat andebet)

በእንተ ቅዱሳን ኅሩያን (ከገድላት አንደበት-ke gedilat andebet)

Public

مشاهده کانال

نمی‌توانید بپیوندید؟ @kegedilatandebet2716

۰

۵.۸k عضو

به‌روزرسانی شده: May 16, 2026 at 10:27 PM

በእንተ ቅዱሳን ኅሩያን (ከገድላት አንደበት-ke gedilat andebet)

በኢትዮጵያ ኦርቶዶክስ ተዋሕዶ ቤ/ክ ገድላት ውስጥ የተጻፉ የቅዱሳን አባቶቻችንና የቅዱሳት እናቶቻችን ገድላቸውና አስገራሚ ታሪካቸው ዓመቱን ሙሉ ምንም ሳይቋረጥ በየቀኑ ይነገርበታል!

@kegedilatandebet2716 is a dedicated channel for مذهب with regular updates in مذهب

رتبه‌بندی

رتبه‌بندی جهانی

#456

+2

رتبه‌بندی زبان

#45

+1

رتبه‌بندی دسته‌بندی

#23

-1

رشد مشترکان (6 روز گذشته)

مجموع: 5.8K

رشد 24 ساعت: +0 0%

Loading...

رتبه‌بندی

ورود لازم است

Loading...

Loading recommended channels...

آخرین پست‌ها

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

📷 Photo

7,360

0

0

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

አንድ አምላክ በሚሆን በአብ በወልድ በመንፈስ ቅዱስ ስም አሜን
ሰኔ 27-በሉቃስ ወንጌል ላይ ታሪኩ የተነገረው ድኃው አልዓዛር መታሰቢያው ነው፡፡
+ የሐዋርያው የቅዱስ ጳውሎስ የንስሓ አባት በመባል የሚታወቀው ሐዋርያው ቅዱስ ሐናንያ ዕረፍቱ ነው፡፡
+ ታላቁ ሊቅ ቅዱስ ያዕቆብ ዘሥሩግ ዕረፍቱ ነው፡፡
+ የሰማዕቱ የቅዱስ ቶማስ የምስክርነቱን ፍጻሜ ሆነ፡፡ ከእርሱም ጋር ማኅበርተኞቹ የሆኑ 709 ሰዎች በሰማዕትነት ዐረፈ፡፡
ቅዱስ ቶማስ ሰማዕት፡- ሰንደላት ከሚባል ሀገር የተገኘ ታላቅ ጻድቅ ነው፡፡ በ11 ዓመቱ እረኝነት ላይ ሳለ ሊቀ መላእክት ቅዱስ ሚካኤል ተገልጦለት ወደ ከሃዲው መኰንን ዘንድ ሄዶ በክርስቶስ ስም ሰማዕት እንዲሆን ነገረው፡፡ ቅዱሱም ወደ እስክንድርያ ሄዶ በመኰንኑ ፊት ስለ ክርስቶስ አምላክነት መሰከረ፡፡ መኰንኑም ለአማልክቶቹ ቢሠዋና ቢሰግድ ጸሐፊው እንደሚያደርገው ቃል ገባለት፡፡ በዚህም ጊዜ ቅዱስ ቶማስ እረኝነት ይጠብቅባት የነበረችውን አለንጋ አውጥቶ መኰንኑን ገረፈው፡፡የመኰንኑም ሎሌዎች ይዘው እጅግ አሠቃዩት፡፡ ሥጋውንም በብረት መጋዝ ሠነጠቁት ነገር ግን መልአኩ መጥቶ ፈወሰው፡፡ በእሥር ቤት ሳለ የእሥር ቤቱ ጠባቂው ልጁ ስለታመመበት ቅዱስ ቶማስን ለመነው፡፡ ቅዱስ ቶማስም እረኝነት ይጠብቅባት የነበረችውን አለንጋ ሰጠውና ወስዶ በታመመ ልጁ ላይ እንዲያኖረው ነገረው፡፡ ሄዶም አለንጋውን በልጁ ላይ ቢያስቀምጠው ልጁ ወዲያው ዳነ፡፡ ምእመናንም ከቅዱስ ቶማስ ከሰውነቱ የሚፈሰውንም ደም እየወሰዱ ዕውራንን ያበሩበት ጀመር፡፡ ከሃዲያኑም በዚህ ተቆጥተው ቅዱሱን ለተራበ አንበሳ አሳልፈው ቢሰጡት አንበሳው ሰግዶለታል፡፡ ቀጥለውም አባለ ዘሩን ቆርጠው በአውድማ ላይ አበራዩት፡፡ ልዩ ልዩ ዓይነት በሆኑ ሥቃዮችም እጅግ ካሠቃዩት በኋላ ሰኔ 27 ቀን አንገቱን በሰይፍ ቆርጠው ሰማዕትነቱን በድል እንዲፈጽም አደረጉት፡፡ ከእርሱም ጋር 709 ሰማዕታት አብረው ተሰይፈው በመንግሥተ ሰማያት የድል አክሊልን ተቀዳጁ፡፡ የሰማዕቱ የአቡነ ቶማስ ረድኤት በረከቱ ይደርብን፣ በጸሎቱ ይማረን፡፡
+ + + + +
አቡነ ያዕቆብ ዘሥሩግ፡- የዚኽም ቅዱስ ሰኔ 27 ልደቱ ፣ ዕረፍቱ ግን ሰኔ 7 ነው እየተባለም በሊቃውንት ይነገራል፡፡ የቅዱስ ያዕቆብ ዘሥሩግ ሀገሩ ሶርያ ሲሆን አባቱ ሊቀ ካህናት ነበር፡፡ በኤጲስ ቆጶስነት የተሾመባት ሀገር በጤግሮስና በኤፍራጥስ መካከል በምትገኝ ሥሩግ በምትባል ሀገር ስለሆነ ያዕቆብ ዘሥሩግ ተባለ፡፡ በሦስት ዓመቱ እናቱ ቤተ መቅደስ ስትወስደው መልአክ እጁን ይዞ በሊቀ ጳጳሱ እጅ እንዲቆርብ አድርጎታል፡፡ በዚህም ጊዜ ምሥጢራት ሁሉ ተገልጠውለታል፡፡ ገና በ7 ዓመቱ ስለ ሦስት ነገሮች በእጅጉ ያለቅስ ነበር፡፡ ይኸውም ‹‹ነፍሴ ከሥጋዬ ተለይታ ስትወጣ፣ ከጌታችን ጋር ስገናኝና መጨረሻውን ፍርድ ስሰማ እነዚህን ሦስት ነገሮች በእጅጉ እፈራለሁ›› እያለ ያለቅስ ነበር፡፡
አቡነ ያዕቆብ በ12 ዓመቱ ብሉይንና ሐዲስን አጠናቆ ተምሮ ጨርሷል፡፡ ጸጋውን ዐውቀው 5ቱ ታዋቂ ሊቃነ ጳጳሳት መጥተው እጅ ነስተውት አዲስ ድርሰት ድረስልን ቢሉት እርሱም በፍጹም ትሕትና ‹‹በእናንተ ፊት እንኳን አዲስ ድርሰት ልደርስ ቀርቶ የተደረሰውንም መናገር አልችልም›› አላቸው፡፡ ያንጊዜም ሕዝቡና ሊቃነ ጳጳሳቱ ‹‹እግዚአብሔር በዚህ ሕጻን ላይ አድሮ ገሠጸን›› እያሉ ንስሓ ገብተዋል፡፡
ቅዱስ ያዕቆብ በነበረበት ዘመን በሮማው መና*ፍቅ ልዮን አማካኝነት ቤተ ክርስቲያን ለመጀመሪያ ጊዜ ለሁለት የተከፈለችበት ጊዜ ነበርና እነ ዲዮስቆሮስ ‹‹የውሾች ጉባኤ›› ከተባለው ከኬልቄዶን ጉባኤ ተለይተው ሃይማኖትን ሲያጸኑ ልዮንንም ማውገዛቸውን ያዕቆብ ሲሰማ በዲዮስቆሮስ ጽናት በእጅጉ ተደስቶ ደብዳቤ ጽፎ አመስግኖታል፡፡ እነ ልዮንን ግን አውግዞ እረግሟቸዋል፡፡ ልዮንም ተከታይ ባገኝ ብሎ ‹‹እኔን ምሰል›› በማለት ለቅዱስ ያዕቆብ ደብዳቤ ጻፈለት፡፡ አቡነ ያዕቆብም ‹‹ሳጥናኤል ከመላእክት ጋር ምን አንድ አደረገው? አንተ ርኩስ ነህ፣ የዲዮስቆሮስን ጥርስ አስወልቀህ፣ ጢሙን አስነጭተህ፣ ሃይማኖትህን የቀየርህ ከሁለት ዓለም ስደተኛ ጋር አልተባበርም፣ ይልቅስ ንስሓ ግባ፣ ንስሓ ባትገባ ግን አንተ ዲያብሎስ ነህ ተከታዮችህም አጋንንት ናቸው›› በማለት መልሱን ጽፎለታል፡፡ ልዮንም እምቢ ብሎ በክህደቱ ቢጸናበት አውግዞና እረግሞ ለይቶታል፡፡
ንጽሕናውና ቅድስናው ‹‹እንደ መላእክት ነው›› የተባለለት ያዕቆብ ዘሥሩግ ጻድቅም ሐዋርያም ደራሲም ተከራካሪ መምህርም ነው፡፡ ሦስት ድርሰቶች ያሉት ሲሆን በስሙ የተጠራው ቅዳሴም አለው፡፡ ረድኤት በረከቱ ይደርብን፣ በጸሎቱ ይማረን፡፡
+ + + + +
ድሀው አልዓዛር፡- ይኸኛው አልዓዛር በሉቃስ ወንጌል ላይ እንደተነገረው ባለጸጋው ነዌ ድሀው አልዓዛር በደጁ ወድቆ ትራፊውን ፍርፋሪ ይመኝ የነበረ ውሾች ቁስሉን እስኪልሱለት ድረስ በባጸጋው ዘንድ የተናቀና የወደቀ ነበር፡፡ ሁለቱም ሲሞቱ ግን ባለጸጋው ነዌ በሲኦል ሆኖ እየተሠቃየ ድሀው አልዓዛርን በአብርሃም እቅፍ አይቶታል፡፡ ቅዱስ አልዓዛር በዚህች ዕለት በዓመታዊ በዓሉ ታስቦ ይውላል፡፡ ሙሉ ታሪኩ በሉቃስ ወንጌል 16፡19-31 ላይ እንዲህ ተቀምጧል፡-
‹‹ቀይ ልብስና ቀጭን የተልባ እግር የለበሰ አንድ ባለ ጠጋ ሰው ነበረ፣ ዕለት ዕለትም እየተመቸው በደስታ ይኖር ነበር፡፡ አልዓዛርም የሚባል አንድ ድሀ በቍስል ተወርሶ በደጁ ተኝቶ ነበር፣ ከባለ ጠጋውም ማዕድ ከሚወድቀው ፍርፋሪ ሊጠግብ ይመኝ ነበር፣ ውሾች እንኳ መጥተው ቍስሎቹን ይልሱ ነበር፡፡ ድሀውም ሞተ፣ መላእክትም ወደ አብርሃም እቅፍ ወሰዱት፣ ባለ ጠጋው ደግሞ ሞተና ተቀበረ፡፡ በሲኦልም በሥቃይ ሳለ አሻቅቦ አብርሃምን በሩቅ አየ አልዓዛርንም በእቅፉ፡፡ እርሱም እየጮኸ ‹አብርሃም አባት ሆይ ማረኝ፣ በዚህ ነበልባል እሣቀያለሁና የጣቱን ጫፍ በውኃ ነክሮ መላሴን እንዲያበርድልኝ አልዓዛርን ስደድልኝ› አለ፡፡ አብርሃም ግን ‹ልጄ ሆይ አንተ በሕይወትህ ሳለህ መልካም እንደ ተቀበልህ አስብ አልዓዛርም እንዲሁ ክፉ፤ አሁን ግን እርሱ በዚህ ይጽናናል አንተም ትሠቃያለህ፡፡ ከዚህም ሁሉ ጋር ከዚህ ወደ እናንተ ሊያልፉ የሚፈልጉ እንዳይችሉ፣ ወዲያ ያሉ ደግሞ ወደ እኛ እንዳይሻገሩ በእኛና በእናንተ መካከል ታላቅ ገደል ተደርጎአል› አለ፡፡ እርሱም ‹እንኪያስ አባት ሆይ ወደ አባቴ ቤት እንድትሰደው እለምንሃለሁ፤ አምስት ወንድሞች አሉኝና፡፡ እነርሱ ደግሞ ወደዚህ ሥቃይ ስፍራ እንዳይመጡ ይመስክርላቸው› አለ፡፡ አብርሃም ግን ‹ሙሴና ነቢያት አሉአቸው፤ እነርሱን ይስሙ› አለው፡፡ እርሱም አይደለም፣ አብርሃም አባት ሆይ ነገር ግን ከሙታን አንዱ ቢሄድላቸው ንስሐ ይገባሉ› አለ፡፡ አብርሃምም ‹ሙሴንና ነቢያትንም የማይሰሙ ከሆነ ከሙታንም እንኳ አንድ ቢነሣ አያምኑም› አለው፡፡›› ረድኤት በረከቱ ይደርብን፣ በጸሎቱ ይማረን፡፡
+ + + + +
ሐዋርያው ቅዱስ ሐናንያ፡- ቁጥሩ ከ72ቱ አርድእት ነው፡፡ ሕገ ኦሪትን ጠንቅቆ የሚያውቅ ምሑር ነው፡፡ ጌታችን መድኃኒታችን ኢየሱስ ክርስቶስ ወንጌልን ማስተማር በጀመረ ሰዓት ነው ለተልዕኮ የጠራው፡፡ ሐናንያም በበጎ ፈቃድ ስለተከተለውና ስላገለገለው ከ72ቱ አርድእት ደምሮታል፡፡ ሐዋርያው ለሦስት ዓመታት ከጌታችን እግር ሥር ተቀምጦ ተምሯል፡፡ ቅዱስ ሐናንያ በበዓለ ዕርገት ተባርኮ በ50ኛው ቀንም ሀብተ መንፈስ ቅዱስን ተቀብሎ ለስብከተ ወንጌል ተሰማርቷል፡፡ ሐዋርያትም የሶርያ ደማስቆ ከተማ የመጀመሪያው ጳጳስ አድርገው ሾመውታል፡፡

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

ጌታችን ባረገ በ8ኛው ዓመት ክርስቲያኖችን ያሠቃይ የነበረው ሳውል ወደ ደማስቆ የተጓዘው ክርስቲያኖችን ለማሳደድ ነበር፡፡ የቅዱስ ሐናንያንም የወንጌል ሰባኪነት ስለሚያውቅ እርሱንም ለማሠር ነበር ጉዞው፡፡ እግዚአብሔር ግን ሳውልን (ጳውሎስን) ምርጥ ዕቃው ይሆን ዘንድ መርጦታልና በመብረቅ አስደንግጦና ዐይኑን ጋርዶ የጥሪውን ደወል አሰማው፡፡ ‹‹ለምን ታሳድደኛለህ?›› በማለትም በጌታችን በስሙ ያመኑ ክርስቲያኖችን ማሳደድ ማለት ራሱን ክርስቶስን ማሳደድ መሆኑንም ነገረው፡፡
ከዚህም በኋላ ጌታችን ሳውልን ወደ ሐናንያ እንዲሄድ ነገረው፡፡ እንዲሁም ጌታችን ለሐናንያም ተገልጦለት ጳውሎስ ወደ እርሱ እንደሚመጣና ምርጥ ዕቃውም አድርጎ እንዳዘጋቸው ነገረው፡፡ ነገር ግን የሳውልን አሳዳጅነት ጠንቅቆ ያውቅ ስለነበር ሐናንያ ራሱ ጌታችን ጳውሎስ ስለመመለሱ የነገረውን ለማመን ከብዶት ነበር፡፡ ምክንያቱም በመጽሐፍም እንደተጻፈው ‹‹ሳውል ግን የጌታን ደቀ መዛሙርት እንዲገድላቸው ገና እየዛተ ወደ ሊቀ ካህናት ሄደ›› (የሐዋ ሥራ 9፡1) የሚለውን ሳውል እንዴት ተግባራዊ ያደርገው እንደነበር ሐናንያ በተግባርም ጭምር አይቶት ነበረና ነው፡፡
ከዚህም በኋላ ሳውል (ጳውሎስ) በመሪ እየተመራ ወደ ቅዱስ ሐናንያ ሄደ፡፡ ቅዱስ ሐናንያም ሳውልን ካገኘው በኃላ አስተምሮ ከሕመሙም ፈወሰው፣ አጠመቀውም፡፡ ለዚህም ነው ሐናንያ የቅዱስ ዻውሎስ የንስሃ አባቱ መባሉ፡፡ መጽሐፍ ቅዱስ ታሪኩን እንዲህ አስቀምጦታል፡- ‹‹ሳውልም ሳያይም ሦስት ቀን ኖረ፤ አልበላምም አልጠጣምም፡፡ በደማስቆም ሐናንያ የሚሉት አንድ ደቀ መዝሙር ነበረ፣ ጌታም በራእይ ‹ሐናንያ ሆይ!› አለው፡፡ እርሱም ‹ጌታ ሆይ እነሆኝ› አለ፡፡ ጌታም ‹ተነሥተህ ቅን ወደ ሚባለው መንገድ ሂድ፣ በይሁዳ ቤትም ሳውል የሚሉትን አንድ የጠርሴስ ሰው ፈልግ፡፡ እነሆ እርሱ ይጸልያልና፤ ሐናንያ የሚሉትም ሰው ገብቶ ደግሞ እንዲያይ እጁን ሲጭንበት አይቶአል› አለው፡፡ ሐናንያም መልሶ ‹ጌታ ሆይ! በኢየሩሳሌም በቅዱሳንህ ላይ ስንት ክፉ እንዳደረገ ስለዚህ ሰው ከብዙዎች ሰምቼአለሁ፤ በዚህም ስምህን የሚጠሩትን ሁሉ ለማሰር ከካህናት አለቆች ሥልጣን አለው› አለ፡፡ ጌታም ‹ይህ በአሕዛብም በነገሥታትም በእስራኤልም ልጆች ፊት ስሜን ይሸከም ዘንድ ለእኔ የተመረጠ ዕቃ ነውና ሂድ፤ ስለ ስሜ ስንት መከራ ሊቀበል እንዲያስፈልገው እኔ አመለክተዋለሁና› አለው፡፡ ሐናንያም ሄዶ ወደ ቤቱ ገባ፣ እጁንም ጭኖበት ‹ወንድሜ ሳውል ሆይ! ጌታ እርሱም በመጣህበት መንገድ የታየህ ኢየሱስ ነው፣ ደግሞ ታይ ዘንድና መንፈስ ቅዱስ ይሞላብህ ዘንድ ላከኝ› አለ፡፡ ወዲያውም እንደ ቅርፊት ያለ ከዓይኑ ወደቀ፣ ያን ጊዜም ደግሞ አየ፤ ተነሥቶም ተጠመቀ፤ መብልም በልቶ በረታ፡፡ በደማስቆም ካሉት ደቀ መዛሙርት ጋር ጥቂት ቀን ኖረ፡፡ ወዲያውም ስለ ኢየሱስ ክርስቶስ እርሱ የእግዚአብሔር ልጅ እንደ ሆነ በምኵራቦቹ ሰበከ፤ የሰሙትም ሁሉ ተገረሙ፡፡›› ሐዋ 9፡9-21፡፡
ከዚህም በኋላ ሐዋርያው ቅዱስ ሐናንያ ለብዙ ዓመታት በተለያዩ ሀገራት እየተዘዋወረ ወንጌልን ሰብኳል፡፡ ብዙዎችንም ከአምልኮ ጣዖት ወደ አምልኮተ እግዚአብሔር መልሷቸዋል፡፡ በዚህም ብዙ አሠቃቂ መከራዎችን ተቀብሏል፡፡ በአገልግሎቱ የቀኑ ጣዖታትን አምላኪ የሆኑ ክፉዎች ይዘው ብዙ ካሠቃዩት በኋላ በዚህች ዕለት ሰኔ 27 ቀን በድንጋይ ወግረው ስለገደሉት ሰማዕትነቱን በክብር ፈጽሞ የክብር አክሊልን ተቀዳጅቷል፡፡ የዚኽ ክቡር ሐዋርያ ረድኤት በረከቱ ይደርብን፣ በጸሎቱ ይማረን፡፡
ከገድላት አንደበት
✞ ✞ ✞

(የቅዱሳን ገድላቸውን ተኣምራታቸውን በየቀኑ በቴሌግራም ቻናል እና በዩቲዩብ በድምፅ ያዳምጡ።)

1. ቴሌግራም ቻናል፦


2. ዩቲዩብ፦
https://www.youtube.com/channel/UC_BIHIqn1uygbjMZlwyoxPA/featured።

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

አንድ አምላክ በሚሆን በአብ በወልድ በመንፈስ ቅዱስ ስም አሜን
ሰኔ 25-የሐዋርያው ሰማዕት የቅዱስ ይሁዳ ዕረፍት ነው፡- ‹‹ይሁዳ›› ማለት ‹‹እግዚአብሔርን አመሰግናለሁ›› ማለት ነው፡፡ ዘፍ 29፡35፡፡ አንድም ደግሞ‹‹ታማኝ›› ማለት ነው፡፡በመጽሐፍ ቅዱስ ውስጥ በይሁዳ ስም የተጠሩ 7 ሰዎች አሉ፡፡
ሐዋርያው ቅዱስ ይሁዳ፡- ይኸኛው በዛሬው ዕለት ሰኔ 25 ቀን ዕረፍቱ የሆነው ሐዋርያው ቅዱስ ይሁዳ ነው፡፡የጠራቢው ዮሴፍ ልጅ ሲሆን በልጅነቱ እናቱ ሞታበት የሙት ልጅ ሆኖ ሳለ እመቤታችን ቅድስት ድንግል ማርያም ተንከባክባ ያሳደገችው ዕድለኛ ሰው ነው፡፡ ነገሩም እንዲህ ነው፡-እመቤታችን በቤተ መቅደስ እየኖረች ሳለች 12 ዓመት በሆናት ጊዜ ሊቀ ካህናቱ ዘካርያስ ካህናቱን ሰብስቦ ‹‹የዚህችን ንጽሕት ልጅ ነገር ምን እናድርግ?›› ቢላቸው ካህናቱም በጋራ ‹‹ስለእርሷ ወደ ቤተ መቅደስ ገብተህ እግዚአብሔር የሚነግርህን በጸሎት ጠይቅ›› አሉትና እርሱም የክህነት ልብሱን ለብሶ ወደ ቅድስተ ቅዱሳኑ ገብቶ በጸሎት ሲጠይቅ እግዚአብሔር መልአኩን ልኮለት ሚስቶች የሌሏቸውን የዳዊት ወገን የሆኑ ወንዶችን ሰብስቦ በበትራቸው ላይ ስማቸውን ጽፎ ወደ ቅድስተ ቅዱሳኑ እንዲያገባው ነገረው፡፡ ሊቀ ካህናቱ ዘካርያስም በአዋጅ አስነግሮ 1985 ብሮችን ሰብስቦ ሲጸልይባቸው ቢያደር በአረጋዊ ዮሴፍ በትር ላይ ምልክት ታየ፡፡ በትሩንም ሲሰጠው ነጭ ርግብ መጥታ በዮሴፍ ላይ አረፈች፡፡ እርሱም ድንግልን እንዲወስዳት ሲነገረው አለቀሰ፡፡ ‹‹ይቅር በሉኝ እኔ ሽማግሌ ነኝና ልጆችም አሉኝ፤ ዕድሜዬም 83 ዓመት ነውና››እያለ አለቀሰ፡፡ ዘካርያስም ‹‹ይህ ሥራ ከእኛ ዘንድ አይደለም፣ እግዚአብሔር አዞናል እንጂ፡፡ እነሆ እርሷን ትጠብቃት ዘንድ ሰጥቶሃልና የእግዚአብሔርን ትእዛዝ እምቢ አትበል፤ ትእዛዙን አንቀበልም ያሉትን ፈጣሪህ እግዚአብሔር እንዴት እንዳደረጋቸው አስብ…›› እያለ አጽናናው፡፡ አረጋዊ ዮሴፍም እየፈራ ድንግል ማርያምን ወደቤቱ ወሰዳት፡፡እመቤታንም ወደ ዮሴፍ ቤት በገባች ጊዜ ልጆቹ እናታቸው በልጅነታቸው
ሞታባቸዋልችና የሙት ልጆች ሆነው አገኘቻቸው፡፡ ዮሴፍ አስቀድሞ ማርያም የምትባል ሚስት አግብቶ ነበር፡፡ ከእርሷም 3 ሴቶችና 4 ወንዶች ልጆች ነበሩት፡፡እነርሱም ስምዖን፣ ያዕቆብ፣ ይሁዳና ዮሳ ናቸው፡፡ ማቴዎስና ማርቆስም ይህንን በወንጌላቸው ጽፈውታል፡፡ ይህም ይሁዳ የተባለው በዛሬው ዕለት ያረፈው ሐዋርያው ነው፡፡ በኋላም ከጌታችን ጋር አብረው በማደጋቸው ምክንያት ‹‹የጌታ ወንድሞች›› ተብሎ ከተጠሩት ውስጥ አንዱ ይኸው ሐዋርያው ይሁዳ ነው፡፡ ማቴ13፡55፡፡ሐዋርያው ይሁዳ ቁጥሩ ከ72ቱ አርድእት ነው፡፡ ከጌታችን እግር ሥር ተቀምጦ 3 ዓመት ተምሮ መንፈስ ቅዱስን ተቀብሎ ወንጌልን በብዙ ሀገሮች ዞሮ በመስተማር አሕዛብን አሳምኖ አጥምቋል፡፡ወደ አንዲት ደሴትም ገብቶ
ወንጌልን በመስበክ በዚያ ያሉ ነዋሪዎቿን አሳምኖ አጥምቆዋቸዋል፡፡ ቤተ ክርስያንም ሠርቶላቸው አገልጋዮችን ሾመላቸው፡፡ ከዚህም በኋላ ወደተለያዩ ሀገሮች እየተዘዋወረ ብዙዎችን ከገቢረ ኃጢአት ወደ ገቢረ ጽድቅ መልሷቸዋል፡፡ ወደ ሮሀ ሀገር ሄዶ የሮሀውን ንጉሥ አውጋንዮስን ከደዌው ሁሉ ፈውሶታል፡፡ንጉሡንም ከነቤተሰቡ የክርስትናን ጥምቀት አጥምቆታል፡፡ ከዚህም በኋላ ሐራፒ ወደሚባል ሀገር ሄዶ የተለያዩ ተአምራትን በማድረግ ወንጌልን በመስበክ ነዋሪዎቿን አሳምኖ አጥምቆ ቤተ ክርስቲያን ሠራላቸው፡፡ አገረ ገዥውም ጣዖት አምላኪ ነበረና ሐዋርያው ይሁዳን ይዞ በጽኑ አሠቃየው፡፡ ስለታም ችንካሮች ያሉት ጫማ አሠርቶ በሐዋርያው እግሮች ውስጥ አድርጎ አሥሮ እየጎተተ አሠቃየው፡፡ይህም አልበቃው ብሎ ሰቅሎ በፍላፃ ነደፈው፡፡ ሐዋርያው ቅዱስ ይሁዳም ከብዙ ሥቃዩ የተነሣ ሰማዕትነቱን ፈጽሞ ነፍሱ ከሥጋው ስትለይ ጌታችን ቅድስት ነፍሱን ተቀበላት፡፡ሐዋርያው ከማረፉ በፊት አስቀድሞ ለምእመናን አንዲት መልእክትን ጽፎ ልኳል፡፡እርሱ የጻፋት ይህችውም መልእክት ታላቅ ምሥጢርን የተመላች ናት፡፡መልእክቷም አንድ ምዕራፍ ብቻ ያላትን ስትሆን በጣም ብዙ ምሥጢርን የያዘች ናት፡፡ ብዙዎቻችን የምናውቃትን “ለቅዱሳን አንድ ጊዜ ፈጽሞ ስለተሰጠች ሃይማኖት እንድትጋደሉ እየመከርኋችሁ እጽፍላችሁ ዘንድ ግድ ሆነብኝ” /ይሁዳ 1:3/ የምትለዋን የይሁዳን መልእክት የጻፋት ይኸው ሐዋርያ ነው፡፡ ሌሎቹም ሐዋርያት በሙሉ ይህን ዓይነት መልእክት ጽፈውልናል፡፡ አሁን በዘመናችን ያለውን የእምነት ችግር እነርሱ አስቀድመው በእምነት መነጽር አይተውት ስለነበር ነው የአደራ መልእክታቸውን ያስተላለፉልን፡፡የሐዋርያው የቅዱስ ይሁዳ ረድኤት በረከቱ ይደርብን፣ በጸሎቱ ይማረን።
+++
ዳግመኛም በዚች ዕለት ለአባቶች ሊቃነ ጳጰሳት አርባ አራተኛ የሆነ የእስክንድርያ ሊቀ ጳጳሳት ቅዱስ አባ ጴጥሮስ ዕረፍቱ ነው ። ይህም አባት ከመሾሙ በፊት የማርቆስ መንበር ያለ ሊቀ ጳጳሳት ለብዙ ዘመናት ኖረ የእስላሞች ንጉሥና መኳንንቶቹ አልፈቀዱላቸውም ነበርና ።

ከዚህም በኋላ ሃይማኖቱ የቀና ደግ መኰንን በእስክንድርያ ከተማ ላይ ተሾመ ያንጊዜም የአገር ሽማግሌዎች ወደ ርሱ ተሰብስበው ሊቀ ጳጳሳት እንደ ሌላቸው ኀዘናቸውን ነገሩት ። እርሱም ደብረ ማሕው ወደሚባለው ወደ ደብረ ዝጋግ ወጥተው እንዲጸልዩ ለራሳቸውም ሊቀ ጳጳሳት እንዲሾሙ አዘዛቸው ። በዚህም ነገር ደስ ብሏቸው ቀሲስ አባ ጴጥሮስን ወስደው ሊቀ ጵጵስና ሾሙት በእርሱም ደስ አላቸው ።
በዚያም ወራት የአንጾኪያ ሊቀ ጳጳሳት አባ ሳዊሮስ ሞተ የአንጾኪያ አገርም ያለ ሊቀ ጳጳሳት ትኖር ነበር የአንጾኪያ ምእመናንም ለእስክንድርያ ከተማ አባ ጴጥሮስ እንደ ተሾመ በስሙ ጊዜ እነርሱም የተማረ ደግ ሰው ለአንጾኪያ ሾሙ ስሙም ታውፋንዮስ ይባል ነበር ። እርሱም ከአባ ጴጥሮስ ጋራ ተስማማ እነርሱም ስለ ቀናች ሃይማኖት በመልእክቶቻቸው ይገናኙ ነበር ።

ከእነርሱም እያንዳንዱ በባልንጀራው ምክር በጸሎትና በቅዳሴ ጊዜ ይሰብክ ነበር ወደ አገራቸውም መግባት አልተቻላቸውም ነበርና አባ ጴጥሮስም በግብጽ ደቡብ በአንባንያ ገዳምና በዝጋግ ገዳም ይኖር ነበር አባ ታውፋንዮስም ከአንጾኪያ ከተማ ውጭ በአፍቆንያስ ገዳም ይኖር ነበር ።

በዚያም ወራት ከእስክንድርያ ከተማ ውጭ ሰባት መቶ ገዳማትና ሃይማኖታቸው የቀና ምእመናንም ያሉባቸው ሠላሳ ሁለት መንደሮች ነበሩ በግብጽ አውራጃ ሁሉና በላይኛው ግብጽ በአስቄጥስ ገዳማት የሚኖሩ መነኰሳት እንዲሁም ኖባና ኢትዮጵያ በዚህ በአባ ጴጥሮስ ስልጣን ሥር ነበሩ ። እኒህ ሁሉ ሃይማኖታቸው የቀና ነበር ።
በትእዛዙም ጸንተው ይኖሩ ነበር ። እርሱም በቀናች ሃይማኖት ይጸኑ ዘንድ ወደእርሳቸው መልእክቶችን መጻፍ አያቋርጥም ነበር ። የእስክንድርያን ገዳማት ሁሉና መንደሮችንም እየዞረ ያስተምራቸውና ይመክራቸው ያጽናናቸውም ነበር ።

ከእርሱ በኋላ ሊቀ ጳጳሳት የሆነ ቅዱስና ዐዋቂ የሆነ ደቀ መዝሙር ነበረው እርሱም በሊቀ ጵጵስናው ሥራ ሁሉ ይራዳው ነበረ ። ይህም አባት ጴጥሮስ አንዳንድ ጊዜ ወደ እስክንድርያ ከተማ ይገባ ነበር የሰዎቿንም ሥራቸውን ተመልክቶ ያስተምራቸውና በሃይማኖት ያጸናቸው ነበር ።

በዐሥራ ሁለቱ ዓመት የሹመቱ ዘመን እንደ ሐዋርያት መንጋዎቹን እየጠበቀ እንዲህ በሹመቱ ኑሮ በሰላም አረፈ ።
ከገድላት አንደበት
✞ ✞ ✞

(የቅዱሳን ገድላቸውን ተኣምራታቸውን በየቀኑ በቴሌግራም ቻናል እና በዩቲዩብ በድምፅ ያዳምጡ።)

1. ቴሌግራም ቻናል፦

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

2. ዩቲዩብ፦
https://www.youtube.com/channel/UC_BIHIqn1uygbjMZlwyoxPA/featured።

4,140

0

0

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

አንድ አምላክ በሚሆን በአብ በወልድ በመንፈስ ቅዱስ ስም አሜን
ሰኔ 26-የነቢያት አለቃ የቅዱስ ሙሴ ደቀ መዝሙር የሆነ የነዌ ልጅ ነቢዩ ቅዱስ ኢያሱ ዐረፈ፡፡ ኢያሱ ማለት የስሙ ትርጉም ‹‹እግዚአብሔር አዳኝ ነው›› ማለት ነው፡፡ ኢያሱ የሊቀ ነቢያት ሙሴ ደቀ መዝሙር ነው፡፡ ዘጸ 24፡13፣ ዘኁ 11፡28፡፡እርሱም ከታናሽነቱ ጀምሮ ለሙሴ አንገቱን ዝቅ አድርጎ የሚታዘዝ ፍጹም ትሑት ሰው ስለነበር በዚህም በሙሴ ላይ ያደረ መንፈስ ቅዱስ በኢያሱም ላይ አድሮበታል ፡፡ኢያሱ ‹‹አውሴ›› ተብሎ ይጠራ ነበር፡፡ ዘኁ 13፡8፡፡
የከነዓንን አገር እንዲያዩ ከቃዴስ ከተላኩት 12 ሰላዮች ውስጥ አንዱ ነበረ፡፡ከእነዚህም ዐሥሩ ክፉ ወሬ ሲያመጡ ኢያሱና ካሌብ ግን በእምነት ‹‹ምድሪቱን እንወርሳታለን›› ብለዋል፡፡ ዘኁ 13፡14፡፡ ሊቀ ነቢያት ሙሴ ከሞተ በኋላ
የእስራኤል መሪ እንዲሆን ተመርጧል፡፡ ዘኁ 27፡15-32፣ ዘዳ 3፡28፡፡ በዚህም ምክንያት ሊቃውንት ‹‹መስፍኑ›› እያሉ ይጠሩታል፡፡ ኢያሱ ሕዝቡን ሁሉ በመልካም ሁኔታ ይመራ ነበር፡፡ የዮርዳኖስን ወንዝ ከፍሎ ሕዝቡን አሻግሯል፡፡ካህናቱ የታቦቱን ሕግ ተሸክመው በዮርዳኖስ ወንዝ መካከል ቆመው የእስራኤል ሕዝብ ሁሉ እስኪሻገሩ ድረስ የወንዙ ውኃ እንደ ግድግዳ ቆሞ ነበር፡፡ ኢያ 3፡6-17፡፡ ከዚህም በኋላ በግንብ የተከበበች ኢያሪኮን 7 ቀን ዞራት፡፡ ኢያሪኮ ግንብ የፈራረሰው በኢያሱ መሪነት ነው፡፡ ኢያ 6፡1-121፡፡ ኢያሱ አሞራውያንን በገባዖን ሲዋጋ ፀሐይን በጸሎቱ እንድትቆም አድርጓል፡፡ ኢያ 10፡11-14፡፡‹‹እግዚአብሔርም በእስራኤል ልጆች እጅ አሞራውያንን አሳልፎ በሰጠ ቀን ኢያሱ እግዚአብሔርን ተናገረ፤ በእስራኤልም ፊት እንዲህ አለ፡- ‹በገባዖን ላይ ፀሐይ ትቁም፣ በኤሎንም ሸለቆ ጨረቃ፡፡› ሕዝቡም ጠላቶቻቸውን እስኪበቀሉ ድረስ ፀሐይ ቆመ፣ ጨረቃም ዘገየ፡፡ ይህስ በያሻር መጽሐፍ የተጻፈ አይደለምን?ፀሐይም በሰማይ መካከል ዘገየ፣ አንድ ቀንም ሙሉ ያህል ለመግባት አልቸኰለም፡፡›› እንዲል መጽሐፉ፡፡ በብሉይ ኪዳን የነበረው ነቢይ ቅዱስ ኢያሱ ጠላቶቹን ድል እስኪያደርግና ምድረ ርስትን ለሕዝቡ እስኪያከፋፍል ድረስ ፀሐይን እንዳቆማት ሁሉ የሐዲስ ኪዳኖቹ የክርስቶስ ማደሪያዎች የሆኑት ቅዱሳን እነ አቡነ ዜና ማርቆስ፣ ዘርዐ ቡሩክ፣ ሳሙኤል ዘደብረ ወገግ፣ አቡነ አሮን፣ አቡነ ገሪማና ሌሎችም እንዲሁ ፀሐይን በጸሎታቸው ገዝተው አቁመዋታል፡፡ቅዱስ ኢያሱ ነቢይና መስፍን ሆኖ ሕዝበ እስራኤልን ለ40 ዓመታት ካገለገለ
በኋላ በ110 ዓመቱ ዐርፎ በኤፍሬም ሀገር በተምናሴራ ተቀብሯል፡፡ ኢያ 24፡1-30፡፡ እሥራኤልም ለ30 ቀናት ያህል አልቅሰውለታል፡፡ቅዱስ ኢያሱ ለእስራኤል ነገዶች ድርሻ ድርሻቸውን ካከፋፈለ በኋላ ሕዝቡ እግዚአብሔርን እንዳይተውት ያደረገላቸውን ሁሉ አስታወሳቸው፡፡ ሲፈጽምም
‹‹የምታመልኩትን ዛሬ ምረጡ፣እኔና ቤቴ ግን እግዚአብሔርን እናመልካለን››አላቸው፡፡ ሕዝቡም ‹‹እግዚአብሔርን እናመልካለን›› ባሉት ጊዜ የቃል ኪዳን ምልክት ሐውልት አቆመ፡፡ ይህችም የቃል ኪዳን ምልክት ሐውልት ያቆመባት ቦታ ከቆላ የመጣው አቀበቱን፣ ከደጋ የመጣው ደግሞ መስኩን ጨርሶ የሚያርፍባት ናት፡፡ ከዚያች ላይ ሦስት ረድፍ ያላት ታላቅ ድንጋይ ተክለው ኢያሱና ሕዝቡ እግዚአብሔርን ለማምለካቸው ተማምለውባታል፡፡ ከቆላ የመጣው አቀበቱን፣ ከደጋ የመጣው ደግሞ መስኩን ጨርሶ ከዚያች ቦታ ላይ ሲያርፍ የማያውቀው የሚያውቀውን ‹ወንድሜ ይህቺ ድንጋይ ምንድናት?› ይለዋል፡፡የሚያውቃትም ‹ይህቺማ ኢያሱና ሕዝቡ እግዚአብሔርን ለማምለካቸው የተማማሉባት ስለሆነች አምልኮታቸውን ስትመሰክር ትኖራለች› ይለዋል፡፡
ይህችም ለጊዜው ብትደረግም ለኋላው ግን ምሳሌ ነበረች፡፡ ሐውልቷ የእመቤታችን የቅድስት ድንግል ማርያም ምሳሌ ናት፡፡ ያቺ ያማረች እንደሆነች ሁሉ እመቤታችንንም ባማረ ባማረ ይመስላታልና (መኅ 4፡7) ሦስት ገጽ የሦስቱ ድንግልናዋ ማለትም የሥጋ፣ የነፍስና የኅሊና ምሳሌዎች ናቸው፡፡አንድም ያቺ ከላይ አንድ ከሥር ግን ሦስት እንደሆነች ሁሉ አንድነት ሦስትነትም ተለይቶ የታወቀው ጌታችን ከእመቤታችን ከተወለደ ወዲህ ነው፡፡ ዳግመኛ በዚያች ሐውልት አምልኮ እንደጸናባት በእመቤታችንም ‹‹ወረደ፣ ተወለደ…›› ተብሎ አምልኮ ጸንቶባታል፡፡ ቅዱሳን ሊቃውንት አባቶቻችን እመቤታችንን ለዚህ ነው‹‹የኢያሱ የምስክሩ ሐውልት አንቺ ነሽ›› ብለው በክብር ያመሰገኗት፡፡ ቅዳሴ ማርያም ቁ.34፡፡
+ + + + +
ዳግመኛም በዚህች ዕለት የመላእክት አለቃ የቅዱስ ገብርኤል መታሰቢያ በዓሉ ነው፡፡ ኔቅሎን በሚባል አገር በፍዩም ገዳም ቤተ ክርስቲያኑ የከበረችበት ዕለትም ነው፡፡ በዚኽችም ቤተ ክርስቲያን በውስጧ ከጣራዋ ዕንጨት ብዙ አስደናቂ ተአምራት ይገለጡ ነበር፡፡ ጥጋብ በሚሆንበት ዓመት ውኃ ይንጠፈጠፋል፤ ረኃብ ከሆነ ግን ላብ እንኳን አይታይም ነበር፡፡ ሊቀ መላእክት ቅዱስ ገብርኤል በውስጧ ብዙ ተአምራትን አደረገ፡፡ ረድኤት በረከቱ ይደርብን፣ በጸሎቱ ይማረን
ከገድላት አንደበት
✞ ✞ ✞

(የቅዱሳን ገድላቸውን ተኣምራታቸውን በየቀኑ በቴሌግራም ቻናል እና በዩቲዩብ በድምፅ ያዳምጡ።)

1. ቴሌግራም ቻናል፦


2. ዩቲዩብ፦
https://www.youtube.com/channel/UC_BIHIqn1uygbjMZlwyoxPA/featured።

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

📷 Photo

6,960

0

0

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

📷 Photo

5,210

0

0

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

📷 Photo

4,740

0

0

በእንተ ቅዱሳን ኅሩያን (ከገድላት አንደበት-ke gedilat andebet)

۳۰ اردیبهشت ۱۴۰۵، ۱۹:۱۸

አንድ አምላክ በሚሆን በአብ በወልድ በመንፈስ ቅዱስ ስም አሜን
ሰኔ 24-ታላቁ አባት አባ አቡነ ሙሴ ጸሊም በሰማዕትነት ዐረፉ፡፡ አቡነ ሙሴ ጸሊም ኢትዮጵያዊ ሲሆኑ ተጋድሎአቸውን የፈጸሙት ግን በግብፅ ነው፡፡
መጀመሪያ ላይ እንደ አብርሃም በየዋህ ልቡና ሆነው ስነ ፍጥረትን በመመራመር እግዚአብሔር አምላካቸውን ያገኙ ታላቅ አባት ናቸው፡፡ ወላጆቻቸው ፀሐይ ያመልኩ ስለነበር ከልጅነታቸው ጀምሮ ኃጢአት በሠሩ ቁጥር ‹‹ተው አምላካችን ፀሐይ ይጣላሃል›› ይሏቸው ነበር፡፡ እሳቸው ግን ባደጉ ጊዜ ቀማኛ ዘራፊ ሆኑ፡፡እየዘረፉ ብዙ ይመገቡ ስለነበር ከትልቅነታቸውና ኃይለኛነታቸው የተነሳ ‹‹በገ ፈጅ›› እየተባሉም ይጠሩ ነበር፡፡ብዙ ወርቅ ከባለ ሀብቶች ሰብስባ ለነዳያንና ለቤተክርስቲያን ልትሰጥ ትሄድ የነበረችን አንዲት ክርስቲስቲያን ሴት ልጅ ሙሴና ግብረ አበሮቻቸው ለወርቁ ሲሉ እርሷንም ማርከው ወሰዷት፡፡ ማታ ላይ ስለ ውበቷ ሲያወሩ እርሷ ግን‹‹ስምህ ማን ነው?›› ስትላቸው ‹‹ሙሴ ነኝ›› ቢሏት ‹‹ይሄ ስምኮ እጅግ የተባረከ ስም ነው….›› ብላ ስለ ሊቀ ነቢያት ሙሴና ስለ ክርስቶስ አስረዳቻቸው፡፡ ከዚህ በኋላ በወላጆቻቸው ስለ ፀሐይ አምላክነት ሲነገራቸው ያደጉትን ነገር መመርመር ጀመሩ፡፡ ‹‹ፀሐይ አምላክ ከሆነ እስከዛሬ ድረስ ሽፍታና ዘራፊ ሆኜ ሰው ስገድልና ይህን ሁሉ ኃጢአት ስሠራ እንዴት ፀሐይ ሳታቃጥለኝ ቀረች? ደግሞም ፀሐይ ጠዋት ወጥታ ማታ ትጠልቃለች ይህችስ እንዴት አስገኚ ልትሆን ትችላለች ለራሷ አስገኚ አላት እንጂ…›› በማለት ፀሐይን፣ ጨረቃን ፣እሳትን፣ ነፋስን በየተራ አምላክ መሆናቸውን አለመሆናቸውን በሚገባ ከፈተኑና ከመረመሩ በኋላ ‹‹የፀሐይ የጨረቃ የሁሉ አስገኚ አምላክ ተናገረኝ›› ብለው ሲጸልዩ ከሰማይ ድምፅ መጥቶላቸው ወደ ገዳም ሄደው ከአባቶች ትምህርተ ሃይማኖትን እንዲማሩ ተነገራቸውና ወደ አስቄጥስ ገዳም ሄደው መምህር ኤስድሮስ ሁሉንም ነገር አስተምረው ለማዕረገ ምንኩስና አበቋቸው፡፡መጀመሪያ ወደ ገዳሙ ሲሄዱም ይዘርፉበትና ይጠቀሙበት የነበረውን ስለታም መሣርያ እንደያዙ ስለነበር ያዩአቸው መነኮሳት ሁሉ ‹‹ሊገድለን መጣ›› ነበር ያሉት፡፡ ከዚህም በኋላ ለመነኮሳቱ ሁሉ የሚላላኩ ሆኑ፡፡ ትንሹም ትልቁም‹‹ሙሴ ይህን አድርግልኝ›› ይሉታል እርሱም ሁሉንም እሺ ይላል፡፡ ራሱን በትሕትና ዝቅ በማድረግ በተጋድሎ እየኖረ ተአምራትን ማድረግ ጀመረ፡፡ በጸሎቱ ዝናብ ያዘንብ ነበር፤ ለቅድስና ደረጃ ከበቁም በኋላ 40 ዓመት ሙሉ ከሰው ሳይገናኙ ብቻቸውን ዘግተው ከኖሩ በኋላ ለ500 መነኮሳት አበምኔት ሆነው ተሾሙ፡፡ ቀን ወንጌል ሲያስተምሩ ይውሉና ሌሊት እየተነሱ ከበረሃ ሄደው ለሁሉም መነኮሳት ውኃ ይቀዱላቸው ነበር፡፡አገልግሎታቸው የታይታ እንዳይሆንባቸው አረጋውያን መነኮሳት መተኛታቸውን ካረጋገጡ በኋላ የግብፅ በረሃን አቋርጠው ከሩቅ ሥፍራ ሄደው ውኃ እየቀዱ መነኮሳቱ ሳያዩአቸው በየደጃፋቸው ላይ ያስቀምጡላቸው ነበር፡፡ብዙ መነኮሳትም ወደ አቡነ ሙሴ እየመጡ የሕይወትን ትምህርት ይማሩ ነበር፡፡በአንድ ወቅት አንድ ወንድም አባ ሙሴን ‹‹አንድን አገልጋይ ባጠፋው ጥፋት የተነሣ ጌታው መታው፡፡ አገልጋዩ ምን ማለት አለበት?›› ብሎ ጠየቃቸው፡፡ አባ ሙሴም ‹‹አገልጋዩ ብፁዕ ከሆነ፣ አጥፍቻለሁና ይቅር በለኝ ማለት አለበት›› አሉት፡፡ ‹‹ሌላ አይጠበቅበትምን?›› ሲል ያ ወንድም ጠየቃቸው፡፡ ‹‹አይጠበቅበትም፣ ለጊዜው ለጥፋቱ ኃላፊነቱን ወስዶ አጥፍቻለሁ ካለ ጌታው ይቅር ይለዋል፡፡ የዚህ ሁሉ ዓለማው በባልንጀራ ላይ ላለመፍረድ ነው፡፡በእውነቱ ጌታችን የግብፅን በኩራት ሁሉ ሲመታ ሰው ያልሞተበት አንድም ቤት አልነበረም›› ብለው መለሱለት፡፡ ያም ወንድም ‹‹ምን ማለት ነው?›› አላቸው፡፡እሳቸውም ‹‹ሁላችንም የየራሳችንን ጥፋቶች ካየን የባልንጀራችንን ለማየት ዕድል አንሰጥም፡፡ በራሱ ቤት ሰው የሞተበት በጐረቤቱ ልቅሶ ለማልቀስ አይሄድም፡፡ለባልንጀራ መሞት ማለት ለራስ ጥፋት ትኩረት በመስጠት፣ የሌላውን ጥፋት ከቁም ነገር አለመቁጠር ነው፡፡ ማንንም አትጉዳ፣ በማንም ላይ ክፉ አታስብ፣ክፉ የሚሠራውን ሰው አትናቀው፣ በባልንጀራው ላይ ክፉ በሚሠራ ሰው ላይ አትተማመን፣ በባልንጀራው ላይ ክፉ ከሚሠራ ሰው ጋር አትደሰት፣ ለባልንጀራ መዋቲ መሆን ማለት ይህ ነው፡፡ በማንም ላይ አትማረር፣ ነገር ግን ሁሉንም እግዚአብሔር ያውቃል በል፡፡ ከሚያማ ሰው ጋር አትተባበር፣ በሐሜቱም አትደሰት፣ ወንድሙን የሚያማውን ሰውም አትጸየፈው፡፡ አትፍረድ ማለት ትርጉሙ ይህ ነው፡፡ በማንም ላይ የጥላቻ ሀሳብ አይኑርህ፣ ጥላቻ ልብህን እንዲያሸንፈውም አትፍቀድለት፡፡ ባልንጀራውን የሚጠላውን አትጥላው፣ ሰላም ማግኘት ማለት ይህ ነው…›› ብለው መከሩት፡፡በዕድሜአቸው መጨረሻ አካባቢ ቡራኬ ለመቀበል ከመነኮሳት ደቀ መዛሙርቶቻቸው ጋር ወደ አባ መቃርስ ሄዱ፡፡ አባ መቃርስም ‹‹ልጆቼ ከናንተ መካከል በሰማዕትነት የሚሞት›› አለ ብለው ትንቢት ሲናገሩ ሙሴ ጸሊምም‹‹አባቴ ያ ሰው እኔ ነኝ፣ ‹ሰይፍ የሚያነሱ በሰይፍ ይጠፋሉ› የሚል ቃል አለ፡፡ይህን ጊዜ በጉጉት ስጠባበቀው ነበር›› አላቸው፡፡ እንደተባለውም የበርበር ሰዎች ገዳሙን ዘርፈው መነኮሳቱን ሊገድሉ ሲመጡ ደቀመዛሙርቶቻቸው ‹‹ሸሽተን እናምልጥ›› ሲሏቸው አቡነ ሙሴ ግን ‹‹በጎልማሳነቴ ጊዜ ደም አፍስሼያለሁና አሁን የእኔም ደም ሊፈስ ይገባል›› በማለት ራሳቸውን ለመሰየፍ አዘጋጅተው ጠበቋቸውና በርበሮች ሰኔ 24 ቀን አንገታቸውን በሰይፍ ቆርጠዋቸዋል፡፡ፈርተውና ሸሽተው የነበሩት ደቀመዛሙርቶቻቸውም ተመልሰው አብረዋቸው ተሰይፈዋል ፡፡የአባታችን የሙሴ ጸሊም ቅዱስ ሥጋቸው በገዳመ አስቄጥስ በክብር ይገኛል፡፡ግብፆች አቡነ ሙሴ ጸሊምን በእጅጉ ያከብሯቸዋል፡፡ በስማቸው ጽላት ቀርጸው ቤተክርስቲያን ሠርተው ሥዕላቸውን አሠርተው ገድላቸውን ጽፈው በስንክሳራቸው መዝግበው የዕረፍታቸውን መታሰቢያ በደማቅ ሁኔታ ነው የሚያከብሩት፡፡ የአቡነ ሙሴ ረድኤት በረከታቸው ይደርብን፣ በጸሎታቸው ይማረን፡፡
ከገድላት አንደበት
✞ ✞ ✞

(የቅዱሳን ገድላቸውን ተኣምራታቸውን በየቀኑ በቴሌግራም ቻናል እና በዩቲዩብ በድምፅ ያዳምጡ።)

1. ቴሌግራም ቻናል፦


2. ዩቲዩብ፦
https://www.youtube.com/channel/UC_BIHIqn1uygbjMZlwyoxPA/featured።

Showing 10 of 10 posts

No more posts