Todavía no hay reseñas. ¡Sea el primero en compartir su experiencia!
Últimas publicaciones
BnSamy
12 may 2026, 04:55
بوست فضفضة كده
*️⃣ لعقود تم ترويج وزرع بذرة فكرة وهي "الدولة الكيوت"، وهي إن دولتنا لازم تبقى كيوت كده وحبوبة ودبدوبة في نفسها... وإحنا خلاص تشبعنا بالمفهوم ده لغاية ما تيجي الحروب ونتصدم.
*️⃣ إيه ده أمريكا طمعانة فينا وعاوزة مواردنا؛ إسرائيل طمعانة فينا وتوسعية وعاوزة أراضينا؛ روسيا طمعانة فينا؛ الصين عاوزة تبيع لنا وتاخد فلوسنا وطمعانة فينا... وهكذا فإحنا بقينا عايشين في مود بتاع "ياااي يالهوي هما إزاي أشرار كده".
*️⃣ في الواقع العالم مش غلط؛ العالم طبيعي جداً؛ آه الكوكب طبيعي وهو على الوضع الافتراضي؛ هما مكانوش عبط واشتروا شروة الدولة الكيوت دي زينا.
*️⃣ الدول إما هتتدخل في شؤون غيرها وتبقى عاوزة تاخد ثروات الجميع لشعوبها، أو الدول هتتدخل فيها هي وتاخد ثرواتها هي... مفيش شيء اسمه أنا قوي وهقعد كيوت كده؛ شايف شوية ثروات مع ناس أضعف مني وأقول خلاص حرام مش رزقي وبارك الله فيما رزقني؛ لا طبعاً مفيش الكونسبت ده.
*️⃣ اللي ساعد على تكوُّن وتقبل مفهوم الدول الكيوت هي تقسيمات الغرب لدولنا؛ دول تبقى حجمها صغير قوي فبالتالي هي معندهاش اختيار؛ تخيل كده تبقى صغير وكيوت؛ خلاص إنت مطمع من الجميع فلازم تشوف حد قوي يحميك من الجميع وتديله شوية من ثروتك أو أرضك أو تشوف طلباته إيه؛ وإلا هتبقى مستباح للوحوش...
*️⃣ لما بشوف لبنان واللي بيحصل فيها كمثال؛ دولة صغيرة جداً وكيوت فطبيعي إيران تتدخل فيها شوية، وسوريا زمان تدخلت وإسرائيل وووو؛ وفعلياً مفيش في إيد لبنان شيء؛ الحجم بتاع الدول مهم قوي... مهما كنت قوي ومتطور لكن حجمك ومساحتك وعدد شعبك مهم... تخيلوا كده الحرب الحالية لو أمريكا قالت لا أنا مليش فيه وأنتم مع نفسكم... تخيلوا كده مكانتش القوات الجوية لأمريكا وبريطانيا وفرنسا وحتى أستراليا بتشارك في الصد عن الكيان..
*️⃣ الكيان متطور وقوي ومعاه سلاح كثير بس برضك الحجم شيء مهم؛ فتخيل بقى لبنان اللي هي نصف مساحتهم ونصف عدد السكان ومفيش سلاح...
*️⃣ لما كنت بشوف ناس تقول ما إنتِ يا كويت اللي اختارتي يكون عندك قواعد للغريب في أرضك؛ نفس الفكرة يا جدعان؛ دولة صغيرة وثرية فمطمع؛ لازم تجيب سبونسر؛ فإحنا ممكن نقعد نتناقش بقى يا ترى أمريكا صح ولا تجيب روسيا ولا تجيب ميكس دول ووو؛ لكن في النهاية مفيش خيارات كثير، الحجم هيجبرك على شيء...
*️⃣ الثروة الكبيرة مع حجم صغير ميزة رهيبة وعيب؛ الميزة هي إن شعبك هيكون ثري وأي تقنية في العالم تشوفها تقدر تطبقها؛ واللي سافر الإمارات أو حتى راح الرياض ملاحظ التقدم البنيوي والتكنولوجي وجودة الخدمات المقدمة؛ مفيش مقارنة بين جودة المترو في دبي والرياض مع لندن ونيويورك وباريس... لكن كل شيء ليه عيب زي ما قولنا فوق في الكويت ولبنان كمثال؛ العيب إن مش هيكون عندك القدرة على الأكشن؛ ممكن تروح تجيب مرتزقة بقى لكن هل تقدر دولتك تخش حرب وجودية تخسر مليون أو 2 مليون من شعبها؟ مصر تقدر، إيران تقدر، تركيا تقدر، باكستان تقدر... وأكيد لا أتمنى أبداً موت أي إنسان مصري ولا عربي ولا مسلم، لكن المفهوم نفسه.
*️⃣ يمكن دي من النقاط اللي خدعت ترامب في الحرب الحالية؛ هو شاف شطارة الكيان ضد غزة وضد لبنان فقالك يبقى ضد إيران؛ مش واخد باله من الحجم والفارق... ودي هتبقى نفس النقطة مستقبلاً لما يبدأوا يخشوا على تركيا ومن بعدها مصر... إحنا دول كبيرة مش هفأ وجودي.
*️⃣ إنت ضعيف اقتصادياً طبعاً ده مفروغ منه وليَّ مئات البوستات شرحت؛ لكن مستحيل يقدر يقول هعمل معاك زي لبنان؛ ومش بس عشان قوة الجيش لكن الكتلة السكانية؛ يا جدعان عدد سكان لبنان كلها على بعضها أقل من عدد سكان إسكندرية؛ فهم لما ييجي يقولك هنخلي الجنوب ونزوح مليون شخص؛ المليون ده في مصر أو في تركيا ده حي سكني بالعواصم مش جنوب الدولة.
*️⃣ فآه كله عنده أطماع؛ أمريكا طمعانة فينا وإسرائيل وروسيا والصين وحتى إيران طمعانة فينا... فبلاش عبط وتقعد تكتب أصل مش عارف مين طمعان فينا... ده الوضع الطبيعي ومفروض الكل يكون طمعان في الكل، أمال ليه ربنا قال "وأعدوا لهم ما استطعتم من قوة ومن رباط الخيل ترهبون به عدو الله وعدوكم"؟ ما هو لو أنا كيوت وجاري كيوت مش محتاجين نخوف حد... آه وبالمناسبة مش دوري أنا اللي أكون كيوت؛ والإسلام ما قالناش خليكوا كيوت والسلام... آه لو ركزت هتلاقي ربنا قال "وإن جنحوا للسلم فاجنح لها وتوكل على الله"، واخد بالك إنت؛ مش إنت اللي هتبقى كيوت وتقولهم تعالوا حبونا وتعالوا السلام... لا، إنت المتحوش القوي فالثاني يخاف ويقولك طيب ممكن السلام؛ فهنا ربنا بيقولك طبقاً لقاعدة العفو عند المقدرة تقوله ماشي عفونا عنك وهنديك السلام... لكن حتى دي خدعونا وقالوا لنا إحنا بتوع السلام والسلام إحنا ابتدينا بالسلااااام (أغنية قديمة)
*️⃣ كفاية فضفضة لغاية كده، بس بتصدم بالناس الكيوت بتاعة فلان طمعان فيَّ؛ هو طبيعي ومفروض إنت تكون طمعان فيه؛ إنت قررت تبقى عبيط خلاص دي مشكلتك بس متعيطش.
15,100
477
0
BnSamy
12 may 2026, 04:55
📷 Photo
عشان نخلص 😁
س: يا بن سامي هو خروج الإمارات من أوبك و أوبك بلس هيأثر على سعر البترول. وإيه السبب؟
ج: منظمة أوبك سيطرة سعودية و أوبك بلس سيطرة سعودية روسية، المنظمة بتقعد تقيد الأعضاء بسياسات زي يلا ننتج يلا نخفض الإنتاج وهكذا.
س : ايوا ايه السبب وراء الانسحاب؟
ج: الشد والجذب بين الإمارات والسعودية وصراع مراكز القوى والديوك، الإمارات عاوزة متبقاش تحت التأثير السعودية في قطاع النفط.
س: أيوا يعني هتأثر ولا مش هتأثر؟
ج: يا عم انتا مش لما المضيق يتنيل يتفتح وحد يعرف يصدر أصلاً 😂، هنقعد نتناقش نشوي اللحمة ولا نحمرها واحنا معندناش لحمة في الثلاجة والسوق قافل كمان... إن شاء الله لما المضيق يفتح والطلب العالمي يتلبى والمخازن تتملي نبدأ وقتها في وقت الاستقرار نشوف قرارات الامارات ايه وقتها بتغرق السوق ولا بتقلل... نوصل بس النقطة دي 😁
تحديث:
⬅️⬅️ كمية ناس بتاخد معلوماتها من عناوين الاخبار وجاي تصلح لي وتقولي اصل الامارات بتصدر من خط الفجيرة فمش محتاجة المضيق، اصل السعودية بتصدر من ينبع عبر خط شرق غرب ومش محتاجة المضيق... يا جدعان ارحمونا واقروا الاخبتر كاملة مش العناوين، الخطوط دي مش بتصدر غير 50-70% من الصادرات العادية، دا اخرها، فمتقدرش تصدر انتاج الدول، فانتم فاكرين بقى انهم هيوسعوا الانتاج وبيصدروا منهم 😂😂😂 الرحمة يا جدعان، من حقك متقراش عادي، بس متقراش وتيجي تعدل عليا فعيب قوي الصراحة
BnSamy
12 may 2026, 04:55
ياااه لقد هرمنا وورمنا يا جدعان، بنك CIB Egypt نزل برنامج للشركات، ومش بس كده دا بنك CIB بيضحي وضافوا فيه IPN زي الأفراد، يعني خلاص مبقناش مضطرين نحول من الشركة للشخصي ثم نحول من الشخصي للناس، دلوقتي بقيت من حساب الشركة تكتب أي حساب بنكي أو انستاباي وتحط الرقم حتى لو مبلغ ذو 6 أصفار وتدوس تحويل يتحول.
*️⃣ يااااه يا جدعان بنك CIB الشركات دخل القرن ال 21، بس برضك للاسف متأخر لإني واخد قرار إني هخلع تدريجي منه الشخصي بنهاية السنة ثم الشغل (مفيش توسع لكن مش هقفله)، بلا عميل ويلث بلا نيله كل العملاء عند CIB ضفادع
*️⃣ بس خبر حلو للناس اللي عندها حساب شركات CIB يلا نزلوا البرنامج
ملحوظة: البرنامج دا شيء بيوعدونا بيه من 2023 😃
تحديث:
*️⃣ من الأمور المبهرة في بنك CIB انهم متابعين، كنت مرة من سنة بعت في تويتر لاستاذ هشام عز العرب شكوى وهما تابعوا معايا، المهم يعني النهاردة قولت مش هكتب في تويتر وخليني فيسبوك، بس عرفوا يربطوا بين حسابي دا والثاني وبالتالي رقمي وكلمني استاذ ماريو وكان مهذب ومتفهم جداً وكمان فرحني إن في شوية مشاكل كده تانية اتحلت في الأونلاين بنك.
*️⃣ هو فاكر إني قررت اقفل حسابي الشركات (ماريو من الشركات) لكن أنا قررت الأفراد مش الشركات، الشركات مكمل CIB يعني عانيت 6 سنين وهمشي يوم ما تتصلح 😂 ، لكن الأفراد أنا حصل موقف معايا في الفرع يبان عبيط لكني حسيت إني ضفدعة وضايقني جداً فأخدت قرار لكن كنت مأجل التنفيذ لغاية تحديث حساب الشركات ودخول IPN فيه والنهاردة تم...
*️⃣ فرسالة لإدارة الشركات أنا مكمل والله ومبسوط بالتحديث، لكن إدارة الأفراد أنا هبدأ تدريجي انزل درجة حسابي وافكس، مبقتش مزنوق في حسابي لإن في IPN في الشركة... أنا مش ضفدعة.
17,100
BnSamy
12 may 2026, 04:55
📷 Photo
يوم 10 مارس مصر زودت البنزين 3 جنية، السعر بتاع عقود خام برنت يوم 9 مارس كان 98 دولار ويوم 10 مارس نزل ل 88 دولار
*️⃣ النهاردة عقود برنت لشهر يونيو بقت 110 دولار، وعقود شهر يوليو بقت 103 دولار 😭😭
⬅️ مش عاوز أكون دايماً ناقل الأخبار الوحشة بس لو الوضع دا استمر واتفاق السلام متعملش فللأسف في 2-3 جنية كمان قادمين الصيف دا 😔
*️⃣ المخزونات الاستراتيجية للكوكب بتستهلك ولازم الحرب تخلص عشان مندخلش حلزونة مش لطيفة بتاعة أرقام غريبة للنفط، فالرقم الغريب يقتل حركة الاقتصاد العالمي، فدا يخلي السعر الغريب ينزل.
*️⃣ ملحوظة مهمة : دي عقود آجله، لكن لو في حد كان متوقع بترول من الخليج اتزنق مجاش وراح سوق الفوري Spot اشترى (اللي هو عاوز حالاً) فالشهر دا كان في تنفيذ ب 132 و 144 دولار (عمولة البريموم بقت 38$ فوق سعر برنت)... واخواتنا في آسيا اللي كانوا معتمدين كلياً على الخليج فسنغافورة اشترت ب 210$ وسيريلانكا عملت رقم تاريخي 286$ (الاخبار مقالتش الكمية بس واضح ان كانت شحنة صغيرة طارئة جداً)... فسعر 110 اللي بنقوله دا اللي هيشتري دلوقتي ويستلم يونيو، الفوري (10-20 يوم تسليم) يدفع 40$ فوقهم.
الموضوع كبير وأكبر من حوار نقفل الساعة 9 والجهات الحكومية تطفي اللمبة في الطرقة قصاد الاسانسير عشان ترشد الكهرباء
BnSamy
12 may 2026, 04:55
حد ملاحظ معايا الموضوع دا؟
*️⃣ في الشهور الأخيرة إن موضوع الطلاق والأسرة وقوانينها محط اهتمام كبير، وكمان حاسس إن الدولة ملاحظة إن في ظلم كثير من القوانين للرجالة، وبرضك ملاحظة إن في رجالة بتتسنكح ومتدفعش نفقة عيالهم فالدولة شغالة (كما يبدو) على تظبيط شوية، وحتى قوانين الأسرة للمسيحيين برضك بتتنظم حالياً.
*️⃣ لكن هل ملاحظين إن المجهود اللي شغالين فيه حالياً هو أقرب لخناقة بين طرفين الدولة بتحاول تعمل عدالة توزيع السلاح بين الأطراف المتصارعة، مجرد عدالة توزيع السلاح بس.
*️⃣ لكن مفيش حد بيقرب من الأسباب، ليه الطلاق زايد؟ ليه الرجالة بقت مش عاوزة تصرف على عيالها؟ ليه الستات بتتعنت في حرمان الأب من عياله؟ ليه الخناقات الزوجية والتفكك الأسري بيزيد كل سنة ونسب الطلاق وعدد قضايا الأسرة؟
*️⃣ ليه محدش عاوز ينخور ورا الموضوع دا ويحاول يحله؟ التربية، التعليم، التيك توك، انستجرام، والفقر والفقر والفقر وغيرهم هما سبب الخناقات وزيادتها.
*️⃣ ليه محدش متضايق من انتشار جيل ملوش كبير، يعني زوج ولا زوجة طق في نافوخهم حاجة فيعملوها ومفيش كبير تروحله يكون ليه كلمة عليهم، مأساااه إن مفيش كبير دي وكارثة لإن دا عماد المجتمعات العربية والمسلمة في ثقافتنا وطباعنا وحتى الدين قالك حكم من كل طرف والحكم مفروض كلامه ساري... لكننا أمام جيل ملوش كبير (دا يشمل كثير من جيلي وغالبية الجيل الأصغر سناً).
*️⃣ ليه محدش متضايق مع غياب التربية والاخلاق والمبادئ والسياسة اللي بالقرآن (ولا يجرمنكم شنآن قوم على ألا تعدلوا)..
*️⃣ غالباً عشان دي صعبة، التربية صعبة عاوزة وقت ومجهود وحملات اعلامية وحملات في المدارس والمساجد وكل مكان عشان بعد سنين نجني المحصول.
*️⃣ لكن الأسهل هو تنظيم السلاح، انتا من حقك يكون معاك 5 رشاش و 4 مدافع بس، شيل البازوكا دا من إيدك... اقتل الآخر بس بسلاحك بس خليك Fair.
التربية والتعليم هي الحل، إن وجدوا
للي مشافش الفيديو الايف امبارح تقريبا اتكلمنا ساعتين في كل شيء بداية من الدولار والبترول والذهب والبورصة وصناديق لغاية أسعار السمك في مصر ودولة غوايانا في أمريكا الجنوبية
ضيفت تفقيط وخط زمني تحت الفيديو
وبعتذر لمشاكل الصوت في اول الفيديو وغيرنا المايك في نص الفيديو
https://www.youtube.com/live/AMufEfxx1qU?si=_UrBnhkWKMfZLAPn
21,000
98
0
BnSamy
12 may 2026, 04:55
يا ترى القلق بتاع المفاوضات والمهلة خلصت لا مدناها وكده ممكن تخلينا نشوف شوية خروج بسيط النهاردة للهوت ماني... على فكرة الخروج البسيط صحي؛ في ناس قلبها خفيف وركبها بتخبط بسهولة فكويس الأسواق تتخلص منهم أول بأول
فلو مثلاً شوفنا النهاردة خروج ربع مليار كده خفيف مش هيضر
النظافة من الإيمان 😃😃
صباح الفل
ملحوظة إمبارح دخل قرابة نصف مليار وأول إمبارح 390 مليون... والسوق الثانوي لوحده من بداية الشهر فيه 2.7 مليار دولار دخول صافي... فعشان كده بقول ربع (10%) مش هيضر
18,600
196
0
BnSamy
12 may 2026, 04:55
في رمضان الشيف عبده (صديقنا عبد الرحمن سليم) استضافنا ومجموعة كبيرة من الأصدقاء عالافطار وبعدين طلعني مسرح 😂 لا حرفياً طلعت ومسكت ميكروفون لأول مرة في حياتي وقعدت أتكلم
المهم بقى قررنا ننشر الحديث بابلك (متصور 14 مارس لو حد حاسه قديم)
https://youtu.be/99XT8bFrrsc
بالمناسبة ناوي بكره أطلع لايف بعد غياب شهور، في رأيكم نعمل الايف عن ايه ويكون الساعة كام؟ 8 مثلا ولا بعدها (بلاش قبلها).
19,600
111
0
BnSamy
12 may 2026, 04:55
موضوع العدادات الكودية دا ناس كثير قوي عمالة تبعت لي عليه، اللي حصل إن العداد الكودي كان فيه شرايح استهلاك بتبدأ من 68 قرش، الدولة قررت لا الكل هيتحاسب ب 274 قرش ومفيش شرايح استهلاك... ففي ناس اتخرب بيتها حرفياً بس هنا ييجي السؤال ليه بتوع العداد الكودي كده، وايه أصلا العداد الكودي...
*️⃣ باختصار كده في ناس معندهاش عداد فتعمل ايه، تسرق كهرباء صح، دول لما يقفشوا بيركبوا لهم عداد كودي عشان حرامية سارقين الكهرباء... دي بقى الرواية الرسمية للدولة عن أصحاب العداد الكودي، فبما إنهم حرامية فخلاص يستحقوا اللي يحصل فيهم.
*️⃣ الحقيقة بقى إن في ناس كثير غيرهم عندهم عداد كودي ومش حرامية، يعني مثلاً حد راكب له عداد إنشائي عشان يبني بيه، خلص بناء الكهرباء بتشيل العداد الانشائي ومفروض يركب لك عداد عادي، بس استني كده، في حته بروز زيادة، العمارة دي ترخيصها 4 ادوار ودا دور خامس او حتى مخالفة انشائية، ليا صديق عنده مركز في أكتوبر لاصلاح السيارات شالوا له العداد الانشائي ورفضوا يركبوت العادي عشان هو قفل حته عملها مكتب ليه ودي مخالفة، دا يركب له عداد كودي، وفي ناس اصلا مفيش ترخيص رسمي للمكان فدول يركب لهم كودي برضك.
*️⃣ طبعاً شايفك هتسأل وتقول ما المكان فيه مخالف انشائية فطبيعي ميركبش عداد، ايوا ميركبش ليه؟ لو المخالفة تخليه خطر فمفروض زي بتوع الغاز بيرفضوا ساعات يركب لك مواسير عشان خطر وساعات بقولك السخان مكانه مش هينفع او البوتجاز، دي كده مفهومة، لو المكان فيه مشكلة تخليه خطر مفروض موصلوش كهرباء أصلاً، مش أوصله بس بسعر زيادة 😁، كمان دي مخالفة غرفة زيادة مثلاً ولا ترخيص ولا تصالح دور مخالف فدي بتاعة الحي، انتا ك كهرباء ايه المختلف والمخالف ليك؟
*️⃣ هتقولي يا سيدي دي ناس مخالفة هقولك تعرف دول كام شخص؟ كانوا زمان بيعملوا لهم ما يعرف ب محضر ممارسة، لكن اغسطس 2024 قرروا تركيب العداد، في خلال 20 شهر تم تركيب 2.6 مليون عداد، يعني في 2.6 مليون مكان، يعني مهواش رقم صغير ولا هين.
*️⃣ وزارة الكهرباء من طرفها قالت ان العداد الكودي فكرته انه مش اثبات سكن رسمي، يعني لما بنعمل اي معاملة بيقولك ايصال مرافق زي الكهرباء، اهو العداد الكودي لا يعتد بيه وملوش ايصال مرافق دا، فكده المكان هيفضل مخالف...
*️⃣ طيب عسل قوي انتا صح والفكرة صح، ليه بقى حاطط المخالف انشائي او مش متصالح مع الحرامي اللي سارق الكهرباء؟ ليه تحاسب الناس دي انها حرامية؟ هو مفروض مزعل الحي، فالحي يحط عليه غرامات بقى دا طبيعي وحقه، لكن انتا ك وزارة كهربا تحط عليه غرامة ليه؟ ايه المخالفة اللي هو عملها في حقك؟ انتا من الاخر كإن شركة فودافون مثلاً عرفت ان في عميل عندها بيكسر اشارة المرور فتقول حلو قوي هزود عليه سعر الدقيقة، يعني انتا شايف واحد مختلف مع الحي فتقرر تدفعه فلوس كهرباء زيادة 😁... وانتا مالك يا عم هي زيطة
*️⃣ اه صحيح نسيت أقولكم وشكلكم مش واخدين بالكم، مخالفات البناء عاملها صاحب العمارة، فانتا ك ساكن بتتحاسب انك حرامي عشان صاحب العمارة مخالف... طيب حضرتك انتا ك دولة ممنعتوش ليه انه يخالف؟ سبته يبني ويعمل عمارة ويبيع شقق وبعدين بتحاسب السكان؟
⬅️ تحديث بعد النشر:
*️⃣ كذا حد قال ان العداد العادي ناقص ولو باظ العداد بيركب لك الكودي 😭 بس العهدة على الراوي فلو حد عنده تأكيد او نفي يقوله
BnSamy
29 mar 2026, 15:05
أمريكا غدرت بالخليج ولبسته في الحرب دي ومدافعتش عنه، فيا تري هتغدر بيهم تاني وتوقف الحرب؟ أيوا إيقاف الحرب دلوقتي هو أكبر غدر ممكن يحصل بالخليج وخاصة الإمارات بل يفوق غدر بداية الحرب أصلاً.
*️⃣ دلوقتي في اقتصاديات قايمة على فكرة إحنا بلد جميلة هادية زي الفل تعالى عندنا، وهوبا أمريكا جابت لهم حرب وضربت مفك في الدعاية دي.
*️⃣ دلوقتي لو أمريكا قررت توقف حرب فدا هيكون هدنة = ممكن الحرب تتجدد تاني = أنا ك مستثمر كده أروح الخليج خطر عليا لإن في حرب هتحصل تاني وثالث، لااا شكراً.
*️⃣ فالحل دلوقتي بقى طالما كده كده بدأت الحرب دي يبقي دمر إيران كلياً، جيشها بمصانعها بسدودها بصواريخها بمفاعلاتها بمحطات الكهرباء بكل شيء وحولها لدولة 30 سنة كده عشان ترجع الصفر فإحنا نعيش في أمان ونعرف نبني.
*️⃣ طبعاً دي وجهة نظر وتفكير الخليج وخاصة الإمارات، احنا هنستخدم ثرواتنا الضخمة في اننا ندعم الاقتصاد بمئات المليارات كمسكنات حتى تنفيذ الحلم بالتدمير الشامل.
*️⃣ لكن هل الكوكب هيستحمل النتايج؟ المنطقي بيقول لا ميقدرش يستحمل اسبوعين ثلاثة كمان خناقات.
*️⃣ أنا قبل الحرب قولت دي حرب مفروض متحصلش عشان لو حصلت هنخش حته وحشة، بس حصلت وكان السيناريو في بالي واللي بكرره لأي حد يسألني هو التالي
1️⃣ الأسبوع الأول = ضربات خاطفة مركزة على أمل Knockout للطرف الثاني
2️⃣ الأسبوع الثاني = مرحلة استعراض القوة وكل طرف يوري الثاني يقدر يعمل ايه.
3️⃣ الأسبوع 3 و 4 = مرحلة عض الأصابع، محاولة تكبيد كل طرف للثاني أكبر خسائر لعل وعسى يوافق يوقف حرب، كل طرف عاوز الثاني.
4️⃣ الشهر الثاني والثالث للحرب وما بعده = مرحلة تدمير الدولة، سدود كباري انفاق محطات مياة كهرباء صرف بنوك جامعات مطاحن قمح سجون مصافي نفط وتكرير، ترجع إيران للعصور الوسطى وتنهي وجود الدولة وبالمثل إيران تحاول ترد كده عالخليج بس مش هتقدر غالباً.
*️⃣ الحرب لو خلصت خلال الشهر الأول = انتصار إيراني
*️⃣ ما بعد الشهر الأول = كارثة عالعالم وهتتدمر إيران ك دولة كلياً.
*️⃣ تدمير إيران ممكن وهي هتفلفص بس وهتلوش لكن ميقدرش القادة بتوعها يمنعوا تدميرها، بس هل الكوكب بقي يستحمل شهرين بترول غالي؟ شهرين بدون غاز الخليج؟
*️⃣ على فكرة اللي مخلي الكوكب مستقر والبترول قاعد عند 95-100 ومس بيفلت هو ان غالبية الدول الكبري بدأت السحب من مخزوناتها، دا هيهدي السوق أسبوعين ثلاثة لكن بعدهم ؟ نشوف ال 150 دولار؟؟؟
*️⃣ فيا ترى الدول هتقفل الحرب وتحسمها خلال فترة السحب من المخزونات اللي اخرهم شهر (المخزونات تكفي كذا شهر بس محدش مجنون يخلص مخزونة الاستراتيجي).
⬅️ عامة خلينا نشوف وخاصة مع مرحلة عض الأصابع اللي شغالة وربنا يستر مندخلش تكسير العظام لاننا هنتعور.
BnSamy
29 mar 2026, 15:05
📷 Photo
امبارح حطيت بوست عالفيسبوك بقول فيه اني كائن نهاري وبالنسبة لي مش بفهم ايه الناس اللي بتنزل الشارع الساعة 10 بالليل دي 😂
ثاني يوم رئيس الوزراء يطلع يقول ولا تزعل يا بن سامي، البلد دي تتقفل الساعة 9
عاش السيد رئيس الوزراء نصير الناس اللي بتنام بدري 😂😂
20,100
552
BnSamy
29 mar 2026, 15:05
بالرغم من كون مصر أكثر دولة متضرره بالحرب خارج دول المواجهة لكن في قاعدة معروفة وهي إن الحروب قد تكون فرص، وممكن نطلع من الحرب دي مستفيدين وهقول كام مثال.
1️⃣ شركات عالمية اتضرب ال Data Center بتاعها بالخليج، طيب ما تقولهم تعالوا عندنا، سيبك خالص من سرعة الانترنت المكسح بتاعنا، احنا دول Hub في الإنترنت العالمي وأرضنا بيعدي فيها كابلات بحرية تقدر توفر خدمات إنترنت فائقة... عيب بس قواعد البيانات إنها عاوزة كهرباء كثير قوي وهي عندنا مدعمة فكده هتبقي بتخسر بوجودهم بس ممكن تشوف ل دي حل... المهم اللي اتضرب بالخليج ممكن تغريه ييجي عندك حتى لو هتخسر في البداية عشان تجيبه.
2️⃣ السعودية هتضاعف اهتمامها بموانئ البحر الأحمر بعد الحرب عشان تبقى البديل للدولة، السفن دي هتعدي عندنا قناة السويس يعني رزق وجالنا، فممكن ننسق مع السعودية.
3️⃣ السعودية بتستخدم خط شرق غرب عشان تخرج ثلثي النفط، طيب ما نشوف معاها ربط أنابيب وخطوط بترولية عبر نيوم تيران وصنافير شرم الشيخ وتخش مصر بحيث السعودية تصدر لأوروبا مباشرة عبر الخط دا وهما يعبوا من إسكندرية، دا مشروع قديم من فوق ال 25 سنة بي متجمد، الحرب دي فرصة نفتحه تاني معاهم.
4️⃣ الترويج العقاري في مصر ممكن يستفيد من أزمة الخليج، عندنا أمان وبعيد وجو حلو، حبيبي تعالى إلي مصر 😂، نسرق شعار دبي عادي...
5️⃣ تبقي HUB بديل، دلوقتي في أزمة بتتشكل ببطىء وهي إن الهاب بتاع المنطقة في جبل علي بالإمارات، الحرب قفلاه فالهاب دا بيطلع بضايع ومش بيدخله جديد، طيب ما تعدل قوانين وتعمل قرد وتبدأ تفكر في توفير هاب بديل، حتي لو أقل... الشركات العالمية بعد الحرب هتعيد تقييم موقفها في الهاب بتاع جبل علي حسب شكل نهاية الحرب وخاصة لو لم يتم سحق إيران، فلازم تكون جاهز لهم لو فكروا تقولهم اتفضلوا مشروع جاهز كامل أهو هاب العين السخنة مثلاً... الهابات العالمية دي حاجة بتتعمل في سنين طويلة جداً فممكن تبدأ تروج لنفسك فيها وقد يقرر البعض نقل 10% حتى عندك.
*️⃣ هكتفي بال 5 نقاط دول عشان الفكرة نفسها، انتا ممكن جداً تطلع مستفيد عالمدى الطويل ودا عاوز منك تخطيط استراتيجي وسرعة حركة لإن العالم بيتحرك بسرعة جداً ومش هيقعد مستني تشكل لجنة واللجنة تشكل لجنة منبثقة ومنها نشكل حوار مجتمعي ووو... العالم بيجري والحرب دي هتغير المنطقة والكل دلوقتي هيجهز نفسه عشان ياخد وضعه الجديد في الشرق الأوسط الجديد ففرصة وجت لعندنا فبلاش نتفاجئ كالعادة.
كل شيء متقال عارف فيه تحديات ودا طبيعي، مهو لو سهل كان كله عمله
BnSamy
29 mar 2026, 15:05
شباب
ملاقيش حد من المتابعين يعرف يجيب لي فلوس فكة جديدة
عاوز فلوس جديدة صغيرة 10 و 20 او حتي 5 جنية لو لسه بتتطبع
مفيش حد هنا في بنك 😁
تحديث
كذا حد خلاص قالي انه هيجيبهم لي وفي بالفعل صديق عدي عليا فئة ال 5 جنية (بالمناسبة انا اصلا عاوز 10 و 20 لكن ال 5 قولت اطلبها وخلاص 😂 للعربية)
20,500
208
0
BnSamy
29 mar 2026, 15:05
بعد تصريح الرئيس ان تكلفة الكهرباء الحقيقية بعد قفزات سعري البترول والغاز فد تصل الي 4 أضعاف فاتورة الكهرباء الحالية، فأنا عندي اقتراح من زمان بسأل نفسي ليه مش بنطبقه في مصر.
*️⃣ الوضع الحالي في مصر حسب تصريحات الدولة بيقول ان اللي ساكن في قصر ولا فيلا قيمتها 50 او 100 مليون ومعاه عربيات ذات 7 أصفار بياخد كهرباء مدعومة وبيتحاسب بالشريحة اللي بيتحاسب عليها شخص طبقة متوسطة عنده 2 تكييف في البيت... أنهي منطق بيقول كده؟
*️⃣ في مصر أعلى شريحة كهرباء هي للي بيعدي 1000 كيلو وسعرها حالياً 2.23 جنية، طيب ما نبتكر شريحة اضافية فوق الفين كيلو ونخلي سعرها 4.5 جنية ثم شريحة ثالث رفاهية للي فوق 3 الاف كيلو ونحاسبهم ب 10 جنية الكيلو والدولة تكسب منهم حلو وتاخد الفلوس دي تدعم بيها الناس اللي بتستهلك 300 و 400 كيلو.
*️⃣ دا بيسموه الدعم البيني يعني هاخد من الغني وادعم الفقير وبكده دعم الكهرباء يستمر لكن مش من جيب الدولة لكن من جيب الأثرياء، شخص يا سيدي يا سيدي مصاريفه الشهرية مئات الالاف الجنيهات... بيدفع 100+ الف جنية قسط سكن أو عربية، معلش بقى انتا مش محتاج دعم، تاخد ليه كهرباء مدعومة؟ انتا فقير؟؟
*️⃣ وطبعاً فاهم انه لما يلاقي فاتورة الكهرباء بتاعته بيته زادت 20 الف جنية دا شيء يضايقه، بس اظن ال 20 الف للطبقة دي أسهل عليها من زيادة 500 جنية على موظف مرتبه موصلش لل 10 الاف جنية أصلاً... في فارق بين زيادة تضايق حد وبين زيادة علي حد ت....
⬅️ انتا مزنوق وميقدرش ينكر غير متحيز، لكن في خيار تسحب من فوق. وعلى رأي فؤاد المهندس لما كان بيختم برنامجه عالراديو كلمتين وبس لما كان بيسألنا ( مش كده ولا إييييييه!!)
19,900
BnSamy
29 mar 2026, 15:05
📷 Photo
النهاردة دخول أجانب
مين قالكم دا أول إمبارح 😁😁😁
تحديث للتوضيح :
البند الاول صافي عمليات المصريين
البند الثاني صافي عمليات العرب
البند الثالث صافي عمليات الاجانب
يبقي الصورة بتقول الصافي مصريين سالب وأجانب موجب
الرقم لسه بيتحدث كل 5 دقايق والسوق بيقفل الساعة 1 ونص
24,700
163
BnSamy
29 mar 2026, 15:05
تخيل معايا واحد مسافر من التجمع لاسكندرية رايح لصديق، المهم كلم صاحبه قاله الساعة 12 دلوقتي أنا هتحرك أديني 3 ساعات وهبقى عندك.
*️⃣ بعد ساعة صاحبه كلمه فقاله بص في حادثة كبيرة عالدائري وشكلي كده هوصل الساعة 4 مش 3... بعد ما قفل ما صاحبه لقى العربية فيها مشكلة ومش بتعدي سرعة 80 فرجع كلم صاحبه تاني وقاله لولا اني مينفعش ألغي لكن كده هوصلك على 6 بالليل.
*️⃣ بعدين راح متصل بميكانيكي صديق ليه قاله الوضع فالثاني قاله بص شوف كذا ممكن تكون مهزوزة، بالفعل شافها ولقاها كده ركبها فالعربية بقت شغالة عادي فرجع تاني كلم صاحبه وقاله هاجي علي الساعة 4.
*️⃣ دلوقتي لما تبص على كلام الشخص، دا مرة قال 3 ثم 4 ثم 6 ثم 4 تاني، لكن هل هو غلط فعلاً ؟! الإجابة هي لا، وقت ما تحرك من بيته فعلا الطريق 3 ساعات، ثم حدث معطى ومتغير جديد وهو الحادث فغير على أساسه التوقع، ثم حصل العطل فغير تاني، ثم اتصلح العطل فرجع غير تاني.
*️⃣ القصة دي تعبر عن الاقتصاد باختصار شديد، الاقتصاد علم معقد متداخل، مبني على عشرات المعطيات، مجرد تغير في المعطيات فهنا التوقع يختلف كلياً.
*️⃣ الشاطر هو اللي يدخل معطيات كثير، يكون عنده مصادر تجيب له داتا أكثر، كل ما تعط معطيات أكثر يبقي دقتك أحسن لكن يظل كل ما معطى يتغير هيغير كل شيء.
*️⃣ النهاردة الفجر نزلت أطول فيديو في تاريخ قناتي، قرابة الساعة والفيديو دا مكانش هدفي خالص أشرح لك الوضع ولا أقول توقع، لكن أقولك المعطيات إيه بحيث تقدر مع نفسك ومع الأخبار تشوف التغير في المعطيات وتعدل التوقع بنفسك.
*️⃣ ولإن الفيديو أطول من حلقات المسلسلات هتلاقيني مقسمه تحت الفيديو كده عناوين بحيث كل شخص يروح للحته المهتم بيها.
https://youtu.be/Ou8dev0I3bs
21,700
BnSamy
29 mar 2026, 15:05
خناقة مضيق هرمز اللي حاصلة دي مبهرة؛ فكرة إن في مكان في الكوكب تطلع دولة زي إيران تقول محدش يعدي هنا؛ أمريكا تقول للناس عدوا متخافوش.
*️⃣ وكلام إيران يمشي والشركات تسمعه عن كلام أمريكا؛ فكرة رهيبة وخاصة لما تفكر فيها مع وجود عدد ضخم من قطع البحرية الأمريكية. بل قطع البحرية الأمريكية نفسها خايفة تعدي 😂 واقفطن بعيد في المحيط بيحدفوا منه؛ مفيش جو نعدي قدام السواحل اللي هما مفروض مسيطرين على جوها.
*️⃣ لا ويطلع الرئيس الأمريكي يقول لإيران إياكي تحطي ألغام بحرية وإلا هنعملك واوا كبيرة (أصل بيقولهم هنضربكم؛ على أساس انهم بيبعتوا لهم ورد)... يعني الرئيس الأمريكي اللي قال هو ووزير الحرب بتاعه انهم انهوا وجود البحرية الإيرانية قاعدين قلقانين ان إيران تزرع الغام بحرية؛ طيب يا عم انتا مش بتقول انهيت بحريتهم هيزرعوا ألغام إزاي 🤔.
*️⃣ فعلاً أمريكا والكيان قوة مفرطة غشيمة بس متمشيش مع دول عندها عقيدة أي كانت العقيدة سواء فيتنام أو أفغانستان أو إيران؛ مجرد القوة المفرطة تصطدم بناس عادي يموتوا؛ هنا القوة دي تهنج؛ هي مفروض حافظة إنها مجرد تظهر قوتها الثاني هيخاف على حياته؛ لكن الفيتنامي الأفغاني اللي بيدافع عن أرضه ثم الإيراني اللي واخدها انتقام لزعيمهم... هنا القوة الغشيمة بتعجز؛ عادي ممكن اقتل لك مليون بس برضك دا مش رادع؛ طيب أعمل ايه.
خلينا نشوف هتخلص إزاي.
25,900
413
BnSamy
29 mar 2026, 15:05
النهاردة ثاني أكثر يوم خروج هوت ماني في آخر 12 شهر حيث كان اليوم صافي سالب 1.19 مليار دولار وهو الأعلى منذ 8 أبريل 2025 اللي كان وقتها خروج 1.24 مليار دولار (وقتها سعر الصرف كان 51.75 بالمناسبة).
*️⃣ الملاحظ إن العرب كان صافيهم (أحد إثنين ثلاثاء) صافي موجب 27 مليون دولار لكن النهاردة صافي سالب 67 مليون دولار... الأجانب النهاردة باعوا أقل بسيط من إمبارح (باعوا النهاردة 58 مليار جنية وإمبارح باعوا 62 مليار جنية).
*️⃣ الملاحظ بقى إن البنك المركزي يواصل لليوم الثاني عالتوالي تثبيت سعر الصرف عند 52 جنية ويمكن الإجابة عند بلومبيرج في نشرة خاصة اليوم قالت
Citi Closes Egypt Debt Call After Stop-Loss Level Is Triggered
*️⃣ يعني البنك المركزي لما عمل عنتر ورفع الدولار فوق 52 وقرب من 53 راح Citi Bank بايع أذون خزينة كان حاطط لها حسب الخبر 2.5% مارجن (-2.5% stop-loss) فالمركزي كده فهم إن في مؤسسات حاطه 52 وفوق شوية Stop Loss فمتفتكرش إنك أشطر مننا وهتطلع وتاكل من أرباحنا؛ لا يا برنس هنذبح ومش هنسمي... ومن هنا نفهم ايه ليه رغم خروج 2.3 مليار دولار إمبارح والنهاردة بس سعر الصرف ثابت.
⬅️⬅️ مين بقى عملكم فيديو يوم السبت وقال فيه إن مينفعش نكسر ال 52 وهو كده وخلاص ولما حصل يوم الأحد وكسرنا 52 قال يالهوي... عرفتم ليه عشان المؤسسات بره بتبدأ من فوق 52 تحط خط إيقاف الخسارة... في حاطط 52 وفي 52.5 وفي 53 وفي 54 وفي كثييير حاطين من 55 وطالع... فمجرد تطلع في ناس هيبيع تلقائي؛ كان في حرب مفيش حرب هيبيع دا سيستم. وعامة ال 52 و 52.5 خلاص ضربوا لما رفع ل 52.9... لكن المرحلة القادمة 53 لو شوفتوها هتلاقوا خروج هوت ماني كبير فجأة... دا إيقاف خسائر تلقائي.
ملحوظة مهمة : مش معني كده انه مش هيجيب 53؛ لكن معنى دا انه هيفلفص شوية ويحاول يأجل إنه يجيبها لكن لو اضطر هيعملها عادي ويطبق خيار شمشون
⬅️ شوفتم الفيديو بتاع السبت ولا مشوفتوش اعترفوا 😀😀 الفيديو قولت فيه هيزيد البنزين 3 جنية وقولت الصعود فوق 52 مينفعش ودا السقف 😁... ربنا يستر الكهرباء بقي لسه دي أول الشهر شكلها 😂
BnSamy
29 mar 2026, 15:05
النهاردة السوق الثانوي شهد خروج 1.15 مليار دولار هوت ماني؛ لكن في ملحوظة إيجابية وهي عودة مشتريات العرب بشكل ملحوظ وكانوا صافي موجب 70 مليون دولار؛ وكمان من يومين كانت مشتريات الأجانب صفر؛ كان بيع فقط وشراء صفر؛ النهاردة اشتروا أذون وسندات ب 14 مليار جنية (باعوا 77 مليار)؛ فكده معناه إن في أجانب بدأوا يقولوا كويس سعر الصرف دا أو واضح إن الوضع كويس في مصر فهنخش تاني مش هنطلع. اه في عدد أكبر بيبيع لكن المشتريين بدأوا يظهروا.
*️⃣ لو استمر بكره دخول للأجانب وحتى لو اليوم طلع سالب صافي (دا متوقع طبعاً) بس في أجانب بيشتروا فممكن قريب نشوف المعادلة تتقلب والأجانب يرجعوا للسوق تاني... وعودة الأجانب تعني استقرار سعر الصرف وممكن نهدي وننزل ل 51 ثم تدريجي بهدوء نتسحب لل 50...
*️⃣ دي مجرد خواطر كده لسعر الصرف وأدينا هنشوف؛ النقطة الإيجابية هتكون ان بكره صافي أجانب أحسن من النهاردة + مشتريات أجانب أكثر = الأجانب راجعين = هتستقر مش هتضرب مننا.
خلينا نشوف
