🍃 Бўйдоқ жиянларга кечинмаларим
Оиладан яхшироқ ҳаловат йўқ. Умуман, бу дунёда оиладан кучлироқ маскан-манзил топиш қийин.
Ҳа, тушунаман, ҳаёт қийин бўпкетди, яхши қизлар кам, интернет ҳаммаёқни чатоғини чиқарди, қизлар зўр феминист, ўз ҳақини ортиғи билан талаб қилади. Лекин аслида бу — бир баҳона холос, ҳеч бир сабаб оила қуришга тўсқинлик қилолмаслиги керак!
Оиласи қандай бўлиши – уйланган эркакнинг ўзига боғлиқ. Уйланаётганда танловдан тортиб, оилада ўзининг принципларини қанчалик сақлаб қола олишигача.
Баъзида сизларга ҳавас қиламиз — бирровга бўйдоқ бўпқолгимиз келади, лекин начора, поезд кетиб бўлган, "орқага қайтмайди карвоним энди")) Лекин буни "тоғаларим уйланганидан афсусда" деб тушунмаслик керак — бу хоҳиш бирровга холос, аслида эса оиладан яхшироқ жой йўқ. Умуман, бу дунёда оиладан яхшироқ маскан-манзил яратилмаган, бир марта уйланган одам оиладан ташқарида яшаши қийин.
Жиянларим, бир қарашда сизларга маза! Энг камида ўзларингга шунақа туюляпти. Ўзларинг хоҳлагандай яшаяпсизлар, кўнгилларинг тусаган қиз билан гаплашасизлар, пулларингга ўзларинг хўжайин (озгина ҳасаддаман). Лекин ишонинглар, вақт жуда тез ўтади, мана шу ўткинчи даврга алданиб қолмаслик эса жуда муҳим. Ниҳоятда муҳим!
Буни қачон тушунасизлар? Қачонки ўғлинг-қизларинг сизларни кутиб ухламай ўтирса, эшикдан киришинг билан қулочини икки томонга очиб, югуриб келиб бўйнингга осилса, икки қўли билан икки юзингни маҳкам ушлаб, бурнини бурнингга теккизиб ҳидласа, "дадажоним" деб қучоқласа... Қизинг олиб берган пар-пара кўйлакни кийиб, шодланса... Ўғлинг велосипед учишни, тўп тепишни ўрганиб, завқланиб, қийқириб кулса, сени дунёнинг энг катта қаҳрамони деб билса, мен катта бўлсам дадам бўламан деса... Ана шунда сен маза деб ўйлаган йиллар қанчалик ҳайф эканини тушунасан, ҳақиқий бахт нималигини ҳис қиласан, бефойда ўтказган йилларингга астойдил ачинасан. Лекин кеч, орқага қайтмайди карвонинг энди.
Жиянларим! Биламан, бир кун келиб уйланасизлар. Ҳаёт бошида зўр бўлади, хотининг ўн минг турадиган кичкина "Баунти" шкалати ёки бир дона банан учун ҳам сендан хурсанд бўлади, чинакам бахтли ҳис қилади ўзини. Бу жуда зўр нарса сизларга айтсам. Вақт ўтади, болалар туғилади, хотининг болаларинг билан андармон бўлади, сен бирхилликдан бироз зерикасан.
Шу пайт ҳақиқий синовдан ўтасан, ҳақиқий эркак бўлсанг оилангни асраб қоласан. Бўлмаса... Бўлмасин унақа!
Лекин барибир синовлар бўлади. Моддий, маънавий инқирозлар бўлади. Ана шулардан хотин билан бирга ўтиш керак. Шунда оиланинг, хотиннинг қадрига етадиган бўласан, тобланасан, ҳақиқий эр-йигит бўласан.
Хулоса ўрнида: Жиянлар, бахтни тайёр ҳолда кутманг! Гўёки идеал қиз келса, ҳаммаси ўз-ўзидан зўр бўлиб кетадигандек.
Йўқ! Бахт қурилади. Ҳаракат билан, сабр билан, ҳурмат, интилиш билан қурилади.
🤲 Бу йилдан қолдирманглар уйланишни. Тўйга борайлик, ер тепиб ўйнайлик!
Аброр Зоҳидов
https://t.me/az_sss |
https://www.instagram.com/abrorzohidov1
